جول بويىندا تالاپقا ساي دارەتحانا ۇستايتىن كاسىپكەرلەرگە اي سايىن 83 مىڭ تەڭگە تولەنەدى

ول ءۇشىن جول بويىندا دارەتحانادان بولەك وزگە دە سەرۆيستىك نىساندار بولۋى شارت، دەپ حابارلايدى قازاقپارات ءتىلشىسى.

ورتالىق كوممۋنيكاتسيالار قىزمەتىندە وتكەن بريفينگىدە تۋريزم يندۋسترياسى كوميتەتىنىڭ ءتوراعاسى داستان رىسپەكوۆ وسىنداي مالىمەت بەردى.

«ءبارىمىز جول بويىنداعى دارەتحانالاردىڭ ساپاسى سىن كوتەرمەيتىنىن كورىپ ءجۇرمىز. يندۋستريا جانە ينفراقۇرىلىمدىق دامۋ مينيسترلىگى مەن وبلىستاردىڭ اكىمدىكتەرى بىرلەسىپ، 2019-جىلى سانيتاريالىق-گيگيەنالىق توراپتارعا تۇگەندەۋ جۇرگىزدى. ءالى دە سانيتاريالىق تورابى بار 962 سەرۆيس نىسانى قاجەت»، - دەيدى داستان رىسپەكوۆ.

ول، سونداي-اق، قازىر بۇل ىسپەن «قازاۆتوجول» كومپانياسى عانا بيۋجەت ەسەبىنەن اينالىسىپ جۇرگەنىن ەسكە سالدى.

«وزدەرىڭىز بىلەتىندەي، «قازاۆتوجول» سوڭعى 2 جىلدا رەسپۋبليكالىق ماڭىزداعى جولداردىڭ بويىنا تالاپقا ساي سانيتارلىق توراپتار ورناتىپ جاتىر. ال بۇل ءىستى كاسىپكەر ىستەيتىن بولسا، سانيتارلىق-گيگيەنالىق توراپتى كۇتىپ ۇستاۋ ءۇشىن اي سايىن 83 مىڭ تەڭگە سۋبسيديا تولەنەدى. بۇل وبلىستىق جانە اۋداندىق ماڭىزى بار جولدارعا، تۋريستەر جينالاتىن نەگىزگى ورىندارداعى جەكە تۇرعان ستاتسيونارلىق ءۇي-جايلارعا دا، ءوزىن-ءوزى اقتاۋى تومەن جول بويىنداعى سەرۆيس وبەكتىلەرىنە دە قاتىستى بولادى. بۇل قاراجات تەحنيكالىق پەرسونالدى ۇستاۋ مەن قاجەتتى جابدىقتى ساتىپ الۋ شىعىنىن ازايتادى»، - دەدى كوميتەت ءتوراعاسى.