اقىن تولەگەن ايبەرگەنوۆتىڭ ءوز داۋسىمەن وقىلعان ولەڭ - كەسكىن

1959 - جىلى تاشكەنتتىڭ نيزامي اتىنداعى پەدوگوگيكا ينستيتۋتىنىڭ قازاق ءتىلى مەن ادەبيەتى فاكۋلتەتىن ءبىتىرىپ، تۋعان اۋىلىندا مۇعالىمدىك قىزمەت اتقارادى. اقىن 1967 - جىلى 30 جاسىندا ناۋقاستان كوز جۇمدى. تولەگەن اقىن قىسقا عانا عۇمىرىندا ارتىنا وشپەس مول مۇرا قالتىرىپ كەتتى. ونىڭ ولەڭدەرى ادەبي ورتادا الدە قاشان جوعارى باعاسىن العان بولاتىن.

ايبەرگەنوۆتىڭ ولەڭدەرى رەسپۋبليكالىق باسپا سوزدە 1957 - جىلدان جاريالاندى. تۋعان جەرگە دەگەن البىرت ساعىنىش پەن ءمولدىر ماحابباتقا تولى ءبىر توپ ولەڭدەرى 1961 - جىلى شىققان «جاس داۋرەن» اتتى توپتاما جيناقتا باسىلدى. وتانعا، تۋعان ەلگە دەگەن سۇيىسپەنشىلىگىن، زامانداستارىمىزدىڭ رۋحاني سەزىم بايلىعىن، ىزگى تىلەۋ، اق نيەتىن جارقىراتا اشقان، قازاق پوەزياسىندا وزىندىك جاڭا ىرعاق، تەگەۋرىندى ەكپىن اكەلگەن پوەتيكالىق جىر كىتاپتارى - «ارمان ساپارى» (1963)، «ومىرگە ساياحات» (1965)، «قۋمداعى مۇنارالار» (1968)، «مەن ساعان عاشىق ەدىم» (1970)، «امانات» (1975)، «ءبىر تويىم بار» (1981)، بالالارعا ارنالعان «باقشاعا ساياحات» سۋرەت- كىتاپشاسى (1985) جارىق كوردى.

سونداي-اق ورىس تىلىندە «مير سوزۆەزديا» (1987) دەگەن اتپەن تاڭدامالى ولەڭدەرى اۋدارىلىپ باسىلدى. ايبەرگەنوۆتىڭ «اق ەركە، اق جايىق»، «جاڭعىرعان ماڭعىستاۋ»، «قازاقستان»، «سەنى ويلادىم»، «مەنى ويلا»، «اق قايىڭدار»، «ءبىر تويىم بار»، ت. ب. ولەڭدەرىنە جازىلعان اندەر ەل اراسىنا كەڭىنەن تانىمال. قازاقستان لەنين كومسومولى سىيلىعىنىڭ لاۋرەاتى (1974، قايتىس بولعاننان كەيىن). 1997 ج. اقىننىڭ «تاڭدامالى ولەڭدەر» جيناعى مەن ول تۋراپى جازىلعان «بىرگەمىن مەن سەندەرمەن» اتتى ەستەلىك كىتابى جارىق كوردى.

الايدا ونىڭ كۇنى بۇگىنگە دەيىن ەشبىر جەردە اۋديو نەمەسە بەينەكەسكىنى ساقتالماعان، جاريالانباعان. بۇگىن ءبىز قىسقا عانا ومىرىندە ويلى، وتتى، جالىندى جىرلارىمەن كۇللى قازاقتى وزىنە جالت قاراتقان دارىندى اقىننىڭ بۇدان بۇرىن ەشقايدا جاريالانباعان «ءوز داۋسىمەن وقىلعان ولەڭىن» ۇسىنىپ وتىرمىز.