بانان تۋرالى قىزىقتى مالىمەتتەر

كوپشىلىك باناندى جەمىستەر قاتارىنا جاتقىزادى. الايدا، ول - جيدەك. ەڭ ۇلكەن بانان اعاشىنىڭ بيىكتىگى، ورتاشا ەسەپپەن، 10 مەتر، ال ديامەترى - 50 سانتيمەترگە جەتەدى.

ونىڭ ءبىر ساباعىندا 300 بانانعا دەيىن بولادى. بۇل، شامامەن، 500 كەلىگە دەيىن تارتادى.

سارى بانانمەن قاتار قىزىل ءتۇستىسى دە كەڭ تاراعان. الايدا مۇنداي ءتۇرى جۇمساق بولعاندىقتان، تاسىمالداۋعا جارامايدى.

سەيشەل ارالدارىنىڭ ءبىرى ماودا سارى، قىزىل جانە قارا بانان وسەدى. بۇل جەرگىلىكتى تۇرعىندارى ءۇشىن تەڭىز ونىمدەرىمەن بىرگە بەرىلەتىن تاپتىرمايتىن گارنير بولىپ ەسەپتەلەدى.

كوڭىل كۇيدى رەتتەيتىن в6 دارۋمەنى باسقا جەمىستەرگە قاراعاندا باناندا كوپ بولادى.

قىزىعى - بانان ديەتاسى دا بار. الايدا ونىڭ نارلىلىگى كارتوپقا قاراعاندا ءبىر جارىم ەسەگە كوپ. ەگەر باناندى كەپتىرسە، كالورياسى 5 ەسەگە دەيىن وسەدى.

سونداي-اق، ونىڭ قۇرامىندا كالي بولادى. ول ادامنىڭ قالىپتى قىسىمدا ءجۇرۋى ءۇشىن وتە قاجەت. سونىمەن قاتار، كاليي جۇرەك بۇلشىق ەتىن قاتايتادى.

بانان قۇرامىنداعى ساحاروزا، فرۋكتوزا جانە گليۋكوزا ارقاسىندا ول اسقازاندا تەز ءارى جەڭىل قورىتىلىپ، بويعا كۇش- قۋات سىيلايدى.

ەرتەدە بانان جەمىسىن «ەرتەگى الەمىنىڭ جەمىسى» دەپ اتاعان ەكەن. سەبەبى، ءدام تاتساڭ، قارنىڭ تويادى ءارى دەنساۋلىققا پايدالى. سونداي- اق، شايقاس- ۇرىستاردا جارالانعان ساربازدار بانان قابىعىن باسىپ، جارا- تىرتىقتارىن ەمدەگەن. ەسكىدە يتاليادا ءانشى- ارتىستەر تاماقتارى اۋىرماس ءۇشىن انان قابىعىن قايناتىپ، ىشكەن ەكەن. ءۇندىستاندا بانان قاسيەتتى تاعامداردىڭ ءبىرى بولىپ ەسەپتەلىپ، قۇتتى قوناقتاردىڭ الدىنا اكەلىنگەن. ەۋروپا ەلدەرىنىڭ مەكتەپتەرىندە وقۋشىلارعا تاڭەرتەڭگى جانە تۇسكى اس كەزىندە بانان بەرەدى. سەبەبى، بانان بالانىڭ ويلاۋ قابىلەتىنە جاقسى اسەر ەتەدى. كۋبادا باناندى ەتپەن بىرگە پىسىرەدى. ال ۆەنەسۋەلودا باناندى قۋىرىپ، كۇرىشپەن بىرگە ارالاستىرادى.

بانان ءۇندىستان، ەكۆادور جانە ت. ب. الەمنىڭ ءبىرقاتار وڭتۇستىك ەلدەرىندە وسەدى. بۇل جەمىستىڭ بىرنەشە سورتتارى بار. ءبىزدىڭ ەلدە كەڭ تاراعاندارى - كاۆەنديش، گرو ميشەل، لاكاتان. بۇل سورتتار اعاشتان پىسپەگەن، جاسىل كۇيىندە تەرىلىپ، بىردەن قوراپتارعا جيناستىرىلدادى. جەمىس ۇزاق جول بارىسىندا ءوزى ءپىسىپ جەتىلەدى.

