اتاقتىلاردى تانىمايتىن «تاپ-تازا» جىگىت

None
None
نۇر- سۇلتان. قازاقپارات - بۇل سەكسەنىنشى جىلداردىڭ باسىندا بولعان وقيعا. اقىن عافۋ قايىربەكوۆ اعامىزدى اۋىلى جاقتان ءبىر ءىنىسى ارنايى ىزدەپ كەلەدى. ءوزى كەڭشاردىڭ دىرداي ديرەكتورى. اقكوڭىل اعامىز ءىنىسىن ەرتىپ دەرەۋ «الماتى» قوناق ۇيىنە تارتادى.

«الماتى» قوناق ءۇيىنىڭ سول كەزدەگى ديرەكتورى، رەيحستاگقا تۇڭعىش تۋ تىككەن باتىر - راقىمجان قوشقاربايەۆ. عافاڭنىڭ ءسوزىن باتىر اعاسى جەرگە تاستاي ما، قوناق ءۇيدىڭ ەڭ جاقسى «نومىرىنە» الگى جىگىتتى ورنالاستىرادى.

اعالارىنىڭ مۇنداي سىي- قۇرمەتىنە ءدان ريزا بولعان اۋىلدىق ازامات كەشكىسىن مەيرامحانادا ارنايى داستارحان جايادى. ەلدەن كەلگەن دامنەن اۋىز ءتيسىن دەگەن نيەتپەن عافاڭ جانى قالماي ەڭ جاقىن دوستارىن شاقىرادى. سىر-اعاڭ (س. ماۋلەنوۆ)، كاۋكەن كەنجەتايەۆ، اقسەلەۋ سەيدىمبەك، جانىبەك كارمەنوۆ سىندى كوپتەگەن اقىن- جازۋشى، ونەر يەلەرى جينالا قالادى. داستارحانعا راحاڭنىڭ ءوزى دە كەلەدى.


عافاڭ ادەتىنشە دوستارىن جاعالاي تانىستىرا باستايدى عوي. ماسقارا قىلعاندا، الگى سوۆحوزدىڭ دىرداي ديرەكتورى وسىندا جينالعان ايگىلى ازاماتتاردىڭ بىرەۋىن تانىمايدى ەكەن. ەشقانداي كىتاپتىڭ بەتىن اشپاعان، وقىماعان، ادەبيەت پەن تاريحتان بەيحابار، شارۋاشىلىقتان باسقا تىرلىكتى بىلمەيتىن ءىنىسىنىڭ رەيحستاگقا تۋ تىككەن ر. قوشقاربايەۆتى قوناق ءۇيدىڭ ديرەكتورى رەتىندە عانا، باسقالارىن اعاسىنىڭ «بوتەلكەلەسى» رەتىندە عانا تانىعانىنا اۋەلى ابىرجىپ قالعان عافەكەڭ ازدان كەيىن بىلاي دەپ ءسوز باستايدى.
- قادىرلى راحا! - دەيدى وڭ جاعىندا وتىرعان راقىمجان قوشقاربايەۆقا قاراپ:

- مىناۋ مەنىڭ ەلدەن كەلگەن ءىنىم. وڭدى جىگىت. كورىپ وتىرسىزدار ءوزى مىرزا، اۋقاتتى. سوسىن تازا ازامات. تازا بولعاندا دا تاپ- تازا! - دەيدى ەشبىر سىر بەرمەي...
سودان كەيىن ىنىلەرىنە وزىمسىنە بۇرىلىپ:

- ءاي، اقسەلەۋ، ءاي جانىبەك، مىنا سەندەر نە وتتاپ جۇرسىڭدەر، تاريح، مادەنيەت، ادەبيەت، ۇلتتىڭ بولاشاعى، ۇرپاقتىڭ كەلەشەگى، سالت- ءداستۇر... تاعى سونداي بىردەڭەلەرىڭدى ايتىپ... مەنىڭ مىنا باۋىرىم بار عوي، ءيا، وندايلاردىڭ بىرىمەن دە شاتاعى جوق، تاپ- تازا جىگىت. ەشتەڭەگە ارالاسپايدى. قاق- سوقپەن شارۋاسى جوق، تاپ- تازا. بىلمەيدى. بىلگىسى دە كەلمەيدى. بۇعان سوۆحوزداعى مالى تۇگەل، بالا- شاعاسى امان، ماشينەسى ءجۇرىپ تۇرسا بولدى. قالعان دۇنيە ورتەنىپ، توپان سۋ قاپتاپ كەتسە دە مىڭق ەتپەيتىن ناردىڭ ءوزى. تاپ- تازا جىگىت بولعان سوڭ سويتەدى. ايتىپ وتىرمىن عوي! تاپ- تازا!، - دەپ تاعى تامسانادى. وتىرعان جۇرت اشى مىسقىلعا قىرىلىپ تۇسەدى. ەشتەڭەگە تۇسىنبەگەن الگى جىگىتتىڭ ءوزى دە ءماز بولىپتى.
مۇنداي ازاماتتاردى عافۋ اعامىز كەزىندە ءبۇي دەپ وسپاقتاعان ەكەن. قازىر كورىپ ءجۇرمىز، ءبىزدىڭ قوعامدا «تاپ- تازا» جىگىتتەر ءتىپتى وتە كوبەيىپ كەتتى ...

تولەش جانبوبەك


سوڭعى جاڭالىقتار