قازاقستان مەن قىتايدىڭ لوگيستيكالىق تيىمدىلىگى 75 پايىزعا ءوستى- شەتەلدەگى قازاق ءتىلدى ب ا ق- قا شولۋ

قازاقستان مەن قىتاي اراسىنداعى تۋريزم سالاسىن دامىتۋ قارالدى - CNR

اپتا سوڭىنا قاراي قىتايلىق ب ا ق- تا وسىنداي تاقىرىپتاعى اقپارات جاريالاندى. ق ح ر مادەنيەت جانە تۋريزم ءمينيسترى حۋ حىپيڭ 24- ماۋسىم كۇنى بەيجىڭدە قازاقستاننىڭ قىتايداعى ەلشىسى نۇرىشيەۆپەن كەزدەستى. ەكى تاراپ ءوزارا ءوزارا ىنتىماقتاستىقتى قۇرۋدى جەدەلدەتۋ سياقتى تاقىرىپتار بويىنشا پىكىر الماستى، دەپ حابارلايدى قىتايدىڭ CNR اقپاراتتىق پورتالى.

ش. نۇرىشيەۆ جاقىن ۋاقىتتا ەكى ەل اراسىنداعى تۇراقتى اۆيارەيستەر قايتا ۇشا باستايتىنىن جانە ونىمەن ادامدار بايلانىسىنىڭ بەلسەندى بولا تۇسەتىنىن ايتقان. سونىمەن قاتار ەكىجاقتى ديالوگتى جانداندىرۋدىڭ قاجەتتىگىنە نازار اۋدارعان.

قازاقستان ەلشىسى قازاقستاندا جانە قىتايدا ءوزارا مادەني ورتالىقتاردى قۇرۋ بۇل باعىتتاعى ەكىجاقتى قاتىناستىڭ دامۋىنا سەرپىن بەرەتىنىن تىلگە تيەك ەتكەن. قازاقستاندىق ديپلومات قىتاي ءمينيسترىن قازاقستاننىڭ تۋريستىك مۇمكىندىكتەرى جانە ق ر ۇكىمەتىنىڭ تۋريزم سالاسىن دامىتۋدىڭ 2025 -جىلعا دەيىنگى مەملەكەتتىك باعدارلاماسىن جۇزەگە اسىرۋ بويىنشا شارالارىمەن تانىستىرعان.

«نۇرىشيەۆ قازاقستاننىڭ ساياحات كاسىبىن دامىتۋدىڭ مەملەكەتتىك جوباسىن اتقارۋ ءۇشىن قولدانعان شارالارىن تانىستىردى. سونداي- اق ول قازاقستان قىتاي ازاماتتارىنا 14 كۇندىك ۆيزاسىز ءجۇرۋ ءتۇزىمىن اتقارۋدى جوسپارلاپ وتىر»، دەپ جازادى قىتايدىڭ «ورتالىق حالىق راديوسى» باسىلىمى.

ايتا كەتەيىك، ق ح ر مادەنيەت جانە تۋريزم ءمينيسترى قازاقستان ۇكىمەتىنىڭ ەلدىڭ تۋريستىك الەۋەتىن دامىتۋ بويىنشا قابىلداپ جاتقان شارالارىن جوعارى باعالادى، سونداي- اق قىتايلىق تاراپتىڭ مادەنيەت ورتالىقتارىن ءوزارا قۇرۋعا دايىن ەكەنىن بىلدىرگەن بولاتىن.

قازاقتىڭ ۇلتتىق «ورتەكە» ءبيى يۋنەسكو- نىڭ تىزىمىنە ەنگىزىلەدى - «ءو ز ا»

قازاقتىڭ ۇلتتىق ءبيى - «ورتەكە» يۋنەسكو- نىڭ تىزىمىنە ەنگىزىلەدى. بۇل تۋرالى وسى اپتادا وزبەكستاننىڭ «ءو ز ا» اقپارات اگەنتتىگى دە «قازاقپاراتقا» سىلتەمە جاساپ حابارلادى.

ونداعى دەرەككە ساي، ساراپشىلار كوميسسياسى 2019 -جىلى ۇلتتىق ءبيدى يۋنەسكو تىزىمىنە ەنگىزۋ تۋرالى ۇسىنىس جاساعان بولاتىن. ايتا كەتۋ كەرەك، قانداي دا ءبىر مۇرانى اتالعان ۇيىمنىڭ تىزىمىنە ەنگىزۋ ءۇشىن قاتىسۋشى ەل ءبىرقاتار تالاپتاردى ورىنداۋى كەرەك. ەڭ الدىمەن مەملەكەت تانىستىرۋ بەينەروليگىن اعىلشىن جانە فرانسۋز تىلدەرىندە ءتۇسىرىپ يۋنەسكو- نىڭ باس شتابىنا ۇسىنىس جولدايدى.

