حاليفا التايدىڭ جارى: گيمالاي اسۋىنداعى تار جول قيامەتتىڭ قىل كوپىرى سياقتى سەزىلدى

None
None
نۇر- سۇلتان. قازاقپارات - حاليفا التاي... وسى ەسىمدى قاي قازاق بىلمەيدى دەيسىز، بارلىعىنا تانىس، وتە جاقىن ءارى ىستىق ەسىم. ءسىز بەن بىزگە العاش قۇران كارىمنىڭ قازاقشا اۋدارماسىن ۇسىنعان عۇلاما عالىمنىڭ اسىل جارى - ءبيباتىش ءجۇنىس قىزىن ارنايى ىزدەپ بارىپ، سۇحباتتاسقان ەدىك ...

«ولگەنىمىز جوق، ولگەننەن باسقانىڭ ءبارىن دە كوردىك...»


- حاليفا التاي اتامىز جوق بولسا دا ارتىندا قالعان ءسىز بارسىز. التايدان اۋعان كوشتىڭ تاۋقىمەتىن بىلەمىز. كىتاپتاردان وقىدىق. كوشتىڭ ماقساتى قانداي ەدى؟
- حالقىمىزدىڭ تاريحىندا قيلى- قيلى زاماندار ءوتتى. سونىڭ ءبىرى جيىرماسىنشى عاسىر ورتاسىنداعى قىتايداعى قازاقتاردىڭ جەر- سۋىن تاستاپ، بەلگىسىز باعىتقا ۇدەرە كوشۋى. مۇنىڭ بارلىعىن ايتىپ، ەسكە ءتۇسىرۋ وڭاي ەمەس. مالمەن بىرگە شۇبىرىپ ءبىز دە كوشىپ- قونىپ ءجۇرىپ، سوعىستىق، امان قالدىق. وسى قاتەرلى دە ازاپتى كوش تۋرالى بۇگىندە بىرنەشە كىتاپ جازىلدى. سونىڭ ءبىرى مىنە، ءوزىڭ وقىپ كەلگەن «التايدان اۋعان ەل» بولاتىن. سوڭىندا قاشتىق، شەتكە شىقتىق. كوپتەگەن قيىندىقتار كوردىك. جول ۇزاق، قىس، قار. ول كەزدە مەنىڭ جاس كۇنىم. التايدان اۋعان كوش ءتورت بولىكتەن تۇردى. كوش بارىسىندا ەلگە قادىرلى ادامدار تۇتقىندالدى. ولار تار جول تايعاق كەشۋلەردە جول تاۋىپ، حالىققا مەدەۋ بولا بىلەتىن قادىرلى ادامدار ەدى. ءارى اۋقاتتى، ەل باسشىسى بولۋدان باسقا كىنالارى دا جوق.

ول كەزدە حالىقتىڭ قادىرلىسىمەن ساناسىپ جاتقان كىم بار، ولاردى ۇستاعان بەتتە- اق تۇرمەگە جونەلتتى. بۇل جايدى ولاردىڭ وتباسىنا دا سەزدىرمەيدى. قالا تۇرمەسىندە ازاپتاپ، قيناپ، ءتۇرلى زوبالاڭدى باستارىنان كەشىرەدى. ال، ۇستالعان ادامداردىڭ ۇشتى- كۇيلى حابارسىز كەتۋى حالىقتى الاڭداتىپ، ۇرەي قۇشاعىنا سۇڭگىتتى. حالىق بەيعام كۇلكى، تىنىش ۇيقىدان ايرىلدى. اينالايىن، ءبىزدىڭ حالىقتىڭ باسىنان نە وتپەدى دەيسىڭ. كوڭىلدى بيلەگەن كۇدىك ادامداردى ۇيىنەن بەزدىرۋگە دەيىن اپاردى. «قيلى- قيلى زامان بولار، قاراعاي باسىن شورتان شالار» دەگەن وسى بولدى. ءبىزدىڭ كەلەسى باعىتىمىز ءۇندىستان ەدى... (كوزىنە جاس الدى)

