قۇمدى دالاداعى عاجايىپ شاھار - ساپار ەستەلىگى
بىرىككەن اراب امىرلىگى تۋرالى از ءسوز
بىرىككەن اراب امىرلىگىنىڭ رەسمي استاناسى- ءابۋ- دابي قالاسى بولىپ تابىلادى. ال تۋريستىك جانە ساۋدالىق ورتالىعى - دۋباي شاھارى.
1971 -جىلى قۇرىلعان فەدەراتيۆتى مەملەكەت بىرىككەن اراب امىرلىكتەرى - جەتى تاۋەلسىز امىرلىكتەن تۇرادى. ءار امىرلىك نەگىزگى قالاسىنىڭ اتىمەن اتالادى: ءابۋ- دابي، دۋباي، شاردجا، ادجمان، ۋم- ال كۋۆەين، راس- ەل- حايما جانە فۋدجەيرا. ءار ءبىر امىرلىكتىڭ ءامىرشىسى - شەيح، ال جالپى مەملەكەتتىك باسقارۋ بيلىگى جوعارعى كەڭەسكە بەرىلگەن.
بىرىككەن اراب امىرلىگىنىڭ ءدىنى - يسلام. دەگەنمەن، باسقا دىندەرگە دە رۇقسات بەرىلگەن. نەگىزگى ءتىل اراب ءتىلى، سونىمەن بىرگە اعىلشىن ءتىلى دە كەڭ تارالعان. دۋباي قالاسىندا اعىلشىن ءتىلى باسىم ورىندا ەكەندىگى بايقالادى.
بىرىككەن اراب امىرلىگى ناعىز قۇرعاق سۋبتروپيكالىق كليماتىمەن ەرەكشەلەنەدى. جاز مەزگىلى وتە ىستىق بولادى (°C48 +گە دەيىن) . ب ا ءا- دە تۋريستىك ماۋسىم جازعى اپتاپ ازايعان كەزدە قىركۇيەك ايىنىڭ سوڭىندا باستالىپ، مامىر ايىنىڭ ءبىرىنشى جارتىسىنا دەيىن سوزىلادى. سول سەبەپتى وسى مەزگىلدەرى، اسىرەسە جاڭا جىل، اقپانداعى ءداستۇرلى شوپپينگ فەستيۆالىنە قارسى باعالار جوعارىلايدى. ال جازدا، كەرىسىنشە. ءبىز جەلتوقساننىڭ سوڭىنا قاراي دۋبايعا اتباسىن تىرەدىك. اۋا- رايى °C 30 اينالاسىندا ءبىراق ىلعالدى، ناعىز «قوڭىر سالقىن مالعا جاي» بولىپ تۇرعان كەز ەكەن.
العاشقى اسەر
ءبىزدى اۋەجايدان دۋباي قالاسىندا جۇمىس بابىمەن 10 جىلدان استام تۇرىپ جاتقان دوسىمىز ەسبول جاپان ۇلى كۇتىپ الدى. ەسبول- بۇل قالاعا ءبىر سومكامەن عانا كەلىپ، ءتىلى ۇيرەنىپ، ەرىنبەي ەڭبەك ەتىپ ۇلكەن جەتىستىكتەرگە جەتكەن، بۇل كۇندە اتالمىش شاھاردا ءوز ورنى بار ىسكەر ازامات. دۋبايداعى ۇلكەن كومپانيالاردىڭ بىرىندە جۇمىس جاسايدى.
الدىڭنان اۋىلداسىڭ كۇتىپ العاسىن با، بوتەن قالا ءبىز ءۇشىن بىردەن جىلى سەزىلدى. جانعا- جايلى اۋاسى دا بويدى سەرگىتىپ، جول ۇزاقتىعىن ۇمىتتىرىپ جىبەردى. ماعان الدىمەن اسەر ەتكەنى قالانىڭ اسەمدىگى وزگەشە ارحەتەكتۋراسى. تاقىر ءشول دالادا وسىنداي كەرەمەت قۇرلىستاردىڭ تۇرعىزىلعاندىعىنا جانە ولاردىڭ كەيبىرى جاي عانا بيىك عيمارات ەمەس، الۋان ءپىشىندى، بىرەۋى راۋشان گۇل ءتارىزدى، ەندى بىرەۋى جەلكەن، تاق تەكتەس ارحيتەكتۋرالىق شەديەۆرلاردى كورىپ ادام ويىنىڭ، قيالىنىڭ شەكسىزدىگىنە، قولىنىڭ سانسىز مۇمكىندىگىنە تامسانا تاڭ قالاسىڭ.
