الماتىدا وقۋ جىلى باستالعالى 615 بالا كوروناۆيرۋس جۇقتىردى

بۇل تۋرالى الماتى قالالىق ءبىلىم باسقارماسى باسشىسىنىڭ ورىنباسارى قايرات جۇمانوۆ ونلاين بريفينگ بارىسىندا ءمالىم ەتتى، دەپ حابارلايدى قازاقپارات ءتىلشىسى.

ونىڭ ايتۋىنشا، الماتىدا 282 ءبىلىم بەرۋ ورداسىندا 303 مىڭنان استام وقۋشى ءبىلىم الىپ جاتىر. جاڭا وقۋ جىلىندا مەكتەپتەر قاتاڭ كارانتين شارالارى بويىنشا وقۋشىلاردى قابىلداۋدا. دەگەنمەن، وقۋشىلار اراسىندا كوروناۆيرۋستى جۇقتىرۋ جاعدايلارى كەزدەسىپ وتىر.

«ساباق باستالماس بۇرىن وقۋشىلار مەكتەپتە ماسكا تاعىپ، كارانتين شاراسى قاتاڭ بولاتىنى اتا-انالارعا ەسكەرتىلدى. سونداي-اق ءار سىنىپقا جەكە بولمە بەرىلدى. ونىڭ ۇستىنە، باستاۋىش سىنىپتار بولەك ەسىكتەن كىرەتىندەي ەتىپ جاسادىق. وقۋشىلاردىڭ بارلىعى بۇل شەكتەۋلەرگە بەيىمدەلىپ، ۇيرەنىپ قالدى. دەگەنمەن، ساباق باستالعالى 615 بالانىڭ ۆيرۋس جۇقتىرعانى انىقتالدى، ولاردىڭ 314 ءى جازىلىپ، ساباققا قايتا ورالدى. 311 وقۋشى ونلاين فورماتتا وقىپ جاتىر»، - دەدى ول.

سونداي-اق ول وقۋشىلار مەن مۇعالىمدەردىڭ قاۋىپسىزدىگى الدىڭعى ورىندا ەكەنىن، سوندىقتان مەكتەپتەگى شەكتەۋ شارالارى ساقتالاتىنىن جەتكىزدى.