ولەڭ، سەنەن ولسەم قاشىپ قۇتىلمان

ءبىز ادام ساناسىندا ولەڭنىڭ قالاي پايدا بولاتىندىعىن بىلمەيمىز. ءتىپتى تۇسىنبەيمىز. ول ادام بالاسىنىڭ مۇمكىندىگىنەن تىس جاتقان باسقا الەم بولسا كەرەك. سودان دا بولار كەيبىر ادامدارعا ءبىر بويىندا ەكى ادام ءومىر ءسۇرىپ جۇرگەندەر رەتىندە قارايمىز. دۇرىسى - قارايمىن. سونىڭ ءبىرى - سۆەتقالي نۇرجان.

ونىڭ بويىنداعى ەكەۋدىڭ بىرەۋى - كادىمگى اس ءىشىپ، اياق بوساتاتىن پەندە رەتىندەگى كەيپى. ەكىنشىسى - سول پەندە ەكەندىگىن ۇمىتىپ كەتىپ، دۇرىسى - پەندەلىك شەكاراسىنان شىعىپ كەتىپ، پوەزيانىڭ ادام اياعى باسپاعان، بالكىم باسا المايتىن ايدالاسىنا «قاڭعىپ» كەتەتىن كەيپى. ياعني، ءبىر ادامنىڭ بويىنداعى ەكى ستيحيا.

ءار اقىننىڭ اقىندىق وربيتاسىندا ءوز ايدالاسى بار. ول «ايدالاعا» تالايلار قىزىعادى، ءتىپتى قىزىققان تالاي ولەڭشى- ەلىكتەۋشىلەر سول «ايدالاعا» بارۋعا دا تىرىسادى. ءبىراق اداسىپ- اداسىپ قايتىپ كەلەدى. ويتكەنى ول جاققا باراتىن جولدى ءوزى تاڭداعان پەندەسىنىڭ وربيتاسىنا جاراتقان يەمىز ءوزى سالىپ بەرگەن.

- ولەڭ، سەنەن ولسەم قاشىپ قۇتىلمان،

جابىسقان ءبىر دەرت بولدىڭ عوي تۇقىمنان.

جۇرەگىمنىڭ تەرەڭىندە ءبىر جەل بار،

جەتكەن ماعان زىڭىرانىپ زىتىمنان...

ونىڭ «زىتىنىڭ» قاي جاقتا ەكەنىن، ونىڭ قاي جاققا اپاراتىنىن بىلايعى جۇرت قايدان ءبىلسىن. مىناۋ ايلاپات عالامشاردان نەشە ءتۇرلى تىلدە، نەشە ءتۇرلى فورمادا ادامعا جەتىپ جاتقان اقپاراتتىڭ شەگى جوق. ءبىراق ونىڭ كوپشىلىگى كەز كەلگەنگە ەستىلە بەرمەيدى- اۋ؟! ول قۇستىڭ تىلىمەن جەتە مە، سۋدىڭ تىلىمەن جەتە مە، تاۋدىڭ الدە تالدىڭ تىلىمەن جەتە مە، باردىڭ الدە جوقتىڭ تىلىمەن بە، كورىلەتىننىڭ الدە كورىلمەيتىننىڭ تىلىمەن بە، ايتەۋىر جەتىپ جاتادى. ال ونى ەستىگەن قالپىندا فيلوسوفيالىق فورمۋلاعا اينالدىرىپ، كوپشىلىككە جەتكىزۋ اسا دارىندىلاردىڭ ەنشىسىنە بۇيىرعان. «تار شەكەمدى سولقىلداتىپ باراتىر، مىڭ عاسىردىڭ ءۇنى كەرگەن تامىرىم» دەيدى دە:

دەرتىم اۋىر، كۇندىز - اۋرۋ، تۇندە - ساۋ،

بىزگە بىتكەن ءتوزىم تەنتەك، مۇڭ دا اساۋ.

مىڭ عاسىردىڭ ءۇنىن جىيعان تامىرىم،

اي استىندا ءبىر جارىلماي تىنباس- اۋ!-

(«تامىرداعى ءۇن»)

دەيتىن سۆەتقاليعا تابيعات سونداي دارىندىلىقتى بەرگەنىن كورەمىن. ول «جۇماق- ءتۇننىڭ جۇپارى» دەگەن ولەڭىندە:

مەن كەشكەن عاجاپ عۇمىر وسى- اي، جالعان!

باقىتتان بۇل ءبىر داۋرەن باس اينالعان.