ۆيزاسىز رەجيم ورناعاننان بەرى قازاقستاندىقتار ءۇشىن دۋبايعا ساياحاتتاپ بارۋدىڭ جولدارى كوپ. اقشاسىن تولەسەڭىز تۋريستىك اگەنتتىكتەر قوناقۇي، ارى- بەرى ۇشىپ- كەلۋ اۆيابيلەتى كۇتىپ الۋ، شىعارىپ سالۋ سەكىلدى بارلىق قىزمەتتى وزدەرى ورنالاستىرادى. جول سەرىگىم«LED وردا» كومپانياسىنىڭ ديرەكتورى تىناي ءابۋ ۇلى ەكەمىز دە تۋريستىك اگەنتتىكتەردىڭ باعدارلاماسى ارقىلى اتتانعانبىز. الايدا ەسبول دوسىمىز كۇتىپ العاندىعى سەبەپتى، بىزگە دايىنداعان قوناق ءۇي، تاكسي قىزمەتتەرىنەن باس تارتىپ ەسبولدىڭ ماشيناسىنا جايعاستىق، ەندىگى تىزگىن سونىڭ قولىندا. ايتپاقشى اۋەجايدان جەكە ماشينالار جالعا بەرەتىن ورتالىقتار تولىپ تۇر. ماركالارىنا قاراي باعالارى ءار- ءتۇرلى. تاۋلىگى 100 دوللاردان باستالىپ 2000 دوللارعا دەيىن بارادى. بىزبەن بىرگە اتا- اناسىن ەرتىپ بارعان بەلگىلى كاسىپكەر دوسىمىز ەرنۇر بولات ۇلى 150 دوللار شاماسىندا جول تالعامايتىن كولىكتىڭ ءبىرىن تىزگىندەدى. جالپى ترانسپورتتىق جايىن ايتا كەتسەم، قالانى ءوزىم ارالايمىن دەسەڭىز، وندا الدىن الا ءجۇرۋ جوسپارىڭىزدى قۇرىپ، وتە ىڭعايلى مەترو ارقىلى نەمەسە قولىڭدى كوتەرە قالساڭ، جەتىپ كەلەتىن ارنايى تاكسيلەرمەن تارتىپ وتىرساڭىز بولادى. تاكسيدە ساناعىش قۇرالدارى تۇراتىندىقتان، الىس باعىتتارعا شامامەن قانشا ديرحام كەتەتىندىگىن الدىن الا سۇراپ العانىڭىز ءجون. تاكسي باعاسى جوعارىراق. سول سەبەپتى مۇمكىندىگىنشە جەكە كولىك جالداپ الساڭىز ءتيمدى كورىندى. ول ءۇشىن بانك كارتاسى، پاسپورت جانە جۇرگىزۋ كۋالىگىڭىز بولسا جەتكىلىكتى. ايتا كەتەرلىگى اعىلشىن ءتىلىن جەتتىك بىلمەسەڭ، نەمەسە ءتىل بىلەتىن جولداسىڭ بولماسا، ىمداسىپ الىسقا بارمايتىن سەكىلدىسىڭ.
قوناق ءۇي جانە اقشا ايىرباس
دۋباي كارتاسىن قاراپ وتىرساڭىزدار، ول نەگىزىندە دۇرىس باعدار ۇستاۋ ءۇشىن ىڭعايلى كوپتەگەن اۋداندارعا بولىنگەن. اۋدانداردىڭ ەرەكشەلىگىنە قاراي قوناق ۇيلەردىڭ دە باعاسى ءار- ءتۇرلى. پارسى شىعاناعىنا جاقىن ماڭاي دجۋمەيرا دەپ اتالىنىپ، ونداعى قوناقۇيلەر باعاسى جاعىنان جوعارى، ال سۋ جاعاسىنان الىس، قالا ىشىندەگى قوناقۇيلەردىڭ باعالارى تومەنىرەك بولادى. سوندىقتان ەگەر دۋبايعا ناقتى سۋعا شومىلىپ، جاعاجايدا دەمالۋ ءۇشىن باراتىن بولساڭىزدار، دجۋمەيرا جاعالاۋىنان، ال جالپى قالا ارالاپ، قوناقۇيدەن شىعا سالىپ سۋعا تۇسە قالۋ ماقساتى بولماسا، دەيرا، بار- دۋباي، دۋباي سيتي سىندى اۋداندارداعى سان ءتۇرلى قوناقۇيلەردى قاراستىرساڭىزدار بولادى. كوپ جاعدايدا ەكونوم ۆاريانت رەتىندە 2* نەمەسە 3* قوناقۇيلەردى قورىقپاي تاڭداۋعا بولادى. ويتكەنى دۋبايدا ونداي قوناقۇيلەردىڭ جاعدايى جاقسى.
