ەلوردادا تۇران داڭعىلىنداعى كولىك جىلدامدىعى 60 شاقىرىمنان اسپاۋى ءتيىس

بۇل جايىندا نۇر-سۇلتان قالالىق پوليتسيا دەپارتامەنتىنەن ءمالىم ەتتى، دەپ حابارلايدى قازاقپارات ءتىلشىسى.

«ەلوردادا تۇران داڭعىل بويىنداعى جول ءجۇرىسى قاۋىپسىزدىگىن قامتاماسىز ەتۋ ماقساتىندا سىعاناق كوشەسىنەن كەرەي-جانىبەك كوشەلەرىنە دەيىنگى ۋچاسكەدە جىلدامدىق رەجيمى ساعاتىنا 80 شاقىرىمنان 60 شاقىرىمعا دەيىن تومەندەتىلدى. جىلدامدىق رەجيمىن بۇزۋ فاكتىلەرىن تىركەۋ وسى جىلدىڭ 10- ماۋسىمىنان باستالادى. بۇعان دەيىن اتالعان ۋچاسكەدە ەكى باعىتتا دا قوعامدىق كولىكتەرگە ارنالعان «Bus line « جولاعى ەنگىزىلگەن بولاتىن»، - دەلىنگەن دەپارتامەنت اقپاراتىندا.

دەپارتامەنت مالىمەتىنشە، ەلوردا تۇرعىندارىنىڭ 65-70 پايىزى كۇن سايىن قوعامدىق كولىك قىزمەتىن پايدالانادى. وسىعان وراي نۇر-سۇلتان قالالىق اكىمدىگى قوعامدىق كولىكتىڭ قوزعالىسىنا ارناۋلى جولاقتار ەنگىزىپ جاتىر. قوعامدىق كولىكتەرگە ارنالعان مۇنداي جولاقتاردى ارناۋلى قىزمەتتەردىڭ كولىك قۇرالدارى دا پايدالانا الادى.