جىر ەمەس، كومەيىمنەن نۇر تامادى،

جۇلدىزدار سىيقىرىنا ماسايعاننان، -

دەيدى.

- ساۋساعىمدا سىڭسىعان قاۋىرسىننىڭ،

تاسقا تامعان كوز جاسىن اۋىرسىندىم.

سوزدەردىڭ شارلاپ جۇرگەن كەڭىستىگىنىڭ ءاربىر ميلليمەترىنە دەيىن كوز الدىڭىزعا كەلىپ، ءار دىبىستىڭ دەمى ەستىلىپ، ءار دىبىستىڭ قىلىعى ورنەك سالادى. ولەڭ جولدارىنداعى وسىنداي ميكروجاعدايلار نە ماقساتتا، قانداي ۇمىتتە نەمەسە قانداي ارماندا ءجۇر دەيسىز عوي. ءار ورنەك وزىندەگى ويدى وقىتقىسى كەلدى.

- بۇلتسىز كوكتەن جاۋىپ تۇر

جۇپار جاڭبىر،

شىراق جاقتى جاڭبىردان تۇتانعان گۇل.

سىزگە مانيپۋلياتسيا جاسايدى. ءبىز مانيپۋلياتسيا دەگەن ءسوزدى كوپ جاعدايدا جاعىمسىز ماعىنادا تۇسىنەمىز. مەنىڭشە، ول تۇتاستاي جاعىمسىز ەمەس. ول - اركىمنىڭ نيەتىنىڭ رەتى. مىنا شۋماقتاردى وقىپ وتىرىپ، ءسىز دە اقىننىڭ ءوزى سياقتى «سول شىراقتى كەۋدەگە قادادىم دا، قارعىپ تۇردىم جالت ويناپ جانارىمدا» دەگىڭىز كەلەدى. ءتىپتى قيالىڭىزدا ءوزىڭىزدىڭ دە قارعىپ تۇرعانىڭىزدى كورۋىڭىز عاجاپ ەمەس. ولەڭنىڭ سىيقىرى، ياعني، مانيپۋلياتسياسى دەگەن وسى.

- ادەتىم ەد وت كورسەم تۇرا المايتىن،

ءبىر پالە بار سول وتتا -

قۇرانعا ايقىن.

ولەڭ جولدارى ءبىر- بىرىنە وي شۋماقتارىن لاقتىرىپ، ءبىرى- بىرىنەن قاعىپ الىپ، ءسىزدى ىلگەرى جەتەلەپ بارا جاتادى.

جانارىمنىڭ جالتىنان تاستار كۇيىپ،

الا قويدى جۇپارىن اسپان جىيىپ.

ءبىر كۇش مەنى لاقتىردى جىراققا الا،

سىيمايدى ەكەم مەن بايعۇس جۇماققا دا.

ءسىز وسى جولداردىڭ جەتەگىندە كەتىپ بارا جاتاسىز نەمەسە كەلە جاتاسىز. ءبىراق جاي عانا كەلە جاتۋ نەمەسە جاي عانا كەتىپ بارا جاتۋ ەمەس. بۇل - ولەڭ جولدارىنىڭ ءار دىبىسى جەتكىزگەن وي الەمىن كەزۋ.

...ەسىم جىيسام كەلەمىن قارا قىردا،

كۇزگى جاڭبىر قۇيىپ تۇر قاباعىمدا.

تىكەن جارىپ، تاباندى تاستار كەسىپ،

تۋراپ جاتىر جاسىندار اسپاندى وسىپ.

(«ءوڭ مەن ءتۇس»).

«قاباعىندا كۇزگى جاڭبىر قۇيىپ تۇرعان» اقىننىڭ مۇڭ باسقان كەيپىن ءبىر كورەسىز دە، كەلەسى ءبىر ولەڭىنەن ونىڭ مۇلدەم باسقا قالپىن كورەسىز:

- دامەتپە مەنەن.

مەن قازىر ولىكپىن، قۇسىم!

جول بەرەم دوڭىزعا توقتاپ، شىن،

...وسى ايتقانىما سەنىپ تۇرمىسىڭ؟

...وتتاپسىڭ!..

