التىن وردانىڭ 750 جىلدىعى: اتىراۋدا حالىقارالىق كونفەرەنسيانىڭ پانەلدىك وتىرىسى باستالدى

تۇركيا، ا ق ش، جاپونيا، ۋكراينا، رەسەي جانە قازاقستان عالىمدارىنىڭ باسىن قوسقان اۋقىمدى كونفەرەنسيا تاقىرىپتىق مازمۇنىنا وراي 5 پانەلگە بولىنگەن. مەملەكەت تاريحى ينستيتۋتى ديرەكتورىنىڭ ورىنباسارى، اكادەميك، تاريح عىلىمدارىنىڭ دوكتورى بۇركىتباي اياعان مودەراتورلىق ەتەتىن 1-پانەل «التى وردا ءداۋىرىنىڭ مادەني مۇراسى تاريحي دەرەكتەردە» دەگەن تاقىرىپقا ارنالماق. بۇل پانەلدە قازاقستاننىڭ ءوز عالىمدارىنان بولەك جاپونيا، ۋكراينا، رەسەي عالىمدارى بايانداما وقيدى.

تاريح عىلىمدارىنىڭ دوكتورى، پروفەسسور ماديار ەلەۋوۆ مودەراتورلىق ەتەتىن 2 پانەلدە «ارحەولوگيالىق قۇندىلىقتاردىڭ تاريحي ماڭىزى» دەگەن تاقىرىپ تالقىلانادى.

كونفەرەنسيانىڭ 3-پانەلى «ۇلىق ۇلىس ءداۋىرى فولكلورىنىڭ ەرەكشەلىكتەرى» دەگەن تاقىرىپقا ارنالسا، 4-پانەل قاسىم حان مەن سارايشىقتىڭ قازاق مەملەكەتتىلىگىنە قوسقان ۇلەسى تۋرالى باياندامالار تالقىعا تۇسەدى. 5-پانەل سۋرەتشىلەر پلەنەرىنە ارنالىپ وتىر. قازاقستاننىڭ ەڭبەك سىڭىرگەن قايراتكەرى ءىليا جاقانوۆ باستاعان قىلقالام شەبەرلەرى مەن ديزاينەرلەر التىن وردا وركەنيەتىن ناسيحاتتايتىن تۋىندىلارىن ورتاعا سالادى.

پلەنارلىق وتىرىستى اشقان ق ر پرەزيدەنت اكىمشىلىگى باسشىسىنىڭ ءبىرىنشى ورىنباسارى داۋرەن ابايەۆ مەملەكەت باسشىسى قاسىم- جومارت توقايەۆتىڭ قۇتتىقتاۋىن وقىدى. پلەنارلىق وتىرىس بارىسىندا اتىراۋ وبلىسىنىڭ اكىمى ماحامبەت دوسمۇحامەدوۆ كونفەرەنسيا قوناقتارىنا سارايشىق جوباسىن تانىستىرادى. سونداي- اق، ق ر ءبىلىم جانە عىلىم ءمينيسترى اسحات ايماعامبەتوۆ پەن داۋرەن ابايەۆ تا قۇتتىقتاۋ ءسوز الادى.

كونفرەنسيانىڭ بۇل بولىگىندە قازاقستاندىق تاريحشىلارمەن بىرگە ا ق ش عالىمى يۋلاي ءشامىلوعلى «التىن وردا قالالارى جانە سارايشىق» اتتى بايانداما وقيدى. پلەنارلىق وتىرىس اياسىندا كونفەرەنسيانىڭ قارارىن قابىلداۋ جوسپارلانعان.

ەسكە سالساق، كەشەدەن بەرى اتىراۋ وبلىسىندا «ۇلىق ۇلىس - التىن وردا» اتتى حالىقارالىق عىلىمي- پراكتيكالىق كونفەرەنسيا ءوتىپ جاتىر. بۇگىن شارانىڭ پانەلدىك وتىرىستارى باستالدى. ول 5 تاقىرىپقا بولىنگەن. كونفەرەنسيا اياسىندا شارا قوناقتارى مەن عالىمدارعا سارايشىق اۋىلىنداعى ەتنواۋىل تانىستىرىلادى.

اۆتور: ەسىمجان ناقتىباي