تۇركيادا مۇحتار شاحانوۆتىڭ 80 جىلدىعى تويلاندى

مۇحتار شاحانوۆتىڭ 80 جاسىن تويلاۋ تۇركيادان باستاۋ الدى. كەلەلى جيىن حالىقارالىق تۇركسوي ۇيىمىنىڭ شتاب- پاتەرىندە ۇيىمداستىرىلدى. اقىننىڭ قاتىسۋىمەن وتكەن شارادا ءتۇبى ءبىر تۇركى جۇرتىنىڭ ەلشىلەرى تۇگەل بوي كورسەتىپ، قوعام قايراتكەرلەرى مەن كورنەكتى وكىلدەرى جينالدى. حالىقارالىق كونفەرەنسيادا شاحانوۆتىڭ ادەبيەت پەن قوعام ومىرىنە سىڭىرگەن ەڭبەگى كەڭىنەن تالقىلاندى.

سۇلتانبەك رايەۆ، تۇركسوي ۇيىمىنىڭ باس حاتشىسى:

- مۇحتار شاحانوۆ - تۇركى دۇنيەسىنە ورتاق اقىن. ول تەك قازاق ەلىنىڭ ەمەس، تۇركى جۇرتىنىڭ رۋحاني تۇلعاسى. مۇحتار اعاي ايتتى، مەنىڭ ءبىرىنشى مەرەكەمدى تۇركسوي- دان باستايمىن دەدى. بۇگىن ءبىز مەرەيتويلىق شارالاردىڭ تۇساۋىن كەسىپ وتىرمىز. الداعى ۋاقىتتا قىرعىزستاندا، تۇركى مەملەكەتتەرىندە بولادى. قازاقستاندا وتەدى.

مۇحتار شاحانوۆ - قازاق پەن قىرعىزدىڭ ەمەس، بۇكىل تۇركىنىڭ رۋحى، قاينار بۇلاعى. انادولى جۇرتى مۇحتار شاحانوۆتى ماعجان جۇمابايەۆقا تەڭەيدى. اقىننىڭ ۇستانىمى كۇللى تۇركى ءۇشىن ورتاق، - دەيدى تۇركيا پرەزيدەنتىنىڭ باس كەڭەسشىسى.

يالچىن توپچۋ، تۇركيا پرەزيدەنتىنىڭ باس كەڭەسشىسى:

- مۇحتار شاحانوۆ قازاقتىڭ زيالىسى. شىعارمالارىنىڭ مازمۇنى مىقتى. قازاقتان شىققان زيالى، بۇكىل تۇركى حالىقتارى ءۇشىن قۇندى. ونىڭ پىكىرلەرى تۇركى الەمى ءۇشىن ماڭىزدى. ءتىپتى بۇتكىل ادامزات ءۇشىن.

تۇركى جۇرتى ءۇشىن مۇحتار شاحانوۆ پەن شىڭعىس ايتماتوۆ - ەگىز ۇعىم. سوندىقتان قىرعىز حالقىنىڭ اقىنعا دەگەن ىقىلاسى ەرەكشە.

قۋانىشبەك ومىراليەۆ، قىرعىزستاننىڭ تۇركياداعى ەلشىسى:

- مۇحتار شاحانوۆ ءبىر عانا قازاق ەمەس، قىرعىز ەلىنىڭ ەڭ تانىمال ادامى. تەك اقىن، جازۋشى ەمەس، شىڭعىس ايتماتوۆتىڭ جانىندا جۇرگەن ءىنىسى، قالامداسى رەتىندە حالقىمىز جاقسى تانيدى. 10 جىل بويى قىرعىزستاندا ەلشى بولدى. وسى كەزەڭدە ايتماتوۆشا قازاق پەن قىرعىزدى ءبىر قۇستىڭ ەكى قاناتىنداي ەتىپ جاقىنداستىردى. سوندىقتان ورتاق تۇلعامىزدىڭ دەنى ساۋ، ءومىرى ۇزاق بولسىن.

مۇحتار شاحانوۆتىڭ شىعارمالارىن عىلىمي تۇرعىدان زەرتتەۋ قاجەت، - دەيدى تۇركيالىق تۇركىتانۋشى ەكرەم ايان.

وسى ورايدا، الداعى ۋاقىتتا اقىن جايلى ەلەۋلى ەڭبەك جارىق كورمەك.

ەكرەم ايان، ۋنيۆەرسيتەت وقىتۋشىسى:

- تۇركى دۇنيەسى ادەبيەتىنىڭ ماڭىزدى اقىن- جازۋشىلارىنىڭ ءبىرى. ءاربىر تاقىرىبى تىكەلەي تۇركى جۇرتىمەن بايلانىستى. وسى سەبەپتى، تۇركيادا ماگيستراتۋرالىق جانە دوكتورانتۋرالىق ديسسەرتاتسيا تاقىرىبى رەتىندە زەرتتەلدى. تۇركسوي- مەن الداعى ۋاقىتتا بۇل ءبىر جيناق رەتىندە جارىق كورەدى دەپ كوزدەپ وتىرمىن.

حالىقارالىق شارا سوڭىندا اقىنعا تۇركسوي ۇيىمىنىڭ ەڭ جوعارعى ماراپاتى «قۇرمەت» وردەنى تابىستالدى. قازاقستاننىڭ ەڭبەك ەرىنىڭ 80 جىلدىق مەرەيتويىنا ارنالعان شارالار لەگى مۇنىمەن شەكتەلمەيدى. «مۇحتار شاحانوۆتىڭ ولەڭدەرى مەن اندەرى» اتتى كونسەرتتىك كەشى وتپەك. وندا «قاعان» توبى مەن قازاقتىڭ ءبىرقاتار ونەرپازى ونەر كورسەتەدى.

اۆتورى: مەرۋەرت قاناعات