«ساز الەمىندەگى» سىناق: ديماش 7 جىل بۇرىنعى وقيعانى ەسكە الدى

«قۇرمەتتى دوستار! كۇنى كەشە «روسسيا» ارناسىنان «پريۆەت، اندرەي!» ەفيرىن كورگەن بولارسىزدار. باعدارلامادا شاعىن، ءبىراق وتە ماڭىزدى ءبىر ەپيزود كورسەتىلدى. ول جەردە مەن ءوز ەلىمدى سۇيەتىنىمدى جانە جەرلەستەرىمدى قۇرمەتتەيتىنىمدى ايتتىم. 2013 -جىلى «ساز الەمى» باعدارلاماسىندا بولعان وقيعا - بۇكىل قازاقستاندىقتاردىڭ ماعان دەگەن قارىم- قاتىناسىنىڭ كورسەتكىشى ەمەس. مەن 2013 -جىلعى بۇل باعدارلامادان بۇرىن دا ءدال وسىلاي ءان شىرقاپ، حالىقارالىق كونكۋرستاردا جۇلدە الىپ ءجۇردىم. قالاي دۇرىس دەپ شەشسەم، سولاي ءان سالىپ ءجۇرمىن. شىعارماشىلىعىمنىڭ قانداي بولاتىنىن دا ءوزىم شەشەمىن»، - دەپ جازدى ءانشى ديماش قۇدايبەرگەن.

ءانشى بۇل رەتتە اتا- اناسى مەن دوستارى كوپ قولعابىس ەتەتىنىن جازادى. ول ەڭ الدىمەن قازاقستاننىڭ ارقاسىندا وسىنداي دارەجەگە جەتكەنىن ءسوز ەتتى.

«مەن قازاقستاندا تۋىپ- ءوستىم، قازاقتىڭ اس- سۋىن ءىشىپ، قازاق ۆوكال مۇعالىمىنەن ءتالىم الدىم، قازاق وتباسىندا ءوستىم. مەنى العا جەتەلەيتىن باستى ىنتالاندىرۋشى - مەنىڭ ۇلتىم جانە ەلىم! امەريكا نەمەسە قىتاي بولسىن، مەنىڭ مانسابىم قارقىن الا باستاعاندا حالىقارالىق جارىستارعا جالعىز عانا نيەتپەن باردىم . ول ماقسات - ءوز ەلىمنىڭ ابىرويىن اسقاقتاتۋ. مۇنداي تالاپ- تىلەگىم بولماسا، مۇمكىن مەن شەتەلدە ونەر كورسەتپەس ەدىم. 2013 -جىلعى ۆيدەو تۋرالى ايتار بولسام، دوستار، شىنىمدى ايتسام، مەن بۇل ۆيدەونى قايتادان كورەمىن دەپ ويلاعان جوقپىن، ويتكەنى ونى ۇمىتىپ تا كەتكەن ەدىم.

«رەسەيلىك ارىپتەستەرىمنىڭ الدىندا ءوز انشىلەرىمىزدى قورعاي المادى، ءالى كۇنگە دەيىن بىرەۋگە وكپەلى» دەپ ويلاپ قالماڭىزدار. قاجەتسىز ەستەلىكتەردى ۇمىتا الامىن. سول كەشتە ءوز وتانداستارىمدى قورعاپ سويلەسەم دە، وكىنىشكە قاراي، ول فراگمەنت ەفيرگە ەنبەي قالعان. سول ۆيدەونى ءبىر- بىرىمىزگە تاراتۋدى قويايىقشى، دوستار»، - دەپ جازادى ءانشى Instagram پاراقشاسىندا. ديماش قانشا جىل وتسە دە، سول ۆيدەونىڭ تالقىلانا بەرەتىنىنە قايران قالدى.

«بالا كەزىمنەن سىنعا دايىن بولدىم، وبەكتيۆتى بولسىن- بولماسىن - ءبارىبىر، مەنى رەنجىتۋ وتە قيىن. سول ۆيدەوداعى ادامدار دا ءالى كۇنگە دەيىن قانشا حالىقتان ءسوز ەستىپ جاتىر. اركىمنىڭ ءوز پىكىرى بار، ول ۋاقىت وتە كەلە وزگەرگەن بولۋى مۇمكىن، وزگەرمەۋى دە ىقتيمال. ءبىراق ءبارى وتكەن كۇندە قالدى. اركىمنىڭ ءوز وتباسى، بالالارى بار، مەنىڭشە، ولارعا ادامداردان اۋىر ءسوز ەستۋ وڭاي ەمەس. بۇل ۆيدەونىڭ ءار ۋاقىتتا ءار ەلدە اياق استىنان شىعا كەلەتىنى ماعان ۇنامايدى»، - دەپ تۇيىندەدى ءانشى.