قوناق- ۇيلەردىڭ كوپشىلىگىندە، ساۋدا ورتالىقتارىندا، ءىرى دۇكەندەردە American Express, Master Card, Visa, Dinners Club تولەم كارتالارى قابىلدانادى، ال بانكوماتتاردى كەز كەلگەن حالىق ءىرى قونىستانعان ورتالىقتاردان تابا الاسىز. شەتەل جانە ۇلتتىق پۇلدى ەنگىزۋگە جانە شىعارۋعا شەكتەۋلەر قويىلمايدى.
قۇمدى دالاداعى عاجايىپ شاھار
قۇمدى دالاعا عاجايىپ شاھار سالعان ارابتىقتاردىڭ مىقتىلىعىنا قول قويماسىڭا امال جوق. بۇل تۇعىدا اراب- امىرلىگى ءوز بايلىعىن ءتيمدى پايدالانۋمەن بىرگە شەتەلدىك ينۆەرستىرلاردى ءساتتى تارتا بىلگەن. دۋبايدا تامساندىراتىن، تاڭ قالدىراتىن جەرلەر بارشىلىق. اسىرەسە جاڭا دۋباي اتالاتىن قالا بولىگىندەگى دۋباي مارينا، پالم دجۋمەيرا اۋداندارى، ونداعى بۋردج حاليفا (الەمدەگى ەڭ بيىك عيمارات 828 مەتىر) ، جەلكەن ءتارىزدى ايگىلى 7 بۋردج ال- اراب قوناقۇيى، قولدان سالىنعان پالما ارالدارى، مادينات دجۋمەيرا ت. ب.
راسىندا دا ارابتار ءار نارسەدە ءبىرىنشى بولۋدى، تاڭ قالدىرۋدى جاقسى كورەتىن سەكىلدى. انگليا، امەريكا سىندى ەلدەردەن شاقىرىلعان ەڭ تانىمال قۇرىلىس شەبەرلەرىن شاقىرىپ، دۋبايدى تۋريستەر ءۇشىن ودان سايىن قىزىقتى قىلىپ ەرەكشە رەفورمالاردى قابىلداعان ەل باسشىسى موحاممەد يبن راشيد ال- ماكتۋمنىڭ ۇلەسى زور.
ارحيتەكتۋرالىق ءلاززاتتان وزگە، الەمدەگى ەڭ ءىرى ساۋدا- ويىن- ساۋىق كەشەنى (1,2 ميلليون كۋادرات شارشى مەتىر) دۋباي موللدى، سونداي- اق ەڭ ءىرى جابىق تاۋ شاڭعى كۋرورتى بار ەميراتتار موللىن ارالاپ شىعۋلارىڭىزعا بولادى. بۇل كەشەندەر جاي عانا ساۋدا ءۇشىن ەمەس، كۇنى بويى ارالاپ، قىدىرۋ ءۇشىن دە قىزىقتايتىن ورىن. ال كەشكە جاقىن دۋباي موللدىڭ الدىندا ورنالاسقان مۋزىكالىق فونتاندى تاماشالاي الاسىزدار. بۇل فونتان الەمدەگى ەڭ ۇلكەن ءارى ەڭ بيىك فونتان بولىپ سانالادى. شاپشىپ اققان سۋ بيىكتىگى 150 مەترگە دەيىن كوتەرىلەدى.
قالا قىزىقتارىنان وزگە، ءار قوناقۇيدە ءتۇرلى ەكسكۋرسيالاردى ۇسىناتىن ارنايى گيدتەر وتىرادى. سافاريگە، اءبۋ- دابيگە، جاڭا دۋبايدى ارالاۋعا ەكسكۋرسيالار الساڭىزدار بولادى.
