ءناپسى تۋرالى استارلى اڭگىمە: ماقتانگەرشىلىك پەن تاكاپپارلىق

شاكىرت ۇزاق جول ءجۇرىپ، جولشىباي ءجۇنى تۇسكەن توبەتتى كورىپ: «مەن بۇل يتتەن ارتىق شىعارمىن»، - دەگەن ويعا كەلەدى. سول ساتتە توبەت اللانىڭ قالاۋىمەن تىلگە كەلىپ، بىلاي دەيدى:

- بايعۇس ادام، سەنىڭ مەندەي توبەتتەن قانداي ارتىقشىلىعىڭ بار؟ مەن بولسام، ءوزىمنىڭ قوجايىنىما ادالمىن، ءتۇنى بويى قوجايىنىمدى كۇزەتەمىن، ونىڭ بەرگەن تاماعىنا ۇنەمى ريزاشىلىعىمدى بىلدىرەمىن، باسىما باسپانا مەن جۇمساق توسەك تالاپ ەتپەيمىن. بەرگەنىنىڭ بارشاسىنا ءدان ريزامىن.

ال سەن ءوز قوجايىنىڭا، يەڭە ءدال وسىنداي قارىم- قاتىناس جاسايسىڭ با؟ سەن ءتۇن بويى بەيقامدىقپەن ۇيىقتايسىڭ، از- كەم ريزىق بەرىلسە قاناعاتتانباي، دۇنيەدەن بارىنشا ارتىق الۋعا ۇمتىلاسىڭ، ءوزىڭدى جاساعانعا شىن بەرىلگەن ادال قۇلمىسىڭ؟ مەن وسىنداي ۇسقىنسىز بولۋدى ءوزىم تاڭداپ المادىم.

«استاعفيرۋللاح، مەن بۇل يتتەن تومەن ەكەنمىن».

ارى قاراي ساپارىن جالعاستىرعان جولدا كىر- قوقىسقا اۋناعان شوشقانى كەزدەستىرىپ، ىشىنەن: «وسى شوشقادان ەندى ارتىق شىعارمىن»، - دەگەن ويعا كەلەدى. شوشقا اللانىڭ امىرىمەن تىلگە كەلىپ:

- بايعۇس پەندە، سەنىڭ مەنەن قانداي ەرەكشەلىگىڭ بار؟ ادىلدىك تارازىسى ورنايتىن سوت كۇنى ادامداردىڭ: «ءبىزدى شوشقا ەتىپ جاراتقانىڭ جاقسى ەدى، سوندا بۇل ازاپتى كورمەي ۇمتىلار ەدىك»، - دەپ زارلايتىنىن سەن بىلمەۋشى مە ەدىڭ؟! مەنى ءناجىستى جەيتىن قىلىپ جاراتقانىنا مەن كىنالى ەمەسپىن. ءتىپتى مەن نۇح (ع. س. ) كەمەسىندە دارىگەر- تازالىقشى بولعانمىن».

«استاعفيرۋللاح، مەن بۇل شوشقادان دا ناشار ءارى تومەن ەكەنمىن».

شاكىرت كەلگەن ىزىمەن ساپارىن جالعاستىرادى. جولدا جەردە جاتقان ءناجىستى كورىپ، ەڭكەيىپ: «مەن بارلىعىنان ناشار ءارى تومەن شىعارمىن، الايدا سەنەن ءبارىبىر ارتىقپىن»، - دەدى. ول دا وسى مەزەتتە اللانىڭ قالاۋىمەن تىلگە كەلىپ: «بايعۇس ادام، سەنىڭ مەنەن قانداي ارتىقشىلىعىڭ بار؟ سەن مەنى قولدانعانعا دەيىن مەن سەنىڭ قالاعان ءدامدى تاعامىڭ بولىپ، سەنى قۋانتتىم. سەن مەنى پايدالاعاننان كەيىن عانا وسى كۇيگە اينالدىم. سەنىڭ بويىڭا كۇش، قۋات جيناپ، ءوزىڭنىڭ قوجايىنىڭ- جاراتۋشىڭا عيبادات ەتۋىڭ ءۇشىن ءوزىمدى قۇرباندىققا شالدىم. ال سەن ءوزىڭنىڭ جاراتۋشىڭا نە ىستەيسىڭ، ونىڭ جولىندا ءوزىڭدى قۇربان ەتەسىڭ بە؟.

شاكىرت سوندا بارىپ: «استاعفيرۋللاح، مەن تاعى وسى ناجىستەن دە ناشار ءارى بەيشارا ەكەنمىن»، - دەپ اقيقاتتى تۇسىنگەن ەكەن.

ادامنىڭ اساۋ ءناپسىسىنىڭ قالاۋى: ۇدايى ارتىق ءىشىپ- جەۋ، كوپشىلىگىن يەمدەنۋ، زورلىقپەن بيلىك جۇرگىزۋ، كۇنالى ىستەرگە جەتەكتەۋ، ءتۇپتىڭ- تۇبىندە اللادان ۇزاقتاتىپ، ورعا جىعۋ. ادام كوزىن ءناپسى قۋاتى بايلاسا، اقيقاتتى كورۋدەن جىراقتاپ قالادى. ءناپسى مايدانى ءومىر بويى بىردە جارقىراپ، كەلەسىدە تومەنشىكتەپ وتىراتىن ۇزدىكسىز جۇرگىزىلەتىن رۋح كۇرەسىمەن سيپاتتالادى. وسى رۋحاني مايداندا نيەتتى تۋرالاپ، ءناپسىنى تاربيەلەپ، ۇدايى جونگە كەلتىرىپ وتىرۋدىڭ ماڭىزدىلىعى وراسان زور.

دەرەككوز: fondihlas.ru

اۋدارعان: مەرۋەرت مۇحاماديەۆا

islam.kz