09:45, 02 - تامىز 2021 | GMT +6
يزرايل كوروناۆيرۋسقا قارسى ۆاكسينانىڭ 80 مىڭ دوزاسىن جويادى
نۇر-سۇلتان. قازاقپارات - يزرايل جالپى قۇنى 6 ميلليون شەكەل (1,8 ميلليون دوللار) بولاتىن ۆاكسينانىڭ 80 مىڭ دوزاسىن جويادى، - دەپ حابارلايدى The Times of Israel.
باسىلىم مالىمەتىنشە، پرەپارات دوزالارى جارامدىلىق مەرزىمى ءوتىپ كەتكەندىكتەن جويىلادى.
ۆەدومستۆو وكىلدەرى قۇپيا كەلىسىمگە قول قويعاندىقتان ۆاكسينانىڭ ناقتى سانىن ايتا المايتىنىن حابارلادى.
«يزرايل ءونىمنىڭ جارامدىلىق مەرزىمىنە نازار اۋدارا وتىرىپ، ۆاكسينالار قورىن باسقارادى. مەملەكەت قۇپيالىلىق تۋرالى كەلىسىمدەرگە قول قويدى جانە ۆاكسينالاردىڭ ناقتى سانىن جاريالاي المايدى»، - دەلىنگەن ەلدىڭ دەنساۋلىق ساقتاۋ مينيسترلىگىنىڭ حابارلاماسىندا.
ناقتى قانداي ۆاكسينالار جويىلاتىنى بەلگىسىز. بەلگىلىسى - يزرايلدە Pfizer امەريكالىق كورپوراتسياسىنىڭ ۆاكسيناسى قولدانىلادى.