اراب- امىرلىكتەرىنىڭ استاناسى ءابۋ- دابي
ءبىز دۋبايعا ساپارىمىزدىڭ العاشقى كۇنى جاعاجايدا جاتىپ دەمالىپ، ەكىنشى كۇنى دۋبايدان 200 شاقىرىم مولشەرىندە ورنالاسقان اراب- امىرلىكتەرىنىڭ استاناسى ءابۋ- دابي قالاسىنا جول تارتتىق. ەڭ اۋەلى الەمدەگى ەڭ ساۋلەتتى مەشىتتەردىڭ ءبىرى زايد شەيحىنىڭ مەشىتىنە اتباسىن تىرەدىك. ەرەكشە ۇلگىدە ءمار- مار تاستارمەن ورنەكتەلگەن، توبەسىنە التىن جالاتىلعان، مەشىتكە ىلىنگە اسپالى شام الەمدەگى ەڭ ۇلكەن حرۆيستال شىراق ەسەپتەلەدى ەكەن. ال مەشىت ىشىنە الەمدەگى قولمەن توقىلعان ەڭ ۇلكەن كىلەم توسەلگەن. جول باستاۋشىمىز ەسبول جاپان ۇلىنىڭ ايتۋىنشى بۇل مەشىتتى سالۋعا 5 ميلليارد 5 ميلليون ا ق ش دوللارى جۇمسالىپتى.
ءبىز بۇل قالادا ارابتاردىڭ ەجەلگى ومىرىنە سىر شەرتەتىن ەتونو اۋىلندا بولدىق. بۇگىنگى كۇنى مەن كەشەگى ءومىرى اراسى جەرمەن كوكتەي ەكى الەم. سونىمەن بىرگە بۇل قالادا الەمدەگى ۇزدىك قوناقۇيلەردىڭ ءبىرى «Emirates Palace» جانە الەمدەگى ەڭ ۇلكەن جابىق ويىن- ساۋىق كەشەنى «Ferrari World Abu Dhabi» پاركىنە كىردىك. پاركتتىڭ اۋماعى 96 مىڭ شارشى مەتردى قۇرايدى ەكەن.
«Ferrari World» كەشەنى الەمگە ايگىلى Ferrari ماركالى اۆتوموبيلدەرگە ارنالعان. بۇل جەردەن وسى جارىس اۆتوموبيلدەرىمەن تانىسا الاسىز. ساياباقتىڭ بارلىق ويىن- ساۋىقتارى وسى برەندكە بايلانىستى. پارككە كىرۋ ەرەسەك - 295 ديرحەم، بالالار ءۇشىن - 230 ديرحام (25-30 مىڭ تەڭگە شاماسى) .
«Ferrari World» ويىن- ساۋىق ساياباعىندا 20 دان استام اتتراكتسيوندى ويىندار بار. Formula Rossa - پاركتەگى ەڭ تانىمال اتتراكتسيون، سەبەبى بۇنىڭ جىلدامدىعى 240 ك م / س جەتەتىن الەمدەگى ەڭ جىلدام روللەر. نامىسقا تىرتىسىپ بۇعاندا وتىرىپ كوردىك، كوز الدىڭنان وتكەن ءومىرىڭ زۋ ەتىپ وتە شىعادى))) .
الەمدەگى ەڭ ۇلكەن گۇل پاركى
دۋبايداعى مەنى تاڭعالدىرعان تاعى ءبىر كەرەمەتتەردىڭ ءبىرى قالانىڭ ورتاسىندا ورنالاسقان الەمدەگى ەڭ ۇلكەن گۇل پاركى. ءشول دالادا الۋان گۇلدەردىڭ جۇپار يىسىمەن تىنستاپ، وزگەشە لاززاتقا باتقىڭىز كەلسە مىندەتتى تۇردە Dubai Miracle Garden ساياباعىنا اتباسىن تىرەڭىز. مۇندا الەمدەگى ەرەكشە گۇلدەردىڭ جۇزدەگەن ءتۇرى بار كورىنەدى.