- اپا، وسى كوشتى ءۇندىستاندا قالاي قارسى الدى؟ ول كەزدە قاسىڭىزدا حاليفا اتا بولعان شىعار؟
- شىڭحايدان شىققاندا بەس مىڭ ادام ەدىك. شامامەن 1000 ءۇي، 3039 ادام، 1500 قارۋ، 2000 تۇيە، 5000 جىلقى، 1000 سيىر، 8000 قوي وتكىزىلدى. وسىلايشا ءۇندىستان توپىراعىنا كىردىك. كوپ شارشاعاندىقتان، دەمالۋعا مۇقتاج ەدىك. كوپ جىلدار بويى ارىپ- اشىپ كوشىپ، تۇپكىلىكتى مەكەن بولارلىق جەر ىزدەگەن ماقساتىمىز ورىندالعان سياقتى. قورقىنىش سەيىلدى. ءبىراق، ءىس مۇنىمەن بىتكەن جوق. ءۇندىستانعا كىرىسىمەن بوسقىنداردى باسقارۋ ۇيىمىن قۇرۋ كەرەك بولدى. ۇيىمنىڭ باسقارماسى 19 ادامنان تۇردى. وسى 19 ادامنىڭ ىشىنەن قازىر قوجان ساكەي ۇلى دەگەن اقساقال عانا ءتىرى.

ءبىزدى ءۇندىستان اسكەرى كاشمير وبلىسىنىڭ لاداح ايماعىنا الىپ كەلدى. ودان ءارى كارگىل شاھارىنان ءوتىپ، گيمالاي تاۋىنىڭ الەمگە ايگىلى زۇلجيلا اسۋىنان استىق. زۇلجيلا - وتە قيىن اسۋ. تاۋدىڭ بەتىن قاشاپ سالعان جالعىز اياق قيا جول بار. استىمىز شىڭىراۋ زىندان سياقتى. تومەن قاراساڭ باسىڭ اينالىپ، كوزىڭ بۇلدىرايدى. وسى اسۋ بەتىندەگى تار جول قيامەتتىڭ قىل كوپىرى سياقتى. جازاتايىم اياعىڭ تايىپ كەتسە، وندا تىرشىلىكتەن كۇدەرىڭدى ۇزە بەر. تومەندەگى تۇڭعيىق شىڭىراۋ جۇتىپ قويادى. ءبىزدى وسى اسۋ ارقىلى الىپ جۇرەدى. ۇباپ- شۇباپ اقىرىن ءىلبىپ كەلەمىز. يمانىمىزدى ايتىپ، ءبىر اللاعا سىيىنعاننان باسقا قولىمىزدان كەلەرى جوق. ولگەنىمىز جوق، ولگەننەن باسقانىڭ ءبارىن دە كورىپ كەلەمىز. ادام ءيت جاندى دەگەن وسى ەكەن ...

كوشتىڭ كەيىنگى توپتارى وسى اسۋدا قارلى بورانعا ۇشىراپ، مالدارىنان ايىرىلىپ، جاندارىن زورعا قۇتقاردى. كاشمير ءۇندىستاننىڭ جەكە ايماعى ەكەن. قالاعا كەلگەندە نان كوزىمىزگە وتتاي باسىلدى. ءبىراق، اقشا قۇرعىر بىزدە قايدان بولسىن. نان جەمەگەلى ءبىر جىلدان اسقاندىقتان، نانعا اڭسارىمىز اۋا بەردى. اقىرى ءبىر نانعا ءبىر قويدان بەردىك تە نان الىپ جەدىك. ينە- ءجىپ، سابىن سەكىلدى ۇساق- تۇيەك زاتتارعا دا قوي بەرىپ، ساۋدا- ساتتىق جاساعان بولدىق. حالقىنىڭ كوپشىلىگى مۇسىلماندار. ءتۇس- تۇستەرى دە، كيىم- كەشەك، ادەت- عۇرىپتارى دا ۇقسامايتىن جات ەل، جات جەردەمىز. ءۇش جىل وسىندا تۇراقتادىق. مەن حاليفامەن ءۇندىستان ساپارىنان كەيىن تانىستىم...