«ورتەكە» ءبيىن ۇكىمەتارالىق كوميتەت قاراۋىنا 2019 -جىلى ۇسىنىلعان بولاتىن. دەگەنمەن ونى يۋنەسكو تاراپىنان ىلگەرىلەتۋ پروتسەسسى بيىل عانا باستالعان. ق ر مادەنيەت جانە سپورت مينيسترلىگىنىڭ باسپا ءسوز قىزمەتى بۇل تۋرالى مالىمدەمە جاساعان بولاتىن.

«قازاقتىڭ ەتنومۋزىكا جانە ەتنوتەاتر سالاسىنداعى زەرتتەۋلەرىندە «ورتەكە» ونەرى تۋرالى دەرەكتەر از. دەگەنمەن كەيبىر عالىمداردىڭ ەڭبەكتەرىندە «ورتەكەنىڭ» 3 مىڭ جىلدان استام ۋاقىت بۇرىن پايدا بولعانى كورسەتىلگەن. بەلگىلى مۋزىكاتانۋشى عالىم احمەت جۇبانوۆ قازاقتىڭ قۋىرشاق تەاترى ءوز باستاۋىن وسى ونەردەن الاتىنىن اتاپ وتكەن. سونىمەن قاتار بۇل تۋرالى عالىم الكەي مارعۇلاننىڭ، بەلگىلى كۇيشى جانە زەرتتەۋشى ابدۋلحاميت رايىمبەرگەنوۆتىڭ، مۇرات وسكەمبايەۆتىڭ جازبالارىندا كەزدەسەدى. بۇدان باسقا «ورتەكە» ەجەلگى قولدانبالى ونەر شەبەرلەرىنىڭ ەڭبەكتەرىنە ارقاۋ بولعان. وعان دالەل تامعالى، ەشكىولمەس، كۇلجاباسى سياقتى ەڭ كونە ەسكەرتكىشتەردە بەينەلەنگەن پەتروگليفتەر. وسىلاردى ەسكەرە كەلە، اتالعان ونەر يۋنەسكو- نىڭ ماتەريالدىق ەمەس مۇراسىنىڭ تىزىمىنە ەنگىزۋە ناقتى لايىق دەپ ەسەپتەيمىز»، - دەپ ءمالىم ەتكەن بولاتىن مينيسترلىكتىڭ باسپا ءسوز قىزمەتى.

ايتا كەتەيىك، ۆەدومستۆو 2013 -جىلدان باستاپ قازاقستاننىڭ ماتەريالدىق ەمەس مادەني مۇرالارىنىڭ ۇلتتىق ءتىزىمىن جاساۋ، ونى يۋنەسكو- عا ەنگىزۋ جۇمىستارىن جۇرگىزىپ كەلەدى. وسى ۋاقىتقا دەيىن قازاق حالقىنىڭ 11 مادەني مۇراسى ۇيىمنىڭ تىزىمىنە كىردى.

قىتاي- قازاقستان لوگيستيكالىق ىنتىماقتاستىق بازاسى 3500-دەن استام قىتاي- ەۋروپا كەزەكشى پويىزىن جونەلتتى - «حالىق گازەتى»

قىتاي- قازاقستان (ليانيۋنگان) لوگيستيكالىق ىنتىماقتاستىق بازاسى 5 جىلدا 3500-دەن استام قىتاي- ەۋروپا پويىزى قاتىناعان. ليانيۋنگان كەدەنىنەن حابارلاعانىنداي، قىتاي مەن قازاقستان لوگيستيكالىق ىنتىماقتاستىق بازاسى 2017 -جىلى پايدالانۋعا بەرىلگەننەن بەرى تۇراقتانعان 6 جوعارى ساپالى باعىت اشىلىپ، ورتالىق ازيانىڭ بەس مەملەكەتىنەن تۇركيا مەن گەرمانيا، رەسەيگە دەيىن كەڭەيدى. ول 104 حالىقارالىق جۇك ستانسالارىن قامتىپ، 3500-دەن استام قىتاي- ەۋروپا كەزەكشى پويىزىن جونەلتتى. بۇل تۋرالى وسى اپتادا قىتايدىڭ «حالىق گازەتى» حابارلادى.

قىتايلىق ب ا ق- تىڭ كەلتىرگەن دەرەگىنە سۇيەنسەك، قىتاي- قازاقستان «ءبىر بەلدەۋ، ءبىر جول» بىرلەسكەن قۇرىلىسىنىڭ نەگىزگى جوباسى رەتىندە قىتاي- قازاقستان لوگيستيكالىق ىنتىماقتاستىعى بازاسى قۇرىلعاننان باستاپ، جۇرتتىڭ قولداۋىنا يە بولدى. سوڭعى بەس جىلدا قىتاي مەن قازاقستان لوگيستيكالىق ىنتىماقتاستىعى بازاسىنىڭ جالپى ترانزيتتىك تيىمدىلىگى 75 پايىزعا ارتقان.