(«شەندەستىرۋ»)

ءار ءسوز عانا ەمەس، سول سوزدەردى سونداي قۋاتقا جەتكىزە ەستىرتۋ ءۇشىن اتوي سالاتىن دىبىستاردىڭ قاتارى قامال بۇزارداي بولىپ تۇراتىن ساتتەر بولادى. مىناۋ - ءدال سول ءسات! پوەتيكا عىلىمىنىڭ مىقتىسى

ا. پوتەبنيا ايتقانداي، «نەلىكتەن وسىنداي مازمۇن وسىنداي دىبىستاردى تالاپ ەتەدى ەكەن؟». دىبىستار الەمىنىڭ ءوز عالامشارى بار. ولار ءوز زاڭدىلىقتارىمەن جۇرەدى. اقىننىڭ سويلەۋ ءتىلى سول زاڭدىلىقتاردى جاقسى سەزىنە الاتىندىعىمەن ەرەكشەلەنەدى. سول زاڭدىلىقتار ارقىلى كەيبىر جولداردان جازدىڭ جايما شۋاعى ەسىپ قويا بەرەدى.

- كەز قايدا قۋسىرماعان جاز ءجانناتىن،

قالقامنىڭ ءار قىلىعى ناز بولاتىن؟

سىڭسىعان، ايلى داۋرەن، كوشتىڭ قايدا،

باسىمدا قوناقتاعان از عانا ءتۇن؟

«سىڭسىعان، ايلى داۋرەن، كوشتىڭ قايدا؟». ارينە، بۇل سۇراق. ءبىراق جاۋابىنان دا عاجاپ سۇراق! مۇڭدى! مۇندايدا مۇڭنىڭ ءوزىنىڭ ادامدى راحاتقا بولەۋى شاتتىقتان كەم تۇسپەيدى. مۇڭدانۋدىڭ نەسى شاتتىق دەپ ويلارسىز؟ مەندە سولاي ويلاعانمىن. ءبىراق ولەڭ جولدارىنان العان اسەرىڭىزدىڭ ءسىزدى ءبىرازعا دەيىن اق ساۋلەنىڭ ىشىندە كەتىپ بارا جاتقانداي كۇيگە بولەيتىنىن سەزىپ وتىرعان بولارسىز. قايتالاپ وقۋعا شاقىراتىنىن دا سەزىندىڭىز. مىنا جولدى دا قايتالاپ وقىپ كورىڭىز:

قوش، قالقام، - اندە جالعان، ولەڭ- جالعان،

كەۋدەمدە ارەڭ جانعان سونەردە ارمان -

ساز قىلىپ، سامال قىلىپ تارقاتارمىن،

سارقىتىن ساعىنىشتىڭ سەنەن قالعان.

پوەزيا - وزىنە قايتا ۇڭىلتپەسە، پوەزيا بولماس ەدى. ادام سول عاجايىپ سەزىمنىڭ ىشىندە جۇرە تۇرعىسى كەلەدى. ءتىپتى جۇرە بەرگىسى كەلەدى. بۇل - «داۋرەن كوشكەن» دەگەن ولەڭنىڭ شۋماقتارى.

- كەز قايدا جاز جاناتىن قۋسىرماعان، -

كوزىمنەن جىبەك قۇمداي سۋسىر عالام.

بارادى تاس توبەمنەن داۋرەن كوشىپ،

قاناتى قۇلاعىمدا سۋسىلداعان.

شۋماقتىڭ سونو- و- وۋ تۇبىنەن لاۋلىك تاستاي جارقىراي كورىنگەن عاجايىپتى كوزىڭىز شالىپ قالادى. ۇڭىلە تۇسەسىز. ءبىراق ول وزىنە جاقىنداتا قويمايدى. تەك ءسىز ونىڭ سول الىستان شۇعىلا شاشقان ساۋلەسىنەن ساف اۋا جۇتقانداي بولاسىز. بولاسىز ەمەس، دۇرىسى - ساف اۋا كۇللى بولمىسىڭىزدى تازارتىپ وتكەنىن بىلەسىز. ءيا، ءسىز تازاراسىز! كوڭىل- كۇيدىڭ دە ءوز ەكولوگياسى بولادى. اقىننىڭ:

وقىماي-اق وتقا سالما مەنى سەن،

كەرەگىڭە جاراتا الساڭ، كەلىسەم.

زالىم- سۇمنان ساعىڭ سىنعان نالاڭ مەن،

اۋىرسىنعان جاراڭ بولسا، بولىسەم، -

دەيدى. ادامنىڭ كوڭىل- كۇيى دە اينالاسىنداعى ادامداردىڭ ىقپالىمەن تازارىپ تۇرادى. جانە دە اينالاداعى ادامداردىڭ ىقپالىمەن لاستانادى. سونداي شاقتاردا پوەزيا - جان دۇنيە ەكولوگياسىن ۇنەمى تازا ۇستاۋعا قىزمەت ەتەتىن بىردەن ءبىر قۇدىرەت. بۇل سوزدەرىم اسپانداپ تۇرعان پافوس سياقتى كورىنۋى مۇمكىن.

