قىتايدا جۇرگەندە كوكپارعا تانا تارتاتىنبىز

- بۇدان كوپ جىل بۇرىن قاپشاعايدىڭ ارعى بەتىندەگى «شەڭگەلدى» سوۆحوزىنداعى ءبىر شارۋا ادامىنان سوعىم الاتىن بولدىم. رۋلدە ءوزىم. قاسىمدا قوناققا كەلىپ جاتقان اكەم بار.

ءبىز سوۆحوزعا ساسكە تۇستە كەلدىك. اشىق شارباقتا جەم جەپ جۇرگەن ون شاقتى جىلقى. قايسىسىن تاڭداساق تا، ءوز ەركىمىز. جاسىنان جىلقى باعىپ، مال اراسىندا وسكەن قاريا جىلقى ىشىندە ءبىراز ءجۇردى دە، جۇگەن- قۇرىق تيمەگەن ءبىر سەمىز بايتالعا ايدار تاقتى. جىلقىشىلار قاقپايلاپ، جاڭاعى بايتالدى شىعار قاقپاعا ايداپ اكەلىپ، ۇيشىككە وتكىزىپ بەردى. قالاي اكەتەسىڭ، ەندىگىسىن ءوزىڭ ءبىل. اكەم بولسا جاسى ۇلعايعان ادام. مەن بولسام... ءيا، مەنىڭ جايىم ايتپاسا دا تۇسنىكتى عوي. ەندى نە ىستەيمىز دەپ داعدارىپ تۇر ەدىك، ەلۋلەر شاماسىنداعى سالت اتتى ءبىر كىسى كەلىپ اكەمە سالەم بەردى. ءىستىڭ ءمان- جايىن تۇسىنگەننەن كەيىن:

- اتىم سەنىمسىزدەۋ، دەگەنمەن دە، بايقاپ كورەيىن، - دەدى. ءشۇۋ اساۋدى بۇعالىقتاپ، ارقاننىڭ ەكىنشى ۇشىن ءيىرىپ اكەپ تاقىمىنا باستى. ءسويتتى دە، تارتا جونەلدى. بايتال ءتورت اياعىمەن تابانداپ جاتىپ العان. ات شىرەنە تارتادى. ءشۇۋ اساۋ تىڭعا سالعان تۇرەنشە جەر سىزىپ كەلەدى. ال انا قازاقتىڭ جالاڭاش تاقىمىنداعى ارقان دومبىرا شەگىندەي دىڭعىرايدى. ۇززىلۋگە بار، ءبىراق جەلىمدەنىپ قالعان سەكىلدى ءبىر ەلىگە دە سۋسىعان جوق. ءوستىپ وتىرىپ ءبىز ونىڭ ۇيىنە كەلدىك. جاس كەزىندە ءوزى دە كۇشىمەن كوز سۇرىندىرگەن اكەم قايران قالىپ، باسىن شايقادى:

- تاقىمىڭ قىسقاشپا ءوزى، نەمەنە؟ ونەرىڭە بولايىن. مەنىڭ دە قايراتىم ءبىراز بار ەدى. ءبىراق، تاقىمىما تۋ بيەنى باستىم دەپ ماقتانا المايمىن، - دەدى.

وكىنىشكە وراي، اتى- ءجونى جادىمنان شىعىپ كەتكەن جاڭاعى قازاق:

- و، بۇل ءبىزدىڭ داعدىلى ماشىعىمىز. قىتايدا جۇرگەندە كوكپارعا تانا تارتاتىنبىز. سەركەنى مەنسىنبەيتىنبىز، - دەپ قايىردى جاۋاپتى.

اكەم قۇپتاي سويلەدى.

- مىنا ونەرىڭنەن كەيىن تۇيە تارتاتىن ەدىك دەسەڭ دە سەنەم، شىراعىم...

وسىلاي كەرەمەتتى كورگەنىم بار مەنىڭ...

سافۋان شايمەردەن (1922- 2007) - جازۋشى، دراماتۋرگ، ق ر حالىق جازۋشىسى.

«شوقىر» سپورتتىق- تانىمدىق جۇرنالى