جامبىل وبلىسىندا ەلوردا اتاۋىنىڭ وزگەرۋىنە قاتىستى فورۋم ءوتتى

بۇل تۋرالى Nur Otan پارتياسى وبلىستىق فيليالى باستاۋىش پارتيا ۇيىمدارىنىڭ فورۋمىندا ايتىلدى، دەپ حابارلايدى قازاقپارات.

فورۋمدا ءسوز العان باستاۋىش پارتيا ۇيىمدارىنىڭ جەتەكشىلەرى ەگەمەندىك جىلدارى ەلىمىزدىڭ دامۋىنا ايرىقشا ۇلەس قوسقان ەلباسى ەسىمىنىڭ ەلورداعا بەرىلگەنىن ۇلكەن قۋانىشپەن قابىلداعاندارىن جەتكىزدى.

«ءبىزدىڭ ەل بولىپ، ەڭسە تىكتەۋىمىزگە وزگە تۇرماق، ءوز ىشىمىزدە دە سەنبەۋشىلەر اۋەل باستا كوپ بولدى. شىن مانىندە، سول ءبىر كەز كوپشىلىكتىڭ بولاشاققا كۇمانمەن قاراعان كەزەڭى ەدى. سونداي قيىن كەزەڭنەن الىپ شىعىپ، بۇگىنگىدەي مامىراجاي زامانعا جەتكىزگەن قازاقستان رەسپۋبليكاسىنىڭ تۇڭعىش پرەزيدەنتى - ەلباسى نۇرسۇلتان نازاربايەۆ ەكەنى ءسوزسىز»، - دەدى «شولاقتاۋ» باستاۋىش پارتيا ۇيىمىنىڭ ءتوراعاسى باعلان سۇلتانبەك.

ال «قاراتوبە» باستاۋىش پارتيا ۇيىمىنىڭ جەتەكشىسى ءمولدىر قىرىقبايەۆا ءوز سوزىندە: «مەملەكەتتىڭ نەگىزىن قالاۋشى تۇلعالاردىڭ ەسىمدەرىن ەل تاريحىنا ماڭگى قالدىرعان مۇنداي وقيعالار الەمدىك تاريحتا ءجيى كەزدەسەدى. سوندىقتان ەلىمىزدىڭ باس قالاسىنا تاۋەلسىز قازاقستاننىڭ نەگىزىن قالاپ قانا قويماي، ەلىمىزدى ىرىس پەن ىنتىماقتىڭ التىن بەسىگىنە اينالدىرعان تۇڭعىش پرەزيدەنت - ەلباسىنىڭ ەسىمىن بەرۋ وتە ورىندى شەشىم ءارى زاڭدى قۇبىلىس»، - دەپ ءوزىنىڭ ورامدى ويىن ورتاعا سالدى.

سونىمەن قاتار، «دەگەرەس» باستاۋىش پارتيا ۇيىمىنىڭ ءتوراعاسى راۋان ساعىندىقوۆ ەلوردانىڭ نۇر-سۇلتان بولىپ وزگەرۋى تاۋەلسىز قازاقستان ومىرىندەگى تاريحي وقيعا ەكەنىن، مۇنى جامبىلدىق باستاۋىش پارتيا ۇيىمدارى تاريحي ادىلەتتىلىكتىڭ ورناۋى رەتىندە باعالاۋدا ەكەنىن، شيرەك عاسىردان استام ۋاقىتتا ەلىمىزدى الەمگە تانىتقان تۇلعانىڭ كەمەڭگەرلىگى مەن دانالىعىنا مۇنداي قۇرمەت كورسەتىلۋى زاڭدىلىق دەپ قابىلدايتىنىن جەتكىزدى.

ايتا كەتەيىك، اتالعان جيىنعا 100 دەن اسا باستاۋىش پارتيا ۇيىمىنىڭ جەتەكشىلەرى، پارتيانىڭ وبلىستىق فيليالى ساياسي كەڭەسىنىڭ مۇشەلەرى، پارتيانىڭ اۋماقتىق فيليالدارى ءتوراعالارىنىڭ ءبىرىنشى ورىنباسارلارى قاتىستى. قازىرگى كەزدە وبلىس بويىنشا 350 گە جۋىق باستاۋىش پارتيا ۇيىمى بولسا، وندا 70 مىڭعا جۋىق پارتيا مۇشەسى بار.