ءبىراق ونى باسقاشا ايتا المادىم. ويتكەنى ول شىندىعىندا دا سولاي.

وسىنداي سىيقىرى بولماسا، ادامزات، ونىڭ ىشىندە قازاق تا پوەزيانى جۇك قىلىپ، عاسىردان عاسىرعا كوشكەندە ورتا جولدا لاقتىرىپ كەتپەي، ارقالاپ ءجۇرىپ نە قىلادى. جاقىندا ءبىر جەردەن وقىدىم، الەمنىڭ وتىز ەلىندە اقىن جوق ەكەن. ويپىر- اي، ولار سويلەۋ بىلمەيتىن شىعار، ءسىرا؟! تىلدەرى ءبىر- بىرىنە قارعىس ايتۋعا عانا جارايتىن قاساڭعا اينالدى ما ەكەن؟ بۇل دا قاۋىپتى. كوركەم ءسوز بەن ۇيقاسقان ويلار جوق جەردە، كوڭىلدەر دە قاساڭدانادى. پوەزياداعى قۇسني سوزدەردىڭ قۇدىرەتى الەمدى الديلەيدى ەمەس پە! پوەزيا ەڭ ءبىر سۇرقاي جۇرەكتەردىڭ وزىنە جىلىلىق ۇيالاتار ەدى. ادامنىڭ ىشكى ءمانىن ارالاپ، وعان ءنارىن بەرەر ەدى. مىسالى بىلاي:

دالا ءتۇنى - دەرتىم سىڭگەن،

ساعان شاتتىق، قۇربان - قايعىم.

جالعاستىرار سول تىلسىممەن،

جۇمباق جايدا تۇرعاندايمىن.

پوەزيا - ادامدى ءبىر ساتكە بولسا دا تەك قۇر سۇلدەر ەمەس، جاندۇنيەسىندە وزىنە دە جۇمباقتاۋ ءبىر پاتشالىق بار ەكەندىگىن سەزىنۋگە مۇمكىندىك بەرەتىن ءبىر شاراپات ەمەس پە؟ سول ارقىلى ادامنىڭ كوڭىل كۇيى قالىپتاسادى. شوشالانىڭ ىشىندە وتىرىپ تا كوركەمدىكتىڭ ىشىندە ءومىر سۇرە الادى. راحات كۇيدى باستان كەشىرە الادى.

قانداي ءسوز ايتىلمادى مىنا قىردا،

تالايى جاتىر مەنىڭ قۇلاعىمدا.

اۋانىڭ اعىسىنان اڭگىمە اۋلاپ،

وتىرام جۇرەك توسىپ جىلى اعىمعا.

(«دالاداعى داۋىستار» )

ءبىراق پوەزيانىڭ مىندەتى - تەك جاندى الديلەۋ ەمەس ەكەنى تۇسىنىكتى. قارا جەردىڭ بەتىندە ماڭگىلىك كۇرەس ءالى دە جالعاسىپ كەلەدى. ول جارىق پەن قاراڭعىلىقتىڭ قارا كۇشى جاعىنان دا، رۋحاني كۇشى جاعىنان دا ءبىر- بىرىمەن يتجىعىس ءتۇسىپ جاتاتىن ايقاستارىنان تۇرادى. ءدال بۇگىنگى تاڭدا بولىپ جاتقان سونداي كۇرەستەردى تاريحقا قاراپ وتىرىپ، سوناۋ ەرتە دۇنيەدە دە بولىپ جاتقاندىعىن كورىپ تۇرىپ، تاڭقالاسىڭ. ىشىندە ادامى جوق كۇرەس بولۋشى ما ەدى ءتايىرى؟ تابيعاتتىڭ تىلسىم كۇشتەرىنىڭ ىشىندە دە ادام جۇرەدى. ەڭ بولماسا، سونىڭ قۇربانى بولۋ قىزمەتىن اتقارادى.

«بۇل نە دەگەن بىتپەيتىن كۇرەس؟» - دەگىڭ كەلەدى.