- ءسىز حاليفا التايعا قالاي تۇرمىسقا شىقتىڭىز؟
- ءبىز ءۇندىستاننىڭ دا تۇپكىلىكتى تۇرعىنى بولماي، وتانسىز بوسقىن ەل رەتىندە تۇرىپ جاتتىق. ءبىراق، ساعىنىشپەن سارعايا ءجۇرىپ، ويىمىز ونعا بولىنەتىن. كوز الدىمىزعا الىستاعى اتاجۇرت كەلەتىن. بىزگە بۇل جەردىڭ دە تۇپكىلىكتى مەكەن بولمايتىنىن ءىشىمىز سەزەتىن ەدى. ءبىر جاقسىسى، سەن قايدان كەلدىڭ، قايدا باراسىڭ، ونىمەن ەشكىمنىڭ جۇمىسى جوق. اركىم ءوزىنىڭ شارۋاسىن بىلەدى. ءبىر جامانى، سول اتاجۇرتتان الىستاپ كەتتىك. وسىنداي الما- كەزەك شارپىسقان ەكى ۇداي سەزىمنىڭ قۇشاعىندا تۇرىپ جاتتىق ... مەن ول كەزدە جاس ەدىم، بار بولعانى جيىرما ءۇش جاستاعى قىز ەدىم. ول كەزدە قاجىم (ءبيباتىش اپا حاليفا التايدى وسىلاي اتايدى ەكەن) پاكىستان جاقتان كەلگەن. ولار التايدان ءبىرىنشى كوشپەن كەتكەن ەدى. تۇركياعا ءبىز ءۇندىستاننان 18 وتباسى بولىپ كوشىپ كەلدىك. ەل- ەلگە قوسىلىپ، مارە- سارە بولىپ قالدىق. ولار پاكىستاننان كەلىپ جاتىر ەكەن، ءۇش بالاسى بار ەكەن، اعاسى، ءىنىسى بار. ول كەزدە مەنىڭ قاسىمدا اعام حامزا بار. قاجىمنىڭ ايەلى پاكىستاندا قايتىس بولىپ كەتىپتى. ول كىسى سودان كەيىن نەكە قۇرمايمىن دەگەن ەكەن. ءبىراق قاسىنداعى جاقىندارى: «سەن ۇيلەنبەگەندى قوي، حامزانىڭ قارىنداسى بار، سەنى سوعان ايتتىرايىق»» دەپتى. ءبىزدىڭ بۇل تانىستىعىمىزدىڭ سوڭى جاراستىققا ۇلاسىپ، مەن ونىڭ بالالارىنىڭ اناسى اتاندىم. ەكى ۇل (ابدۇرراحيم، ادنان)، ءۇش قىز (شاكۋرا، ماشكۋرا، ايتەن) تاربيەلەدىك.

«قۇراندى جاڭىلىس جازباسىن دەپ تىكەمنەن تىك تۇردىم ...»