سايا باق 2013- جىلى ۆالەنتين كۇنى قارساڭىندا اشىلىپ، گيننەستىڭ رەكوردتار كىتابىنا ەنگەن. باقتى قۇرۋعا ا ق ش- تىڭ جانە ەۋروپانىڭ ۇزدىك ماماندارى اتسالىسىپتى. گۇلدەن جاسالعان گۇلزارلاردى بەزەندىرۋ ءۇشىن، امىرلىكتەر اۋماعىندا ەشقاشان وسىرىلمەگەن وسىمدىكتەر اكەلگەن. بۇل ورىن جاستار ءۇشىن دە، ۇلكەندەر ءۇشىن دە ەرەكشە اسەر سىيلايتىن عاجايىپ باق.
الىپ تەڭىزدەگى ەكى قازاقتىڭ سوقتىعىسى
ءبىز بۇل ساپارىمىزدىڭ ءبىر كۇنىندە دۋباي قالاسىنان 40 شاقىرىم مولشەرىندە ورنالاسقان شارجا امىرلىگىنە بەت الدىق.
شارجانى اراب- امىرلىكتەرىنىڭ مادەني استاناسى دەپ اتاۋعا دا بولادى. ويتكەنى مۇنداعى بىرەگەي مۇراجايلاردىڭ كوپتىگى، گالەرەيالار مەن تەاترلار، ەۋروپالىق ۇلگىدەگى قالا كەلبەتى، امىرلىكتىڭ ابرويىن اتتىرا تۇسەدى.
باسىمىزدان وتكەن مىنا ءبىر وقيعانى وقىرماندار ەسكەرە ءجۇرسىن دەگەن نيەتپەن قىستىرا كەتەيىن. ءبىز بۇل قالادا تەڭىز جاعاسىنا بارىپ (گيدروتسيكل) موتورلى قايىق پەن سۋدا ءجۇزۋدى ءجون سانادىق. ءتورت جىگىت ءتورت كولىكتى تاقىمداپ تەڭىزگە شىقتىق. بويىمزداعى تابيعاتىمىزعا ءتان ءبىر مىنەزىمىز ۇستادى بىلەم، الىپ تەڭىزگە شىققاسىن، كەڭ جايلاۋدا جۇرگەندەي اتتىڭ باسىن جىبەردىك- اۋ. بىرىمىزدەن ءبىرىمىز وزىپ ءبىراز جارىستىق، شەتسىز- شەكسىز تەڭىز ۇستىندە جەلدەي ەسىپ، ەمىن- ەركىن كوسىلدىك، نەشە ءتۇرلى مانۋەر جاساپ تەڭىز اپشىسىن قۋىردىق- اي. بىردە گيدروتسيكلمەن اعىزىپ كەلىپ ارتقا اينالا بەرەم دەگەندە وڭ جاعىمدا وقتاي زۋلاپ كەلە جاتقان تىناي دوسىمنىڭ قايىعىنىڭ بۇيىرىنە قاتتى ۇرىلدىم. ول دا جاناسالاپ ءوتىپ كەتۋگە ۇلگەرمەي قالدى. ءبىر قاراسام تىناي كينوداعىداي كەڭىستىككە كوتەرىلىپ بارىپ، تەڭىزگە قۇلادى. استىنداعى «تۇلپارى» ءبىراز جەرگە بارىپ توقتاعان ەكەن. قۇدايعا شۇكىر ەش جەرى جاراقاتتانباپتى. سۋعا ءبىر سۇڭگىپ قايتا شىقتى دا گيدروتسيكلىنە مالتاپ جەتتى. العاشقى جەلوكپەلىگىمىز ءسال باسىلعانداي بولدى))). ەكەمىزدىڭ دە كولىكتەرىمىزگە ازداپ زاقىم كەلىپتى. جالعا بەرۋشىلەر كولىكتەرىمىزدى ءبىر قاراپ شىعىپ، ءوزارا كۇبىرلەسىپ ىشتەي «جىمىڭ» ەتكەندەي بولدى. قانشا دەگەنمەن شەتەلدىك تۋريستەردىڭ قالتاسىن قاعىپ ۇيرەنگەن قۋلار عوي، ەسەلەپ شىعىنىن وتەپ الدى. «باس امان بولعاسىن بولدى»، دەپ 600 مىڭ تەڭگە ساناپ بەرىپ شىعا بەردىك. «دوسىم شەتەلدە جۇرگەندە ابايلاۋ كەرەك، الىپ تەڭىزدە ەكى قازاق سوقتىعىسىپ قالىپتى دەسە ەلدەن ۇيات ەمەسپە»- دەدىم تىنايعا))) .
