شاقىرۋسىز قوناق بولعان قانداي جامان

توي ءجۇرىپ جاتىر. «ريتس پالاس» دەيتىن، تۇگەل تۋىسىڭمەن امانداسىپ شىققانشا توي تارقايتىن- اتشاپتىرىم مەيرامحانا. اعايىن- تۋىستى ىزدەۋگە بەت جوق، نۇرتىلەۋ اعامنىڭ كوزىنە تۇسۋگە تاعى بولمايدى، ءبىر شەتىنەن ورىن تاۋىپ جانتايا كەتتىم.

ستول- دوستارىم بەيتانىس كىسىلەر ەكەن. بەيتانىس بولعان سوڭ با، ءبىرتۇرلى بوپ كورىندى. مىناۋ كىم، قايدان كەلدى دەگەندەي ءبىر قاراپ قويادى. مەن دە ءبىرتۇرلى بوپ، قۇرمەتتى قوناقتىڭ ءبىرى رەتىندە كەڭىنەن وتىرمىن. الدىمىزداعى جىلى- جۇمساقتى تالاسىپ- تارماسىپ، بىرگە قاربىتىپ، سوعىپ جاتىرمىز. توي، اناۋ جاقتا، ءوز رەتىمەن- ءبىز ءوز قالاۋىمىزبەن دەگەندەي. ءبىراز قىزسىن، توي يەلەرىن قۇتتىقتاۋعا ۋاقىت جەتەدى ءالى. تويىپ الايىن. تويدىم!

ەندى كىمدەر بار ەكەن؟ نەگىزى، تويعا شاقىرىلعان قوناقتاردىڭ جەتپىس پايىزىن تانۋعا ءتيىسپىن. كورشى ستولدارداعىلاردى ءجىتى زەرتتەي باستادىم. تانىستار بار، بىرەن- ساران. ازداۋ، ءا؟ باس يزەپ امانداسىپ قويامىز. نۇرەكەڭنىڭ مەن بىلمەيتىن تانىستارى كوپ ەكەن- اۋ. ەندى، بۇكىل قازاققا ءماشھۇر ادام عوي. بولسا بولار. تويداعى قوناقتاردىڭ سەكسەن پايىزى- ماعان بەيتانىس. قۇداي- اۋ، جۋرناليستەر جوق قوي مىندا. نۇرەكەڭنىڭ تويىندا جۋرناليستەردىڭ بولماۋى- مۇمكىن ەمەس! كوكەيىمە ءبىر كۇمان كەلدى. وسى، مەن، قاڭعالاقتاپ كەپ، باسقا بىرەۋدىڭ تويىنا كىرىپ كەتكەن جوقپىن با؟ باعاناعى ءبىرتۇرلى بولىپ وتىرعان باسىم، شىنىمەن دە ءبىرتۇرلى بولا باستادىم. قاسىمداعىلاردان، ىشەرىڭدى- ءىشىپ، جەرىڭدى- جەپ بولعان سوڭ، كىمنىڭ تويى دەپ سۇراۋ - ۇيات. داياشىنى ىمداپ شاقىرىپ الدىم دا:

- نۇرەكەڭنىڭ تويى قايدا بولىپ جاتىر؟ - دەپ سۇراي سالدىم سەلقوس قانا. ول دا ءبىر اقىرىن سويلەۋدى بىلمەيتىن دارىلداعان بىرەۋ ەكەن!

- نۇرەكەڭنىڭ تويى كەشە ءوتىپ كەتكەن!- دەپ جارتى زالعا ەستىرتە قويىپ قالسىن. قاسىمداعىلار ەلەڭ ەتىپ، وعان ءبىر، ماعان ءبىر قاراپ قالىپتى. مەن دە قايبىر سىر جاسىرا قوياتىن اداممىن! «ءماسساعان!» دەپپىن عوي بارىنە ەستىرتە. ءبىراق، قۇداي وڭداپ ەشقايسى كۇلگەن جوق. ەستىمەگەن سىڭاي تانىتىپ وتىر. ءبىرتۇرلى ەمەس، جاقسى كىسىلەر ەكەن! ءماسساعان بەزگەلدەك! ايدالاداعى بىرەۋدىڭ تويىنا كىرىپ، سىقيىپ تۇرىپ تويىپ الدىم. ەندى نە ىستەيمىن؟ تۇرا قاشۋ- بولمايدى. وسىندايدا ۋاقىت وتسەيشى! قىلپىلداپ ءبىراز وتىردىم دا جىلىستاپ دالاعا شىقتىم.

ۋح! بىرەۋدىڭ تويىنا شاقىرۋسىز كىرىپ، شاقىرۋسىز قوناق بولعاننان ىڭعايسىز دۇنيەنى كورمەدىم. مەن باسىمنان وتكەن وسى ءبىر جاعدايدى ماقتانۋ ءۇشىن ەمەس، شاقىرۋسىز قوناق بولعاننىڭ قانداي قيىن ەكەنىن ءتۇسىندىرۋ ءۇشىن جازىپ وتىرمىن...

Serik Zhanbolat

فەيسبۋكتەن