قىزىلوردالىق 6 ازاماتتىڭ كوروناۆيرۋستى قايدان جۇقتىرعانى ءمالىم بولدى

قازىر ايماقتا ونى جۇقتىرعان بارلىعى 24 ادام بار، دەپ حابارلايدى قازاقپارات ءتىلشىسى.

بۇل تۋرالى وبلىستىق دەنساۋلىق ساقتاۋ باسقارماسىنىڭ باسشىسى جاقسىلىق ابدۋسامەتوۆ وڭىرلىك كوممۋنكيكاتسيالار قىزمەتىندە وتكەن بريفينگتە ءمالىم ەتتى.

«سوڭعى ەسەپ بويىنشا قىزىلوردا وبلىسىندا كوروناۆيرۋس ينفەكسياسىن جۇقتىرعان ناۋقاستار 24 ادامدى قۇرايدى. بۇگىنگى تىركەلگەن ناۋقاستاردىڭ ەكەۋى - قارماقشىدان شىقسا، ەكەۋى جاڭاقورعاندا، بىرەۋى - شيەلى اۋدانىندا انىقتالدى. سونداي-اق، ءبىر ادام وبلىس ورتالىعىنان تىركەلدى. قارماقشىداعى ءبىر ناۋقاس الماتى قالاسىنان كەلگەنى بەلگىلى بولىپ وتىر. ەكىنشى ناۋقاستىڭ قايدان جۇقتىرعانى زەرتتەلۋدە. ال جاڭاقورعان اۋدانىنداعى ەكى ادام دا ينفەكسيانى بۇرىن جۇقتىرعان ناۋقاستارمەن قارىم- قاتىناستا بولعاندار. شيەلى اۋدانىنداعى ناۋقاستىڭ دا جاعدايى سوعان ۇقساس، بۇرىن اۋىرعان ناۋقاسپەن تىعىز بايلانىستا بولعان. ال، قىزىلوردا قالاسىندا انىقتالعان ادام وبلىستا ەڭ ءبىرىنشى انىقتالعان ناۋقاسپەن قارىم- قاتىناستا، تىعىز بايلانىستا بولعان»، - دەدى جاقسىلىق ابدۋسامەتوۆ.

باسقارما باسشىسى وبلىس تۇرعىندارىنىڭ ساقتىق شارالارىنا باسا نازار اۋدارۋ قاجەتتگىن ايتادى. ويتكەنى، سوڭعى تىركەلگەن ناۋقاستار بۇرىن جۇقتىرعان ادامدارمەن قارىم- قاتىناستا بولعاندار. بۇدان بۇرىن قىزىلوردا قالاسى مەن جاڭاقورعان اۋدانى كارانتينگە جابىلدى.