جاساندى ارالداعى سۋ الەمى
دۋبايداعى اتباسىن بۇرماسا بولمايتىن دەمالىس ورىنداردىڭ ءبىرى «اتلانتيس» قوناق ءۇيىنىڭ اۋماعىندا سالىنعان سۋ پاركى. ءبىز دە تەڭىز ۇستىندە گيدروتسيكل سوعىستىرساق تا ويانباعان كەيبىر كىلەتكالارىمىزدى وسى جەردە وياتۋعا تىرىستىق))).
Aquaventur Atlantis - پارسى شىعاناعىنداعى The Palm Jumeirah جاساندى ارالىندا ورنالاسقان. بۇل ويىن- ساۋىق ساياباعى تەك بىرىككەن اراب امىرلىكتەرىندە عانا ەمەس، تاياۋ شىعىستاعى ەڭ ءىرى پاركتەردىڭ ءبىرى. ول 17 گەكتار اۋماقتى قامتيدى ەكەن.
مۇندا ءبىر كۇن ۋاقىتىڭىزدى ەرەكشە كوڭىلدى، ءماندى وتكىزە الاسىز. ءوزىڭدى ەكسترەمالدى سپورت الەمىندە، ەرەكشە تولقىندارعا، شەكسىز قىزىقتى سۋ الەمىنە باتىراسىز. وزەن بويىندا رافتينگتى سارقىرامالار، سۋ سلايدتارىنان ءتۇسىپ، دەلفيندەرمەن بىرگە جۇزە الاسىز. پارىك ىشىندە بالالارعا ارنالعان ويىن الاڭدارى، ءدامحانالار، جاعاجاي ءبارى بار.
بۇل ارالعا قالادان مەترو ارقىلى كەلۋ ىڭعايلى. پارىككە كىرۋ قۇنى ەرەسەكتەر ءۇشىن 275 ديرحام، بالالارعا 225 ديرحام، 2 جاسقا دەيىنگى بالالار تەگىن (22-28 مىڭ تەڭگە اينالاسى).
الەمدەگى ەڭ بيىك عيمارات - بۋرج حاليفا!
الەمدەگى «ەڭ» دەردى توپتاستىرعان دۋبايدىڭ تاعى ءبىر كەرەمەتى - الەمدەگى ەڭ بيىك عيمارات - بۋرج حاليفا! كوك تىرەگەن بيىكتىگى 828 مەتر، جالپى 163 قاباتتى ءۇي.
كەشەنىندە قوناق ءۇي، پاتەر، كەڭسە جانە ساۋدا ورتالىقتارى بار. عيماراتتىڭ ءۇش جەكە كىرە بەرىسى بار: قوناق ءۇي، پاتەر جانە كەڭسەلەر. 43- جانە 76- قاباتتاردا گيمنازيالار، باسسەيندەر، دجاكۋزي بار قاراۋ الاڭدارى بار. 122 - قاباتتا 80 ورىندىق «اتموسفەرا» مەيرامحاناسى بار - ول الەمدەگى ەڭ بيىكتىكتە ورنالاسقان. تۋريستەرگە قالانى كورسەتۋ ءۇشىن 148- قاباتتا ارنايى اۋماق بار جانە 125 قاباتقا شىعىپ قالانى تاماشالاۋعا بولادى.
ءبىز مۇندا قىزمەت كورسەتۋشى لينا ەسىمدى قىزعىز قىزبەن تانىستىق، ونىڭ ايتۋىنشا، بۋرج حاليفانى كۇنىنە 3 مىڭنان استام ادام تاماشالايدى ەكەن. ءبىر ادامنىڭ كىرۋ اقىسى ءبىزدىڭ اقشامەن 20 مىڭ تەڭگەنىڭ مولشەرىندە، ءارى قاراي كۇندىك تابىسىن ساناي بەرىڭىز. وسىنداي دا ەسىڭە استاناداعى بايتەرەك ورالادى ەكەن. اتتەڭ ءبىزدىڭ استانادا دا ەلدىڭ تاڭعالدىرىپ كىرۋگە كەزەك كۇتىپ تۇراتىن ءبىر قۇرلىستىڭ بولعانىن ارماندايسىڭ.