- حاليفا التاي قۇران كارىمدى اۋدارۋعا كىرىسە باستاعاندا ءسىزدى دەمەۋ بولدى دەگەن ءسوزدى كوپ ەستيمىز. ول كەز بارلىعى ءۇشىن جاپپاي قيىن كەزەڭ بولدى. سول قيىندىقتان قالاي ءوتتىڭىز؟
- ول جاقتا وكىمەت بىزگە تەگىن ءۇي بەردى. مانيسا دەگەن قالادا تۇردىق. التى اي بويى تەگىن تاماق بەرىلدى. وكىمەت 5 جىلعا دەيىن سالىق سالمادى. قاجىم ءارتۇرلى كاسىپپەن اينالىسىپ جۇرگەندە، كەلەر جىلدىڭ كۇزىندە ءبىر ادام جاماپ، بوياپ بەرەرسىڭ دەپ تەرى تون بەرىپتى. سونى ۇيگە الىپ كەلىپ سوگىپ، ۇلگىسىن شىعارىپ، تون تىگىپ ۇيرەنە باستادى. كەيىن ونى ءبىز دە ۇيرەندىك. قازىرگە دەيىن ول قالادا تەرى كيىم تىگۋدى كاسىپ قىلىپ وتىرعاندار بار. قاجىم 1984 -جىلى قۇران كارىمدى اۋدارۋعا كىرىستى. حاليفا التايدى الىس- جاقىن ەلدەردەن ىزدەپ كەلۋشىلەر كوپ ەدى. ۇيدەن قوناق ارىلمايتىن. ءبىز كەيىن وسى كاسىپتى قولعا الدىق. مالاقاي، قولعاپ، تون تىگە باستادىق. ونى بازارعا اپارىپ ساتا باستادىق. تىكپەگەن نارسەمىز قالمادى. اقىسىنا ۇيگە ازىق- تۇلىك الىپ قايتاتىنبىز. قاجىم قۇراندى ءتورت جارىم جىل دەگەندە اۋدارىپ ءبىتتى. ول كەز 1988 -جىلدىڭ اياعى بولاتىن. سول جىلداردىڭ ىشىندە حاليفا بىرنارسەنى جاڭىلىس جازىپ الماسىن دەپ تىكەمنەن تىك تۇردىم. كەلگەن ادامدارعا كەلىنىم ەكەۋمىز جۇگىرىپ ءجۇرىپ، اس- سۋىن دايىندايتىنبىز.


- تۇركيانىڭ قازاقتارى سىزدەردى قالاي قارسى الدى؟
- وسى جەردە تۇراقتادىق، ءوسىپ، وندىك. ەڭ باستىسى، جاۋدان قۇتىلدىق. سول جەردە ون بەس جىل ءومىر سۇردىك. سول جىلدارى حاليفا قازاقستانعا ءبىر بارىپ كەلگەن. سول كەزدەگى ساپارىندا ول: «مەن قازاقستانعا بارامىن. ءتىلى، ءدىنى قۇرىپ بارادى ەكەن. سول جەرگە بارىپ، بىلگەنىمدى ۇيرەتپەسەم، ماعان كۇنا بولادى» دەپ كوشۋگە قامدانا باستادى. قازاق ەلىنىڭ تاۋەلسىزدىك العانىن ءبىز سول جاقتا ءجۇرىپ راديودان ەستىدىك. «بۇگىن قازاق ەلى تاۋەلسىزدىك الدى، جەر بەتىندە قازاقستان دەگەن دەربەس مەملەكەت پايدا بولدى!» دەپ تۇرىك تىلىندە ساڭقىلداپ جاتقان داۋىستى ەستىدىك. ەستىدىك دە، ەگىلىپ جىلادىق. سول كەزدەگى حاليفانىڭ قۋانعانىن كورسەڭ عوي، سول تۇرعان جەرىندە قۇبىلانى تاۋىپ الىپ، ساجدە ەتتى. جاراتقان يەدەن: « ءيا، اللام، قازاق دەگەن حالىققا اقىرى ەركىندىك كەلدى- اۋ، ابىروي بەردىڭ- اۋ! ايبارلى مەملەكەت قىلا گور! عۇمىرلى قىلا گور!» دەپ دۇعا تىلەدى.

«ەكى جىلداي ۇيدەن تاماقتانعان جوقپىز...»


