اۆراام لينكولننىڭ مۇعالىمگە جازعان حاتى

ا ق ش-دا قۇلداردى ازات ەتۋدىڭ ەڭ باستى سەبەپكەرى، سونىڭ ارقاسىندا حالقىنىڭ ۇلتتىق قاھارمانىنا اينالدى. 1865 -جىلى 14 -ءساۋىر ايىندا لينكولن تەاتردا اۋىر جارالانىپ، ا ق ش- نىڭ ولتىرىلگەن ءبىرىنشى پرەزيدەنتى بولدى. پرەزيدەنتتىك ۋاقىتىندا قاتال سىنعا ۇشىراعانىمەن، كوپشىلىك ماقۇلداعان كوزقاراستار مەن الەۋمەتتىك پىكىرگە سايكەس ول ءباز-باياعى قالپىندا امەريكانىڭ ماڭداي الدى جانە قالاۋلى پرەزيدەنتتەرىنىڭ ءبىرى بولىپ قالا بەردى.

اۆراام لينكولننىڭ ءتورت بالاسى بولعان، ۇشەۋى ەرتە جاستا قايتىس بولىپ كەتەدى (4، 11 جانە 18 جاستارىندا سۇزەك پەن تۋبەركۋلەز اۋرۋلارىنان). تەك ۇلكەن ۇلى روبەرت 82 ەكى جاسقا دەيىن عۇمىرلى ءومىر وتكىزىپ، قۇقىقتانۋ مەن ساياساتتا تاماشا مانساپ قۇرعان.

1855 -جىلى اۆراام لينكولن كوپشىلىك جۇرتقا تانىس «ۇلىنىڭ مۇعالىمىنە حاتىن» جازادى. بۇل حات بەس جاسار سۇيىكتى ۇلى ۋيليامنىڭ مۇعالىمىنە جازىلعان سياقتى، وكىنىشكە وراي ول 11 جاسىندا قايتىس بولىپ كەتەدى.

ۇلىنىڭ مۇعالىمىنە جازعان حاتىنان ءۇزىندى:

«...بارلىق ادامنىڭ تۋراشىل جانە ءادىل ەمەس ەكەندىگىننەن حاباردار بولاتىنىن جاقسى تۇسىنەمىن. ءبىراق، ءار قارا نيەتتى ارامعا قارسى ءبىر قاھارمان، ءار جەكە باسىن ويلاعان ساياساتكەرگە قارسى ءوزىن قۇربان ەتەتىن ءبىر كوشباسشىنىڭ تابىلاتىنىن دا وعان ۇيرەتىڭىز.

ءار دۇشپانعا قارسى ءبىر دوستىڭ دا بار ەكەنىن ۇيرەتىڭىز. ۋاقىت تالاپ ەتەتىنىن بىلەمىن، ءبىراق ەگەر مۇمكىن بولسا، تاۋىپ العان بەس دوللاردان ءوز ەڭبەگىمەن تاپقان ءبىر دوللاردىڭ قۇنى جوعارى ەكەندىگىن دە ۇيرەتىڭىز. جەڭىلە ءبىلۋدى دە، جەڭىسكە جەتكەندە قۋانۋدى دا ۇيرەتىڭىز.

قولىڭىزدان كەلسە كورە الماۋشىلىقتان الىستاتىپ، داۋىسىن قاتتى شىعارماي كۇلۋدى دە ۇيرەتىڭىز. سوتقار مەن ماقتانشاقتاردى جەڭۋ بارىنەن وڭاي ءىس ەكەنىن ەرتە تۇسىنۋىنە مۇمكىندىك بەرىڭىز. ەگەر مۇمكىن بولسا، كىتاپقا قىزىعۋشىلىعىن دا ارتتىرىڭىز.

كوكتەگى قۇستار مەن ىزىلداعان ارالارعا، جاپ-جاسىل باۋرايداعى گۇلدەرگە قاراپ ءومىردىڭ سىرى مەن ءمانىن ويلاۋ ءۇشىن بوس ۋاقىتتى دا بەرىڭىز.

قۋلىق جاساۋدان گورى ساتسىزدىككە ۇشىراۋ ابىرويلىراق ەكەنىن ۇيرەتىڭىز. وعان ءوز ويىنا سەنە ءبىلۋدى ۇيرەتىڭىز، وزگەلەر مۇنى قاتە دەسە دە... جۇمساق ادامدارمەن جۇمساق، قاتالدارمەن قاتال بولۋدى ۇيرەتىڭىز.

بارلىعى جەڭىمپاز جاعىنا بەت بۇرىپ جاتقاندا، كوپشىلىكتىڭ ارتىنان ەرىپ كەتپەيتىندەي قۋات بەرىڭىز... بارلىق ادامدى تىڭداي ءبىلۋىن، ءبىراق بارلىق تىڭداعاندارىن شىندىقتىڭ سۇزبەگىنەن وتكىزىپ، تەك دۇرىس بولعاندارىن الۋىن ۇيرەتىڭىز.

ەگەر قولىڭىزدان كەلسە، مۇڭلى كەزدە دە كۇلىمدەي الۋدى ۇيرەتىڭىز. كوزدەن جاس شىعارۋدىڭ ايىپ ەمەستىگىن دە ءتۇسىندىرىڭىز. شەكتەن شىققان ارسىزداردىڭ ۇستىنەن كۇلە ءبىلۋدى، ولەردەي سىپايى بولۋدان دا ساقتانۋدى ۇيرەتىڭىز.

ءوزىنىڭ اقىلى مەن كۇشىن ەڭ قىمبات باعاعا ساتا ءبىلۋىن ۇيرەتىڭىز، ءبىراق ەشبىر ۋاقىتتا جۇرەگىمەن، جانىمەن ساۋدالاسپاسىن.

ۇلىعان توبىردى تىڭداماۋدى، ءبىراق ءوزىن شىندىق تاراپىندا ەكەنىن سەزىنسە، تىك تۇرىپ كۇرەسۋگە دايىن بولۋدى دا ۇيرەتىڭىز.

ونىمەن جۇمساق بولىڭىز، ءبىراق تىم نازىكتىكتىڭ قاجەتى جوق، ويتكەنى بولاتتىڭ ساپاسىن وت قانا كوتەرەدى. بارشا جاماندىققا كونبەۋ ءۇشىن باتىل بولۋدى ۇيرەتىڭىز. باتىل بولا الۋ ءۇشىن سابىرلى بولۋدى ۇيرەتىڭىز. وزىنە دەگەن سەنىمى تەرەڭ بولۋىن ۇيرەتىڭىز، سونىڭ ارقاسىندا ادامدارعا دەگەن سەنىمى دە تەرەڭ بولادى. بۇل ايتقاندارىم ۇلكەن ءوتىنىش، ەگەر مۇمكىن بولسا، قولىڭىزدان كەلگەنشە ورىنداساڭىز...»