قازاقتىڭ سانى رەۆوليۋتسياعا دەيىن 8 ميلليون بولعان - سماعۇل ەلۋباي

نۇر-سۇلتان. قازاقپارات - اشارشىلىق جىلدارى 5200000 قازاقتان ايىرىلدىق.

31-مامىر - قۋعىن- سۇرگىن جانە اشارلىق قۇرباندارىن ەسكە الۋ كۇنىنە ارنالعان «عاسىر زۇلماتى» تاقىرىبىندا وتكەن ونلاين دونگەلەك ۇستەلدە جازۋشى سماعۇل ەلۋباي وسىلاي ايتتى، دەپ حابارلايدى قازاقپارات ءتىلشىسى.

«الەمنىڭ قوزعاۋشى كۇشتەرى السىزدەردى باسىپ الۋعا كىرىستى، ناتيجەسىندە ءبىرىنشى دۇنيەجۇزىلىك سوعىس، ودان كەيىن ەكىنشى دۇنيەجۇزىلىك سوعىس بولدى. ياعني، ادامداردى قىرۋعا تەوريالىق نەگىزدەر جاسالدى. ەڭ كەدەي قازاقتىڭ وزىندە 50 باس قويى، 4-5 ءىرى قاراسى بولاتىن. بۇل رەسەيدەن كەلگەن گولوشەكيننىڭ كوزىمەن قاراعاندا قازاق حالقى قىرىلۋى كەرەك ەدى. 1992 -جىلعى كوميسسيا قۇرامىندا تالاس ومىربەك بولدى. ول كوميسسيا 1931-1932 -جىلدارداعى اشارشىلىقتان 2300000 قازاق قىرىلعانىن ايتتى. سوندا تۇرار رىسقۇلوۆ 1918-1919 –جىلى 1214000 ادام قىرىلدى دەسە، مۇحتار اۋەزوۆ 1921 -جىلعى اشارشىلىقتا 1700000 قازاق قىرىلدى دەدى. ەكەۋىن قوسساق، 3 ميلليونعا جۋىقتايدى. بۇعان 2300000-دى قوسساق، ون شاقتى جىل

ىشىندە 5200000 قازاقتان ايىرىلدىق»، - دەيدى سماعۇل ەلۋباي.

ونىڭ ايتۋىنشا، زاماناۋي تاريحتا تەڭ جارتىسىنان ايىرىلعان قازاقتىڭ تراگەدياسىنداي تراگەديا بولعان ەمەس.

«ناقتى دەرەكپەن سويلەگەندە جاعداي وسىنداي. ءبىز 10-15 جىل ىشىندە 5200000 قازاقتان ايىرىلدىق. «مۇنشا قازاق قايدان پايدا بولدى؟» دەگەن سۇراق تۋىنداسا، قولىمىزدا ورىنبورداعى تاريح ينستيتۋتىن باسقارعان الەكساندر چۋلوشنيكوۆتىڭ كىتابى بار. وندا قازاقتىڭ سانى رەۆوليۋتسياعا دەيىن 8 ميلليون بولعاندىعى تۋرالى اقپارات بار»، - دەيدى ول.

فوتو: brod.kz