- ەڭ العاش قازاقستانعا كەلگەندەگى اسەرىڭىز قانداي بولدى؟
- قازاقستان تاۋەلسىزدىك العاننان كەيىن حاليفا التاي ەلباسى نۇرسۇلتان نازاربايەۆتىڭ تىكەلەي قولداۋىمەن اتاجۇرتقا قونىس اۋداردى. ءدىن قايراتكەرى رەتىندە ونىڭ 1991 -جىلى اۋدارعان «قۇران كارىمنىڭ قازاقشا ماعىناسى مەن تۇسىنىگى» فاحد باسپاحاناسىندا باسىلىپ، 800 مىڭ دانامەن تاراتىلدى. سونداي- اق دۇنيە ءجۇزى قازاقتارى قاۋىمداستىعىنىڭ جانىنان قۇرىلعان «ينابات» يماندىلىق تاربيە ورتالىعىنىڭ ءتوراعاسى بولۋدان بولەك، يسلام ءدىنىن ۋاعىزداپ، ءدىني كىتاپتار اۋدارىپ، تاراتۋعا ەڭبەك ءسىڭىردى. 1995-2000 -جىلدارى قازاق راديوسىنان ءار جۇما سايىن يسلام دىنىنە بايلانىستى ارنايى حابار جۇرگىزدى. ءبىز قازاقستانعا كەلگەن جىلى ەكى جىل ۇيدەن تاماقتانعان جوقپىز. سەبەبى، حاليفانى تانيتىن جۇرت، قۇرمەتتەيتىن جۇرت ءبىزدى كۇندە قوناق قىلاتىن. قازاقستاننىڭ تۇكپىر- تۇكپىرىنە شاقىراتىن. بىزگە كورسەتكەن قۇرمەتى مەن كومەگى ءۇشىن ەلگە قارىزدارمىن.. .

- ءسىز ءدىني ساۋاتتى كىمنەن ۇيرەندىڭىز؟
- مەنىڭ اكەم ءجۇنىس قاجى دەگەن ءدىندار ادام بولعان. ءبىز ۇيدە ءۇش قىز بولىپ وستىك. بارلىعىمىزعا اكەمىز ناماز وقىتتى. دارەتسىز ادام ءبىزدىڭ ۇيگە كىرمەيتىن. سونداي اكەمنەن ءدىندى دە، تاربيەنى دە ۇيرەندىم. كەيىن قاجىعا تۇرمىسقا شىققان سوڭ قالعان ءدىني ساۋاتىمدى اشۋعا سول كىسى ۇستاز بولا ءبىلدى. مەن نامازدى بالا كۇنىمنەن بەرى وقىپ كەلەمىن، اللاعا شۇكىر.


قيىن كەزەڭدە بالالارىڭىزدى قالاي تاربيەلەي الدىڭىز؟


- جوقشىلىققا قاراماي بالالارىمىزدى وقىتا بىلدىك. ءدىني ساۋاتىن دا قاداعالادىق. ءوزىمىز كوشىپ- قونىپ، ارىپ- اشىپ جۇرسەك تە، بالالارىمىزعا دۇرىس تاربيە بەرۋگە تىرىستىق. بولاشاقتا ءبىز سەكىلدى ەل كەزىپ جۇرمەسە ەكەن دەپ ويلادىق. اللاعا شۇكىر، مىنە، سول ارمانىمىز ورىندالدى... بارلىعى سەگىز بالا تاربيەلەپ وسىردىك. ۇلكەن بالام وتباسىمەن نورۆەگيادا تۇراتىن، سول جەردە قايتىس بولدى. ودان كەيىنگى ۇلىم قازىر وتباسىمەن فرانسيا قالاسىندا تۇرادى. ەكى ۇلىم وسى جەردە، الماتىدا تۇرادى. اللاعا شۇكىر، نەمەرەلەرىم مەن شوبەرەلەرىم بار...

«حاليفانىڭ سوڭعى ارمانى ورىندالدى...»

