وزبەكستاندا 8- عاسىرداعى قۇران كىتابىن قالپىنا كەلتىرۋ جۇمىستارى اياقتالدى
بۇل تۋرالى وزبەكستاننىڭ مادەنيەتى مەن ونەرىن دامىتۋ قورى كەڭەسىنىڭ ءتوراعا ورىنباسارى سايدا ميرزييەۆا Telegram-دا جازدى، دەپ حابارلايدى «قازاقپارات» ح ا ا ءتىلشىسى.
عىلىمي زەرتتەۋلەرگە سايكەس، قۇران كىتابى ۇزاق ۋاقىت بويى وزبەكستاننىڭ قاشقاداريا وبلىسى قاماشين اۋدانىنداعى لانگار وتا مەشىتىندە ساقتالىپ كەلگەن. ول VIII عاسىردىڭ سوڭىندا جازىلعان جانە يسلام الەمىندەگى ەڭ كونە قولجازبالاردىڭ ءبىرى بولىپ تابىلادى. مادەنيەت جانە ونەردى دامىتۋ قورى مەن وزبەكستان مۇسىلماندارى ءدىني باسقارماسى بىرلەسىپ ۇيىمداستىرعان جوباعا فرانسيانىڭ بەلگىلى لۋۆر مۋزەيىنىڭ ماماندارى جۇمىلدىرىلدى.
«كاتتا لونگار قۇرانىنىڭ پاراقتارى رەستاۆراتسياعا دەيىن وتە قۇرعاق جانە ادىر- بۇدىرلى بولدى. وتە كوپ شاڭ- توزاڭ وتىرعان. ءبىز رەستاۆراتسيا پروتسەسىن ءاربىر پاراقتى تازارتۋدان باستادىق. كىتاپ قاتتى دەفورماتسياعا ۇشىراعان»، - دەدى فرانسۋز مامانى اكسەل دەلو.
2019 -جىلى باستالعان قايتا قالپىنا كەلتىرۋ جۇمىستارى ءۇش كەزەڭمەن جۇرگىزىلگەن. الدىمەن، پروتسەستىڭ جوسپارى قۇرىلعان. قۇراننىڭ جاي- كۇيى تۋرالى سيپاتتاما جازىلىپ، فوتوفيكساتسيا جاسالعان. قولجازبانىڭ بەتتەرى جەكە- جەكە الىنعان. رەستاۆراتسيانىڭ سوڭعى كەزەڭىندە كىتاپ 15 ايعا باسپاق استىنا ورنالاستىرىلعان. كەيىن ارنايى قاپتاماعا سالىندى.
سايدى ميرزيەۆانىڭ پىكىرىنشە، كونە كىتاپ ەندى كوپتەگەن عاسىر بويى ءبۇتىن ادامزاتتىڭ رۋحاني بايلىعى بولادى. وزبەكستان مۇسىلماندارى ءدىني باسقارماسىنىڭ ءتوراعاسى ۋسمونحون اليموۆتىڭ ايتۋىنشا، الەمدە كاتتالانگار قۇرانىنىڭ ءبىر عانا داناسى بار. كىتاپ 206 بەتتەن تۇرعان بولۋى مۇمكىن. ساقتالعانى 97 بەت قانا. وزبەكستاندا كيەلى قولجازبانىڭ 17 بەتى ساقتاۋلى.
اۆتور: ميرا تولەندى قىزى