ماتەماتيكا ساباقتارى 9-11 - سىنىپ وقۋشىلارىنا «الماتى» تەلەارناسىنان كورسەتىلەدى
بۇل تۋرالى قالالىق ءبىلىم باسقارماسىنىڭ باسشىسى ءلاززات جىلقىبايەۆا ايتتى، دەپ حابارلايدى قازاقپارات ءتىلشىسى.
«4 - توقساننىڭ باسىنان باستاپ ءبىرىنشى سىنىپتان 11- سىنىپقا دەيىنگى وقۋشىلارعا اپتاسىنا 5 كۇن «بالاپان» جانە «ەلارنا» تەلەارنالارىندا ساباقتار كورسەتىلەدى. سونىمەن قاتار، «الماتى» تەلەارناسىندا 9-11- سىنىپ مەكتەپ تۇلەكتەرى ءۇشىن باعدارلامالىق ماتەريالدى ساپالى يگەرۋ ماقساتىندا جاراتىلىستانۋ، ماتەماتيكالىق باعىتتاعى ساباقتار كورسەتىلەدى. بۇل ساباقتار كۇن سايىن «الماتى» تەلەارناسىندا ساعات 11.00-13.00 ارالىعىندا ەفيرگە شىعىپ وتىرادى. ساباقتى تاجىربيەلى مۇعالىمدەر ەكى تىلدە وتكىزەدى»، - دەيدى باسقارما باسشىسى.
بۇگىن قالانىڭ بارلىق مەكتەپتەرىندە سىناق ساباعى وتكىزىلدى. «بۇل ساباقتىڭ نەگىزگى ماقساتى - جۇيەنىڭ قالاي جۇمىس ىستەيتىنىن ءبىلۋ، ولارمەن بايلانىس ورناتۋعا، تەستىلەۋگە، جۇيەنىڭ جۇمىسىمەن تانىسۋعا دايىندىق. ەرتەڭ، 2 - ءساۋىر كۇنى اتا- انالار جينالىسى وتەدى. 3 - ساۋىردە وقۋشىلارعا سىنىپ ساعاتتارى جۇرگىزىلەدى»، - دەدى ول.
بۇعان دەيىن، الماتى قالاسىنىڭ اكىمى مۇعالىمدەر مەن مەكتەپ وقۋشىلارىنا 10 مىڭنان استام كومپيۋتەر بولىنگەنىن ايتقان بولاتىن. سونىمەن قاتار، الماتىلىق وقۋشىلار قاشىقتان ەكى اۋىسىمدا وقيدى.
اۆتور: الما مۇقانوۆا