وسى سەندەر جۇك جيناۋدى قاشان ۇيرەنەسىڭدەر؟ - مادەنيەت ءمينيسترى
وقىرمان نازارىنا مەملەكەت قايراتكەرىنىڭ تۋعان جەرى وتىرار اۋدانىنا بارعان ساپارىنداعى ءبىر وقيعانى ۇسىنامىز.
ءوز قولىمەن قۇرعان ارقالىق دراما تەاترىنىڭ قابىرعاسىن ەرىنبەي- جالىقپاي سىرلاۋى، قوجا احمەت ياساۋي كەسەنەسىنىڭ قازبا جۇمىستارىنا قاتىسىپ، بەلى قايىسا زەمبىلمەن توپىراق تاسۋى، يتاياق ورنىنا پايدالانىلىپ جۇرگەن اعاش تاباقتى اتتاي قالاپ سۇراتىپ الۋى، قولدان جاسالعان قازاقى كەرەۋەتتى الىس اۋىلدان تاۋىپ، سول كەزدەرى باس اينالدىراتىن 8 مىڭ تەڭگەگە ساتىپ الۋى سىندى اڭگىمەلەر ەل ىشىندە ءالى دە ايتىلادى.
جولىمىز ءتۇسىپ ءىس- ساپارمەن مەملەكەت قايراتكەرىنىڭ تۋعان جەرى وتىرار اۋدانىنا، ونىڭ ىشىندە ماياقۇمعا بارعاندا تاعى ءبىر اڭگىمەگە كەز بولدىق.
ءوزاعاڭ ءبىر كەزدەرى سالىنۋىنا ءوزى مۇرىندىق بولعان وتىرار مەملەكەتتىك مۇراجايى جانىنان 19 - عاسىرداعى قازاق ءومىرىن كورسەتەتىن «قورجىن تام» ەتنومادەني كەشەنىن سالدىرىپتى.
كەشەن قوس وشاق، اربا، ديىرمەن مەن مالا، ازىق كەپتىرەتىن باستىرما، ساماۋرىن، تاندىر سىندى بارلىق كەرەك- جاراقتارمەن جابدىقتالىپتى. ادەتتەگىدەي الماتىدان شىعاردا ءوزىنىڭ سىرالعى دوسى، مۇراجاي ديرەكتورى اۋەلحان ەسجانوۆقا قوڭىراۋ سوعىپ، جۇمىسىن تياناقتاپ الادى دا، ەرتەڭىنە ات باسىن اۋىلعا بۇرادى. ءارى مينيستر، ءارى جەرلەستەرى كەلگەن سوڭ مۇراجايعا حالىق قاراقۇرىم بولىپ جينالادى. باسقا ەش جەرگە بۇرىلماي، بىردەن قورجىن تامعا كىرگەن وزەكەڭنىڭ رەڭى نىلدەي بۇزىلىپ، سالدەن كەيىن قايتا شىعادى.
«وسى سەندەر جۇك جيناۋدى، كورپە كوكتەۋدى، بابىمەن ەت اسۋدى، ساماۋرىن قويۋدى، ءتىپتى وتىن بۇتاۋدى قاشان ۇيرەنەسىڭدەر؟» دەپتى ءوڭى ءورت سوندىرگەندەي اشۋلانىپ.
«ءتىپتى، ساماۋرىننىڭ ءوزى ءاردايىم وڭ جاقتا تۇراتىنى سەكىلدى ءاربىر دۇنيە- مۇلىكتىڭ ورنى بار ەمەس پە؟! كورپەنىڭ دە قوناققا توسەلەتىنى، كۇندەلىكتى پايدالانىلاتىنى رەتىنە ساي جينالادى. ورنەكتەرى مەن قۇراقتارىنىڭ ۇشما- ۇش كەلۋى، كورگەندە كوز تويۋى، ءبارى- ءبارى ەسكەرىلەدى» دەپ جينالعانداردى شىعارىپ جىبەرىپ، ءوزاعاڭ مينيستر باسىمەن ءۇي جيناۋعا ءوزى كىرىسىپ كەتىپتى.
كىرەتىن تەسىك بولسا، كىرىپ كەتۋگە دايىن مۇراجاي قىزمەتكەرلەرىندە، قوسىلا شاۋىپ جۇرگەن قاپتاعان شەنەۋنىكتەردە ءۇن جوق. سودان ەكى ساعاتتان كەيىن شىعىپ، «ال، ەندى كورىڭدەر» دەگەن سوڭ جۇرت بىرتىندەپ ىشكە ەنەدى.
«ويپىرماي، «قىزدىڭ جيعان جۇگىندەي» دەگەن جايىنا قالسا كەرەك، كورپە- جاستىق رەت- رەتىنە قاراي سىمداي تارتىلىپ، كىلەم- الاشالار باستان- اياق جىمداسا، توگىلتە توسەلىپتى. تىپتەن، قوناقتارعا ارنالعان جاستىقتار دا قاز- قاتار قالانىپ، ىدىس- اياقتارعا دەيىن ورىن- ورنىنا جايعاسقان. مۇنتازداي ەتىپ جينالعان بولمەدە باسى ارتىق ءبىر زات جوق ەدى-اۋ» دەيدى سول وقيعا اراسىندا بولعان جەرگىلىكتى قالامگەر كەنجەحان تاڭىربەرگەنوۆ. ءسويتىپ، ءار ساعاتى مينۋتىنا دەيىن ەسەپتەۋلى مادەنيەت ءمينيسترى وزەكەڭ اسقان قاراپايىمدىلىعىمەن، تەرەڭ بىلىمىمەن كورگەن جۇرتتى تاعى دا تاڭ قالدىرىپتى.
تاڭ قالماي كورىڭىز، ءۇي سىپىرىپ، توسەك جيناپ، شاي قويىپ جۇرگەن ءمينيستردى كوز الدىڭىزعا ەلەستەتىپ كورىڭىزشى. قازەكەم «تۋساڭ - تۋ!» دەپ وسىنداي ازاماتتاردى عانا ايتسا كەرەك.