- حاليفا اتانىڭ سىزگە ايتىپ كەتكەن ارمان- تىلەگى بار ما ەدى؟
- «ەگەر مەن ولاي- بۇلاي بولىپ كەتسەم مەنى قايتادان تۇركياعا سۇيرەمەڭدەر دەگەن. مەن ءوز وتانىم قازاقستانعا كەلدىم. ءتىلدى تارقاتتىم، ءدىندى قال- قادەرىمشە ناسيحاتتادىم. ەندى مەنىڭ ارمانىم جوق. سوڭعى ايتارىم، مەنى قايتىس بولعاندا قازاق توپىراعىنا كومىڭدەر» دەگەن ەدى. ونىڭ سول ارمانى دا ورىندالدى. ول كىسىنى باعىپ- قاعىپ قاسىندا بولدىم. تىكەمنەن تىك تۇردىم. مەن ول كىسىنى قاتتى قۇرمەتتەدىم. جازۋ جازعان وڭاي ەمەس. ول كىسى كەيىن ناۋقاستانىپ جاتىپ قالدى. مەن قاي كەزدە دە ونىڭ قاسىنان تابىلا ءبىلدىم...

- ءسىزدىڭ ىشتە قالعان، ايتا الماي جۇرگەن ارمانىڭىز بار ما؟
- وسى كەزگە دەيىن اللانىڭ قالاۋىمەن ءتورت رەت قاجىلىققا بارىپ كەلدىم. ءتورت قىزىمدى ءوز قولىمنان ۇزاتتىم، ءتورت ۇلىمدى وتباسىلى ەتتىك. ەڭ باستىسى، كىندىك قانىمىز تامعان وتانىمىزعا تابانىمىز ءتيدى. مىنا ءۇش بولمەلى ءۇيدى دە بىزگە وكىمەت بەردى. جاقسى قۇرمەتتەدى، ەرەكشە ىقىلاسقا بولەندىك. حاليفا التايدىڭ كىم ەكەنىن قازاق ەلى ءبىلدى. قانشا دەگەنمەن قازاق حالقى قازىر وقىعان، كوزى اشىق. وقىعان ادام وقىعان ادامدى بىردەن تانيدى، بىلەدى. مىنە، قازىر جاسىم سەكسەن التىعا كەلدى. مەنىڭ ەشقانداي ارمانىم جوق...


- سۇحبات بارىسىندا اڭعارعانىم، ءسىز حاليفا اتانىڭ ەسىمىن اتامايدى ەكەنسىز...

- ءيا، مەن ول كىسىنى «مولدا»، «قاجىم» دەپ اتايتىنمىن. بۇل وعان دەگەن قۇرمەتىم مەن سىيلاستىعىم ەدى. بالا- شاعانىڭ اتىن اتاعانداي ول كىسىنىڭ ەسىمىن اتاي المادىم. ول كىسى مەنى «ءباتىشىم» دەپ ەركەلەتىپ ايتاتىن. ءبىز ەلۋ جىل ءبىر شاڭىراقتىڭ ءتۇتىنىن تۇتەتتىك. ارامىزدا ءبىر رەت تە ىدىس- اياق سىلدىرى ەستىلگەن ەمەس. ەلۋ جىل ەلۋ ساعاتتاي بولعان جوق. قانشا قيىنشىلىق، جوقشىلىق بولسا دا، تاعدىردىڭ تاۋقىمەتىن بىرگە تارتتىق.