نە دەگەن بىتپەيتىن كۇرەس ەكەندىگىن ايتا باستاعاننان دا، ايتپاي- اق قويعان ابزال شىعار. ويتكەنى ونىڭ جاۋابىن قىسقا دا قايتارۋعا بولادى. كۇللى ادامزاتتىڭ كىتاپحاناسىن اقتارىپ وتىرىپ، ءجۇز جىلعا سوزىلار اڭگىمە ەتۋگە دە بولادى. بىتپەيتىن كۇرەستىڭ كەيبىر قىرىن، بالكىم، ولەڭ جولدارىنا سىيعىزۋعا بولار. ويتكەنى ولەڭ قىسقا سويلەيدى.

دەگدارلاردى تىققاندار تۇرمە- كورگە،

ۇلىق سوتتىڭ الدىندا قۇندى وتەر مە!..

دانالىق پەن ناداندىق قاتار تۋىپ،

كەتەدى ولار سيا الماي ءبىر مەكەنگە.

(«شاكىرىم قاجى شوشالاسىندا»)

«نە دەگەن كۇرەستىڭ؟» ءبىر جاۋابى وسى جولدا تۇرعان سياقتى. ول - «دانالىق پەن ناداندىقتىڭ» كۇرەسى. «ەكەۋى قاتار تۋىپ» تىرشىلىكتىڭ قوس تىنىندەي بولىپ، قاتارلاسا ءالى شاۋىپ كەلەدى. ءبىر- بىرىنەن قالىساتىن ءتۇرى جوق.

قارا جەر- قارا توپىراق ءوزىنىڭ قاسيەتىن ايتا الاتىنداردىڭ بولمىسىنا بەرىپ، ايتار ءسوزىن ايتا الاتىنداردىڭ اۋزىنا سالاتىنداي. ايتا الاتىننىڭ مۇڭى باسىم بولاتىنى دا سوندىقتان شىعار. قارا جەردىڭ بەتىندەگى ءتىلى جوقتارمەن سويلەسكەن سوڭ، كورىلمەيتىندى كورگەن سوڭ، اقىننىڭ «ءبىزدىڭ جۇرەك - ۋ تولى لاعىل كەرسەن، ءبىل دە سەسپەي قاتار ەد ءزارىن بەرسەم» دەيتىنى دە سوندىقتان-داعى.

بۇلاي كورەم دەپ پە ەدىم بەينەلىمدى،

جەل سويلەپ تۇر ىزالى، كەيدە مۇڭدى.

جانارىمنىڭ نۇرىمەن جاماپ تۇرمىن،

دال- دۇل قىلعان الدەكىم كويلەگىڭدى.

(«جىرلايدى جايىق»)

«جەل سويلەپ» جەتكىزگەن تالاي سىرلار اقىننىڭ كەۋدەسىندە كومبە بولىپ جاتىر. تەك ول ارا- تۇرا ولەڭ جولدارىنا اتوي سالىپ شىعا كەلىپ، سودان سوڭ تاعى دا ءبىراز ۋاقىت ءۇنسىز قالادى.

كوكىرەگىم - كونە كىتاپ.

سۇر تىستى.

قىرىق قازىنا، مىڭ ماعىنا - قىرتىستى.

قيالىم بار جەتپىس تۇرگە قۇبىلعان،

كوزدەرىڭمەن قاراماشى ءبىر ءتۇستى.

(«كوكىرەگىم- كونە كىتاپ»)

كەيدە وقىرماننىڭ «ءبىر ءتۇستى كوزبەن قارايتىنى» راس. ويتكەنى ءار ولەڭ جولىندا جاتقان تىلسىم كەڭىستىكتەردىڭ ءبارى بىردەي وعان ءتۇپ- تامىرىنا دەيىن تۇسىنىكتى بولا بەرمەۋى مۇمكىن. ءبىراق تۇسىنىكسىزدىگىنەن ەمەس، بۇرىن- سوڭدى بارىپ كورمەگەن جەرىڭنىڭ جۇمباعى كوپ بولماي ما؟ بولادى. تەرەڭنەن تارتاتىن جىرلاردى وقىعان كەزدەگى وقىرماننىڭ جاعدايى دا سولاي. ءبىراق سول جۇمباعىنىڭ ءوزى تارتىمدى بولىپ، ءومىر بويى ىزدەپ جۇرگەن ءبىر سۇرلەۋى الدىنان شىققانداي كۇي كەشەدى. بىلگىسى كەلەدى. ءار نارسەنى سۇراعىسى كەلەدى. جالپى، ادامنىڭ كوكىرەگى سۇراققا تولى بولادى عوي. تەك ءبىز ول سۇراقتاردىڭ ءبارىن بىردەي سىرتقا شىعارا بەرمەيمىز. پوەزيا وسىنداي سۇراقتار تۋدىرا الۋىمەن دە قۇدىرەتتى. سۆەتقالي پوەزياسىندا ءدال وسىنداي مىنەز بار.

