پاۆلودارلىق كوندۋكتورلارعا ءتىل تۋرالى زاڭ تالاپتارى ءتۇسىندىرىلدى
بۇل تۋرالى وبلىستىق تىلدەردى دامىتۋ باسقارماسى مونيتورينگ جانە تالداۋ ءبولىمىنىڭ مامانى سامات قۇشماعۇلوۆ ءمالىم ەتتى.
«بيىلعى جىلى تۇرعىندار تاراپىنان كوندۋكتورلاردىڭ مەملەكەتتىك تىلدە قىزمەت كورسەتپەۋىنە قاتىستى بىرنەشە شاعىم تۇسكەن بولاتىن. وسىعان بايلانىستى تۇرعىن ءۇي-كوممۋنالدىق شارۋاشىلىعى، جولاۋشىلار كولىگى جانە اۆتوموبيل جولدارى بولىمىمەن قىزمەتتىك تەرگەۋ جۇرگىزىلىپ، ەسكەرتۋ نەمەسە اكىمشىلىك جاۋاپكەرشىلىككە تارتۋ تۇرىندە شارا قولدانىلدى. بۇل جولى قالالىق اۆتوبۋس پاركى مەن ترامۆاي باسقارماسىنىڭ 30 كوندۋكتورىنىڭ باسىن قوسىپ، ءتۇسىندىرۋ جۇمىستارى جۇرگىزىلدى. وڭىرلىك ىشكى ساياسات باسقارماسى باسشىسىنىڭ ورىنباسارى سۆەتلانا گلادىشەۆا قاتىسىپ، ۇلتارالىق سىيلاستىق پەن تاتۋلىقتى ساقتاۋ تۋرالى ايتىپ ءوتتى»، - دەيدى سامات قۇشماعۇلوۆ.
كەزدەسۋ بارىسىندا ق ر «قازاقستان رەسپۋبليكاسىنداعى ءتىل تۋرالى» زاڭ تالاپتارىنىڭ ساقتالۋى جانە قوعامدىق كولىكتەردەگى كورنەكى اقپاراتتاردىڭ ساۋاتتى ورنالاسۋى، حالىققا قىزمەت كورسەتۋ ۇردىسىندە مەملەكەتتىك ءتىلدى قولدانۋدىڭ مارتەبەسىن اسىرۋ، ساپالى قىزمەت كورسەتۋ ماسەلەلەرى تالقىلاندى. سونداي-اق، بارلىق قاتىسۋشىلارعا سوزدىكتەر مەن باسقا دا وقۋ- ادىستەمەلىك قۇرالدار تابىس ەتىلدى.