«قازىرگى ۋاقىتتا قىتاي- قازاقستان لوگيستيكالىق ىنتىماقتاستىق بازاسى تەرەڭ سۋ پورتتارىن، مۇحيت ماگيسترالدىق جەلىلەرىن، قىتاي- ەۋروپا- ورتالىق ازيا كەزەكشى پويىزدارىن جانە لوگيستيكالىق ستانتسيالاردى ۇزدىكسىز بايلانىستىردى. اسىرەسە ىندەتتەن بەرى اۋە تاسىمالى مەن كەمە قاتىناسى زارداپ شەكتى. قىتاي- ەۋروپا جۇك پويىزىنىڭ تۇراقتى جانە ءتيىمدى جۇمىسىنىڭ ارقاسىندا قىتاي- قازاقستان لوگيستيكالىق ىنتىماقتاستىق بازاسىنا قۇرىلىس ماشينالارى، ءوندىرىس بولشەكتەرىنەن باستاپ، شاعىن تۇرمىستىق تەحنيكا، كۇندەلىكتى قاجەتتى زاتتارعا دەيىن كوپتەگەن ونىمدەر جينالدى»، دەپ جازادى قىتايلىق ب ا ق.

بايان- ولگيدە اقىندار ايتىسى ءوتتى – janadauir

2002 -جىلى بايان- ولگي ايماعىنىڭ مەكتەپ ءبىتىرۋشى تۇلەكتەرى مەكتەپ بىتىرگەندەرىنە 20 -جىل تولعان مەرەيتويعا وراي 20 ءتۇرلى قوعامدىق- الەۋمەتتىك جۇمىستار ۇيىمداستىردى. سونىڭ ءبىرى - اقىندار ايتىسى قۇرمانحان ءمۇقامادي ۇلى اتىنداعى مۋزىكالى دراما تەاترىندا ءوتتى، دەپ حابارلايدى موڭعوليالىق janadauir اقپاراتتىق پورتالى.

اتالعان ب ا ق- تىڭ دەرەگىنشە، شارانىڭ نەگىزگى ۇيىمداستىرۋشىلارى - ولگي سۇمىن كىشى قۇرىلىمىنىڭ جاۋاپتى مامانى ايتۋعان الەيحان ۇلى، ساگساي سۇمىن اكىمى يساتاي ارىن ۇلى، ساگساي سۇمىن ا ءو ق- نىڭ باستىعى باۋىرجان كابەي ۇلى جانە سەنگەل سۇمىندىق ا ءو ق- نىڭ ءتوراعاسى جانبوتا اقاي قىزى قاتارلى 2002 -جىلعى مەكتەپ ءبىتىرۋشى تۇلەكتەر. «جۇلدە قورى - 2000 ميلليون توگروگ. ايتىستىڭ قورتىندىسى بويىنشا ىڭكاربەك ءادىلقان ۇلى ءبىرىنشى، سەرۋەن ءازىم ۇلى ەكىنشى، امانجول قۋانتقان ۇلى ءۇشىنشى ورىنداردى ءبولىستى»، دەپ جازادى janadauir.

8 ميلليون جىلدىق جانۋار قالدىقتارى تابىلدى - TRT

تۇركيانىڭ دەنيزلي پروۆينتسياسىندا 8 ميلليون جىل بۇرىن ءومىر سۇرگەن جانۋارلاردىڭ قالدىقتارى تابىلدى. باستاپقى مالىمەتتەر بۇل ايماقتا 15 ءتۇرلى جانۋار ءتۇرى بار ەكەنىن انىقتالدى، دەپ حابارلايدى «تۇركيا راديو تەلەديدار» اقپاراتتىق اگەنتتىگى.

اتالعان ب ا ق- تىڭ دەرەگىنشە، تاۆاس اۋدانىنداعى قازبا جۇمىستار كەزىندە ءپىل، ءمۇيىزتۇمسىق، كەرىك، جىلقى، بوكەن، قاراقۇيرىق، جانە قۇمىرسقا جەگىش سياقتى جانۋارلارعا قالدىقتارى تابىلعان. الداعى ۋاقىتتا زەرتتەۋ جۇمىستارىنىڭ تولىق قورىتىندىسى شىقپاق. قازبا قالدىقتارىنىڭ شامامەن 8 ميلليون جىلدىق ەكەنى جانە ايماقتاعى زەرتتەۋلەردىڭ جالعاسىپ جاتقانى بەلگىلى بولدى.

اۆتور: بەيسەن سۇلتان