تابيعي ءۇش قانتتان بولەك بانان قۇرامىندا الما قىشقىلى، فەرمەنتتەر، مينەرالدى زاتتار، فوسفور، ماگنيي، كاليي، كالتسيي، ناتريي، ا، ۆ، س، رر، ە دارۋمەندەرى بار. بانان ديەتالىق تاعام بولىپ ەسەپتەلەدى. جۇيكە جۇيەسى، انەميا، جۇرەك قان تامىرلارى، باۋىر، بۇيرەك، ءوت اۋرۋلارىنىڭ الدىن الىپ، ارتىق سالماقتان ارىلۋعا جول بەرەدى.

بانان اعزاداعى قان مولشەرىنىڭ ءبىر قالىپتى بولۋى مەن قان قىسىمىنىڭ وزگەرمەۋىنە ىقپال ەتەدى. سۇيەك، تىرناق، شاش وسىمىنە وڭ اسەرىن تيگىزەدى. اياق- قولدىڭ مەزگىلسىز تارتىلۋىن، شاش ءتۇسىمىن، تەرىگە ەرتە ءاجىم تۇسپەۋىن قاداعالايدى. اعزاداعى زياندى قالدىقتاردى سىرتقا شىعارادى، ءوت، باۋىر، اسقازان جولدارىن تازارتادى. كۇيزەلىس، كوڭىلسىزدىك، سترەسس كەزىندە كومەككە كەلەدى. كوڭىل- كۇي گورمونىنىڭ پايدا بولۋىنا سەپتىگىن تيگىزەدى.

باناندى كوپ مولشەردە اياعى اۋىر جانە جاس ءسابيى بار كەلىنشەكتەر، قارت كىسىلەر، كىشكەنتاي بوبەكتەر پايدالانعانى ءجون. سونداي- اق، كەز كەلگەن جاننىڭ كۇندەلىكتى اس مازىرىندە ءبىر- ەكى تال بانان بولعانى ابزال. بانان وپەراتسيادان كەيىن، اۋىر فيزيكالىق جاتتىعۋلاردان كەيىن وتە پايدالى. ول اعزانى قالىپقا كەلتىرۋگە مول ۇلەسىن قوسادى. سونىمەن قاتار، باناندى شارشاعان يا اشۋلانعان كەزدە، ەمتيحان- سىناق الدىندا پايدالانعان دۇرىس.

بانان تاڭداعان كەزدە ونىڭ سىرتقى قابىعى مەن ساباعىنا ءمان بەرىڭىز. سىرتقى قابىقتا قارا داقتار ءارى ءوزى قاتتى بولماۋى كەرەك. ونىڭ ءتۇسى ءبىر قالىپتى، ءۇستى جىلتىرلاۋى كەرەك.

باناننىڭ ءوابىعى دا كادەگە جارايدى. تومەندە بەرىلگەن مىسالدار بۇل سوزىمىزگە دالەل بولا الادى.

كۇمىستى تازالايدى. باناننىڭ قابىعى ءوڭى كەتىپ قالعان كۇمىس زاتتاردى قالپىنا كەلتىرەدى. ول ءۇشىن قابىقتى بلەندەردە ءتىس پاستاسىنا ۇقساعانعا دەيىن سۋ قوسىپ ەزەمىز. ارتىنان جۇمساق ماتامەن كۇمىستى تازالاساق، بىرتىندەپ قارا داقتاردىڭ كەتىپ جاتقاندىعىن كورەسىز. ودان كەيىن كۇمىستى بانان قابىعىنىڭ قالدىقتارىنان تازارتىپ، جىلتىراتۋ ءۇشىن جۇمساق ماتامەن جاقسىلاپ سۇرتەمىز.

اياق كيىمگە ارنالعان جاقپا ماي. بانان قابىعىنىڭ قۇرامىنداعى مايلار مەن بالاۋىز ونى اياق كيىمدى تازالاپ، جىلتىراتۋ ءۇشىن قولدانۋعا مۇمكىندىك بەرەدى. اياق كيىمدى قابىقتىڭ ىشكى جاعىمەن ءسۇرتىپ، ۇستىنەن قۇرعاق ماتامەن سۇرتەسىز.

CD نەمەسە DVD ديسكتەردىڭ سىرىلعان جەرلەرىن قالپىنا كەلتىرەدى.