ونىڭ «قىرىق قازىنا، مىڭ ماعىناسىنىڭ» قاي قيانىنان سويلەپ تۇرعانىن كورگىڭ كەلەدى. سودان دا بولار ونىڭ ولەڭدەرىندەگى «جەتپىس تۇرگە قۇبىلعان قيالىنىڭ» ىشىندە وقىرماننىڭ ءوزى دە كەتىپ بارا جاتادى. ءبىرىن ءتۇسىنىپ، ءبىرىن تۇسىنبەي. تۇسىنگەن جەرىنە تۇشىنىپ، تۇسىنبەگەن تۇسىنا تاڭقالىپ. «ونەردىڭ مىندەتى - تاڭقالدىرۋ!» مۇنى ايتقان - ءابدىجامىل نۇرپەيىس. ءتىل عىلىمنىڭ الەمدىك دەڭگەيدەگى بىلگىرى يۋريي لوتماننىڭ «اقىننىڭ ءتىلىن وزگە ءتىلدى زەرتتەگەندەي زەرتتەۋ كەرەك، ونىڭ اقىندىق قاسيەتىن سوندا عانا تانيسىڭ» دەگەن ءسوزى بار ەدى.

كەتكەننىڭ داۋىسى تۇر قۇلاعىمدا،

جەتكەننىڭ ءىزى جاتىر قۇبا قۇمدا.

بىلە الماي ەرتەڭىمە نە ايتارىمدى،

ءۇن- ءتۇنسىز مەن دە وتىرمىن

مىنا قىردا.

(«دالاداعى داۋىستار»)

ءبىر قاراعاندا اقىن شىنىندا دا ءۇنسىز وتىرعان سياقتى. ءبىراق، بۇل ۇنسىزدىك كادىمگى ۇنسىزدىك ەمەس ەدى. بۇل - ىشتەگى الاساپىران داۋىلدىڭ سىرتقى كورىنىسى. ءوزى داۋىل بولسا، ءوزى الاساپىران بولسا، وسىنداي تىپ- تىنىش كورىنىس بولۋشى ما ەدى؟ ءيا، بولىپ تۇرادى. داۋىلداردىڭ ايقاي سالىپ تۇرۋى ءتىپتى دە مىندەت ەمەس. اقىننىڭ جىرلارىنداعى وسىنداي ىشكى الاپاتتاردى سىرتقا شىعارۋعا ءسوزدىڭ قۇدىرەتى جەتە الماي قالادى دا، ونىڭ ءۇنسىز تىناتىن شاقتارى دا بولىپ تۇراتىن سياقتى.

ءبارىن ايتىپ سالماي، ەمەۋرىنمەن ۇقتىرار وسىنداي جىرلار قۇدىرەتتىرەك. وسى ايتىلعان ەكى اۋىز ءسوزدىڭ ارعى جاعىنا ۇڭىلەم دەپ دىڭكەڭ قۇريدى. مىنە، ناعىز ولەڭ وسىلاي ءوز بولمىسىن جارتىلاي جاسىرىن ۇستاپ، «كورسەتپەي تۇرعانىمدى كورىپ ال» دەگىزۋى تيىس. سول ارقىلى وقىرمان ونىڭ ارعى مانىنە جاقىنداعىسى كەلەدى. تىپتى ونىڭ ارعى ءمانىن ءوزىنىڭ كوڭىل تۇكپىرىنەن ىزدەيدى. ءبىزدىڭ جاقسى ولەڭگە تامساناتىنىمىزدا وسىدان..

كەزىندە باۋىرجان مومىش ۇلى «جارقىنعالي» دەپ ات قويىپ كەتكەن سۆەتقالي نۇرجان جىرلارىن وسىنداي قىرلارىمەن، وسىنداي قاسيەتتەرىمەن قازاق پوەزياسىندا ەرەكشە كوز تارتاتىن قۇبىلىس دەر ەدىم. بابا تاۋلاردىڭ باۋرايىنان، دانا دالامىزدىڭ شالعايىنان ەستىلەتىن وسى جىرلاردىڭ ءون بويىندا ءتىلىمىز بەن ءدىلىمىزدىڭ قوس دارياسى جاتقانداي.

وڭايگۇل تۇرجان

2016

«ايقىن»