ءشول دالاداعى سەرۋەن
دۋبايداعى، سونداي- اق اراب امىرلىگىنىڭ بارلىق جەرلەرىندە «ءشول دالاعا ساپار» نەمەسە دجيپ سافاري اتتى ويىن- ساۋىق ءتۇرى بار. ارينە دۋباي دەسە ءبارىمىزدىڭ كوز الدىمىزعا ارابتىڭ قۇمدى تاۋلارىنءارى- بەرى ويقاستاپ، بۇرقىراتىپ جۇرگەن جول تالعامايتىن كولىكتەر كەلەتىنى راس، ويتكەنى بىرىككەن اراب امىرلىگىنىڭ شولدەرى الەمنىڭ عاجايىپتارىنىڭ ءبىرى بولىپ سانالادى، سوندىقتان تۋريستەردىڭ بارلىعى قۇمدى دالانىڭ وزگەشە لاززاتىن سەزىنگىسى كەلەدى.
باعاسىنا قاراي نەشە ءتۇرلى تۋرلار بار. بىزدە ءبىر كۇندىك ساپاردى ءشول دالاعا ارنادىق. تاپسىرىس بەرگەن ۋاقىتىمىزدا Toyota Land Cruiser 200 كولىگى ءبىزدى قوناق ۇيدەن الىپ كەتتى. ىشكى جاقتاۋلارى بەرىك، اۋدارىلعان جاعدايدا قاۋىپسىزدىك ءۇشىن ارنايى جابدىقتالىپتى. قالادان ءبىر ساعاتتان استام ۋاقىت جۇرگەندە قۇمدى تاۋلارعا ىلىندىك. قۇمىعا جەتكەسىن جۇرگىزۋشىمىز ماشينا دوڭعالاقتارىنىڭ جەلىن ازايتىپ، بارىمزگە مىقتى وتىرۋدى، تەلەفون، فوتواپپارات سەكىلدى زاتتارعا اباي بولۋدى ەسكەرتتى. سوسىن، بىرگە بارعان بىرنەشە كولىك كەرۋەندەي ءتىزىلىپ، قۇمدى قىراتتارعا كىرىپ كەتتىك. ءورلى- قىرلى قۇمدى جوتالاردا نەشە ءتۇرلى «ونەر» كورسەتىپ جۇيتكىدى. بۇداندا بيىك تاۋلاردا ءجۇرىپ، شاتقالدار اراسىندا وسكەندىكتەن بە بىزگە قاتتى اسەر ەتە قويمادى. «اسفاليت جولدا كەلە جاتقانداي، ءۇنسىز وتىرسىڭدارعوي،قاتتى قورقىپ كەتپەسەڭ دەردە، كىشكەنە ايعايلاساڭدارشى. تۋريستەر شىڭعىرىپ، شۋلاعان سايىن، مۇنداعى شوفەرلەر شابىتتانا ايدايدى»،-دەيدى ەسبول. ونىڭ سوزىنەن كەيىن بىزدە وبىرازعا كىرىپ، ەرەكشە اسەرلەنگەندەي ايعايلاپ وتىردىق.
كۇن باتا، شەكسىز اسپان استىندا تۋريستەر ءۇشىن ارنايى كەشكى اس بەرىلدى. ءارى- قاراي تەاترلىق قويىلىمدار جانە مۋزىكامەن شوۋ- باعدارلامالارمەن جالعاستى. جالپى بۇل ورىن، قالانىڭ تىنىس- تىرشىلىگىنەن قاشىپ، دەمالىس ۋاقىتىن قۇمنىڭ ورتاسىندا تاڭعاجايىپ سەزىمدە وتكىزگىسى كەلەتىندەر ءۇشىن ەرەكشە ايماقتاردىڭ ءبىرى ەكەن. ءبىر قاراساڭ قازاقستاندا دا مۇنداي قۇمدى دالا جەتەرلىك، ارابتاردىڭ ءشول دالاداعى قۇمدى دا عاجايىپ مەكەنگە اينالدىرىپ، اقشا تاۋىپ وتىرعاندىعى ادامعا ۇلكەن وي سالادى.