- حاليفا التايدىڭ جاريالانباي قالعان باسقا دا قولجازبالارى بار ما؟
- قاجىم كوزى تىرىسىندە ءومىرىنىڭ سوڭعى كەزەڭىندە ءبىرجولا شىعارماشىلىق جۇمىستارمەن اينالىستى. «سياري ءنابي» (پايعامبارىمىزدىڭ (س. ع. س) ءومىربايانى) ەڭبەگىن شىعارىپ، 1911 -جىلى قازان قالاسىندا «ەل- يتقان» دەگەن اتپەن تاتار تىلىندە شىققان كىتاپتى قايتا قاراپ، قالىپقا كەلتىرىپ باستىردى. اۋدارما سالاسىندا ءدىني، يماني كىتاپتاردىڭ قازاق وقىرماندارىنا جەتۋىنە سەپتەستى. « ءبىر جىلدىڭ 48 جۇماسى مەن ەكى مەيرام قۇتپاسى»، «قىسقاشا يسلام تاريحى» اتتى كىتاپتى قازاقشاعا اۋدارىپ شىقتى. «عيباداتۋل يسلام»، «قۇران الىپپەسى جانە يمامنىڭ شارتتارى»، «يمانشارت»، «عىلىمحال» (ءدىني قاعيدالار)، «تاڭداۋلى حاديستەر» سەكىلدى ءزارۋ تاقىرىپتاردا 11 ءدىني كىتاپ جازىپ شىعاردى. ۇيدە ونىڭ باسقا دا جاريالانباي قالعان قولجازبالارى بار. كەلەر جىلى اللا قالاسا، حاليفا التايدىڭ 100 جىلدىق مەرەيتويى. سوعان قارسى قالعان جازبالارىن باسپاعا دايىنداپ جاتىرمىز. مىناۋ قاجىمنىڭ جازعان سوڭعى جازباسى. ول بۇل جازبانى ناۋقاستانىپ جۇرگەندە 2002 -جىلى جازعان ەدى.

مۇنىڭ قازاقشا اۋدارماسى بىلاي:

«مەن مۇسىلمان وتباسىنداتۋىلعانىم ءۇشىن شۇكىر ەتەمىن. اللاعا شۇكىر، مۇسىلمانمىن. اكەم قۇران وقيتىن، ءدىني ساۋاتتى كىسى ەدى. مەن العاش ءدىني ساباقتى اكەمنەن الدىم. كەيىن اۋىل مولداسىنان ءبىلىمىمدى جەتىلدىرىپ، ءدىني تاربيەلەندىم. ءدىني تاربيەلەنگەندىكتەن، تەمەكى تارتپادىم، اراق ىشپەدىم، قۇمار وينامادىم، ۇرلىق قىلىپ، وتىرىك ايتپادىم. مەن ءوزىمدى باقىتتى اداممىن دەپ ەسەپتەيمىن. ون ءبىر جاسىمنان ناماز باستاپ، سودان بەرى ناماز وقىپ كەلە جاتىرمىن. اللا قابىل ەتسىن!»
حاليفا التاي، 2002 -جىل.

- اڭگىمەڭىزگە راقمەت، ءبيباتىش اپا! ءسىز سەكىلدى ىزگى انالارىمىزدىڭ بىزگە ايتار ونەگەسى تاۋسىلماسىن! اللا سىزگە ۇزاق ءومىر ءناسىپ ەتسىن!
- مەنى قادىرلەپ كەلگەندەرىڭە راقمەت، اللا ءاردايىم قولداۋشىلارىڭ بولسىن! حاليفا كەتسە دە، وشاعىندا وتى بار عوي دەپ كەلگەندەرىڭە اللا رازى بولسىن، اينالايىندارىم!
P/S: ءيا، حاليفاداي الىپ ادامنىڭ ارتىندا وسىنداي ارى تازا، جانى تازا قازاق ايەلى بار ەكەنىن ءبىلىپ، وي ءتۇيىپ قايتتىق. حالقىنا قادىرلى، ەلىنە شاپاعاتشىل بولعان قاريا - قازاق ەلىندەگى يسلام ءدىنىنىڭ تارالۋىنا باعا جەتپەس ەڭبەك سىڭىرگەن حاليفا التاي ەسىمى ەشقاشان ۇمىتىلمايدى. ءيا، ول ءوزى ايتىپ كەتكەندەي شىنىمەن ەڭ باقىتتى ادام! كەلەر ۇرپاققا ولمەس ءسوز، ساۋاپتى ءىز قالدىرعان «تۇرىك الەمىنىڭ عۇلاماسىن» اللا راقىمىنا العاي!

سۇحباتتاسقان:
سالتانات قوجا

2016 - جىل

asylarna.kz


سوڭعى جاڭالىقتار