سىرىلعان ديسكتى ەڭ اۋەلى، باناننىڭ وزىمەن سۇرتەمىز، ارتىنان 2 مينۋت بويى باناننىڭ قابىعىمەن سۇرتەمىز. سوسىن، ديسكتى تەرەزە تازالاۋعا ارنالعان زاتقا مالىنعان جۇمساق ماتامەن ءسۇرتىپ، كەپتىرىپ قويامىز. باناننىڭ جۇمساعى مەن قابىعىنداعى بالاۋىز ديسكتى تازالاۋعا كومەكتەسەدى.

ءتىستى اعارتادى. كادىمگى ءتىس پاستاسىمەن ءتىسىڭىزدى تازالاپ بولعاننان كەيىن، تىستەرىڭىزدىڭ ءۇستىن بانان قابىعىنىڭ ىشكى بولىگىمەن ەكى مينۋتتاي ءسۇرتىڭىز. قابىقتاعى كاليي، كالتسيي، ماگنيي، مارگانەتس جانە فوسفور سىندى مينەرالدار تىسكە پايدالى ءارى ونى اعارتۋعا سەپتىگىن تيگىزەدى. ارتىنان باناننىڭ قالدىقتارىن كەتىرۋ ءۇشىن ءتىسىڭىزدى تاعى ءبىر رەت جۋىپ، ءتىسىڭىزدى اعارتۋ ءۇشىن وسىلاي كۇنىنە 1-2 رەتتەن قايتالاپ تۇرىڭىز.

تىكەندى شىعارادى. ەگەر دەنەڭىزگە تىكەن كىرىپ كەتىپ، ونى الا المايتىنداي جاعداي بولسا، تىكەن كىرگەن جەرگە بانانىڭ قابىعىن ىشكى بەتىمەن قويىپ، 24 ساعاتقا تانىپ قويىڭىز. بانان قابىعىنداعى فەرمەنتتەر تىكەندى تەرىنىڭ سىرتىنا شىعارىپ، جارانىڭ تەزىرەك جازىلۋىنا سەپتىگىن تيگىزەدى.

جارانى جازادى. باناننىڭ قابىعىنىڭ قۇرامىنداعى ءتۇرلى تابيعا مايلار مەن فەرمەنتتەر كۇننەن كۇيۋدەن، جارانى تەز جازاتىن قاسيەتكە يە. سونىمەن قاتار، ول قابىنۋ مەن ءتۇرلى جاندىكتەردىڭ شاعۋىنان پايدا بولاتىن تىتىركەنۋدى دە باسادى. ول ءۇشىن باناننىڭ قابىعىن ىشكى جاعىمەن جاراعا نەمەسە شاعىلعان جەرگە قويىپ تاڭىپ تاستايمىز نەمەسە ىسقىلايمىز. كۇنىنە بىرنەشە رەت وسىلاي ىستەسەڭىز، جارا تەز جازىلىپ كەتەدى.

سۇيەلدى كەتىرەدى. باناننىڭ قابىعى حالىق ەمىندە سۇيەلدى كەتىرۋ ءۇشىن قولدانىلادى. ول ءۇشىن باناننىڭ قابىعىن ءىش جاعىمەن سۇيەلدىڭ ۇستىنە قويىپ ءبىر كۇنگە بايلاپ قويامىز. سۇيەل جوق بولىپ كەتكەنشە وسىلاي ىستەپ ءجۇرۋ كەرەك. كەيبىر سۇيەلدەر ءبىر اپتادا كەتسە، كەيبىرەۋلەرىنىڭ كەتۋى ءۇشىن ءبىر ايداي ۋاقىت قاجەت.

پسورياز بەن بەزەۋدى كەتىرەدى. پسورياز بەن بەزەۋدى كەتىرۋ ءۇشىن باناننىڭ قابىعىن ىشكى قاباتىمەن قابىنعان جەرلەردى سۇرتسەڭىز، بىرنەشە كۇننەن كەيىن وزگەرىستەردى بايقاي باستايسىز.

تەرىگە پايدالى. بانان قابىعى مينەرالدار مەن انتيوكسيدانتتارعا باي. ەگەر كۇندەلىكتى ونىمەن بەتىڭىزدى، موينىڭىزدى ءسۇرتىپ تۇرساڭىز، تەرىڭىز ىلعالدانىپ، ءاجىمنىڭ ءتۇسۋى ازايادى.

اقپارات ينتەرنەتتەن الىندى