مەن كورگەن دۋباي
جالپى بۇل رەتكى ساپارىمىز ەرەكشە قىزىقتى بولدى. مەنىڭ بايقاعانىم دۋباي شوپينگ قۇمار جاندار ءۇشىن دە ەرەكشە قالا. مۇندا ماشينانىڭ اۆتوبولشەكتەرىنەن باستاپ، التىن- كۇمىس، تون- ىشىككە دەيىن ءبارى بار. سونىمەن بىرگە قالا ءزاۋلىم عيماراتتارىمەن تاڭ قالدىرادى. اۋاسى، سۋى اعزاعا جاقسى جاعىمدى. ال، ءبىر وكىنىشتىسى ءوزىڭدى كەيدە دۋبايعا ەمەس، ءۇندىستاندا جۇرگەندەي سەزىنەسىڭ. اۋەجايدان تۇسكەننەن باستاپ، ۇندىستەر قاپتاپ جۇرەدى. كوپ جەردە قىزمەت كورسەتۋشىلەردىڭ ۇندىستەرمەن تايلانتتىقتار ەكەنىن بايقادىق، اراسىندا وزبەكتەر، قىزعىزداردى دا كوزىڭ شالادى. ال، دۋباي دەسە كوز الدىڭا كەلەتىن قىمبات كولىگىنە جولبارىسىن سالىپ الىپ جۇرەتىن ارابتاردى مۇندا كورە بەرمەيسىڭ. جالپى اق سالدەسىن ورانعان جەرگىلىكتى حالىقىق از كەزدەسەدى ەكەن. دەرەكتەرگە جۇگىنسەك، دۋبايدا جەرگىلىكتى ارابتار بارلىق حالىقتىڭ %10 عانا قۇرايدى. ولاردىڭ ءوزى كوبىنەسە دجۋمەيرا اۋدانىنداعى جابىق جەر ۇيلەر رەزيدەنتسيالارىندا تۇراقتايدى. ال حالىقتىڭ قالعان بولىگى: ءۇندىستاننان كەلگەن ارابتار، ۇندىلەر، پاكىستاندىقتار، بانگلادەشتىكتەر، فيليپپيندىكتەر، ت. ب.
ەسبول جاپان ۇلىنىڭ ايتۋىنشا، جەرلىك تۇرعىندار تەگىن ءبىلىم الادى، تەگىن ەمدەلەدى، بۇل ولار ءۇشىن عۇمىر بويى قامتاماسىز ەتىلگەن. دۋبايدا تۇگەلدەي ءبىر ستۋدەنتتەر قالاشىعى بار. وندا كەمبريدجدەن باستاپ، كوپتەگەن ا ق ش پەن انگليا ۋنيۆەرسيتەتتەرىنىڭ فيليالدارى جۇمىس جاسايدى. بالالارىن شەتكە شىعارعىسى كەلمەگەن باسشىلار، ۋنيۆەرسيتەتتەر مەن مىقتى شەتەل پروفەسسورلاردىڭ ءوزىن قالاعا اكەلۋدى ءجون كورىپتى. ال شەتەلدىكتەر ءۇشىن، وقۋ مەن ەمدەلۋدىڭ باعاسى تىم جوعارى كورىنەدى.
جالپى بۇل ەستەلىگىم، مەنىڭ «ەڭ» دەگەن ءسوزدى ەڭ كوپ قولدانعان جازبام بولدى. بۇل ارابتاردىڭ ەلدى تاڭعالدىرۋدا الدىنا جان سالمايتىن ەرەكشەلىگىنىڭ، بارلىق نارسە دە ءبىرىنشى بولۋعا ۇمتىلىپ تۇراتىن بەلسەندىلىكتەرىنىڭ بەلگىسى بولسا كەرەك. كەشەگى تۇيە ءمىنىپ ماڭ- ماڭ باسقان اراب دالاسىنداعى مامىراجاي ءومىر، بۇل كۇندە اسپانمەن تالاسقان عيماراتتار مەن ەڭسە تىكتەپ، ەرەكشە عاجايىپ رەكوردتار مەن الەمدى اۋزىنا قاراتىپ، فەرراريدىڭ جىلدامدىعىنداي قارقىنمەن العا تارتىپ بارادى. مىنە بۇل مەن كورگەن دۋباي.
اۆتور: ريزابەك نۇسىپبەك ۇلى