نۇر- سۇلتاندا 800 دەن استام وتباسى اپاتتى ۇيدەن جاڭا باسپاناعا كوشىرىلەدى

ەلوردا اكىمدىگىنەن ءمالىم ەتكەندەي، اپاتتى ۇيلەردىڭ كەيبىرى 90 جىل بۇرىن سالىنعان. قالا اكىمى التاي كولگىنوۆ ەسكى ۇيلەردى ارالاپ، تۇرعىندارمەن اڭگىمەلەستى. سارىارقا اۋدانى، بەسشاتىر كوشەسى، 8 ءۇيدىڭ تۇرعىندارى بىلتىرعى كۇزدە ەلوردا اكىمىمەن كەزدەسكەننەن كەيىن اۋداندا ءبىرقاتار ماسەلەلەر شەشىلگەنىن ايتتى. اسفالت توسەلىپ، كارىز جۇيەسى قالپىنا كەلتىرىلدى. «ءۇي كوز الدىمىزدا بۇزىلىپ جاتىر. قىستا كوپپاتەرلى ءۇيدى كومىرمەن جىلىتامىز. ءۇي سۋىق»، - دەيدى تۇرعىندار.

«قالادا 125 اپاتتى ءۇي بار. ءسىزدىڭ اۋداندا بىلتىر بولىپ، وسى جىلى سۇرىلەتىن ۇيلەردىڭ قاتارىنا قوستىق. وسى ءۇيدىڭ بارلىق وتباسىلارى جاڭا جىلدى جاڭا باسپانادا قارسى الادى. بيىل 800 دەن استام وتباسىن جاڭا ۇيلەرگە كوشىرەمىز»، - دەدى التاي كولگىنوۆ.

التىنسارين كوشەسىندە سۇرىلەتىن تاعى ءبىر ءۇيدىڭ سالىنعانىن 90 جىل بولعان. سونداي- اق، ءدال جانىنا تەمىرجولدار توسەلگەن باراك تيپتەس ۇيلەر بۇزىلادى.

«ۆاگون رەلستەن شىعىپ، ۇيىمىزگە جاقىن جەرگە قۇلاعان جاعدايلار بولدى. بالالاردى دالاعا جىبەرۋگە قورقامىز»، - دەيدى تۇرعىندار. سونىمەن قاتار، تۇرعىن ءۇي- كوممۋنالدىق شارۋاشىلىعىن جاڭعىرتۋ باعدارلاماسى اياسىندا ەلوردادا 50 دەن استام كوپپاتەرلى تۇرعىن ءۇي كەشەنى جوندەۋدەن وتەدى.

«تۇرعىن ءۇي سالۋ — ماڭىزدى باعىتتاردىڭ ءبىرى. ەگەر 800 دەن استام وتباسى اپاتتى ۇيلەردەن جاڭا ۇيلەرگە كوشەتىن بولسا، بيىل كەزەكتە تۇرعاندار ءۇشىن 8 مىڭنان استام الەۋمەتتىك پاتەر سالىنادى. ءبىراق ءبىراز جىل بۇرىن عانا سالىنعان ۇيلەر بويىنشا دا سۇراقتار بار. ولاردىڭ پليتكالارى قۇلاپ، فۋندامەنتتەرى وتىرىپ جاتىر. مىسالى، «ينفينيتي» ، «تەرريتوريا كومفورتا-2» ، «وربيتا» ، «7 بوچەك» جانە تاعى باسقا تۇرعىن ءۇي كەشەندەرى. بۇل ۇيلەرمەن دە اينالىسامىز. مەملەكەت كۇردەلى جوندەۋ جۇمىستارىن جۇرگىزۋگە قاراجات بولەدى، سودان كەيىن بۇل قاراجات تۇرعىندار اراسىندا 15 جىلعا دەيىنگى مەرزىمگە بولىنەدى»، - دەدى قالا اكىمى التاي كولگىنوۆ.