ەلوردادا بويجەتكەن قىزعا شابۋىل جاساعان 60 جاستاعى ەر ادام ۇستالدى

جابىرلەنۋشىنىڭ ايتۋىنشا وقيعا ساعات 22.00 دە بولعان. بەلگىسىز ەر ادام ارتىنان جۇگىرىپ كەلىپ، جەرگە قۇلاتپاقشى بولعان جانە قولىنان ۇيالى تەلەفونىن تارتىپ العىسى كەلگەن.

كومەك سۇراپ ايقايلاعان داۋىس ءوتىپ جاتقان ادامداردىڭ نازارىن اۋدارعان. قىلمىسكەر قورىققاننان وقيعا ورنىنان قاشىپ كەتكەن. توناۋ جاساۋعا وقتالعانى تۋرالى حابارلامانى العاننان كەيىن پوليتسيا قىزمەتكەرلەرى وقيعا ورنىنا تەز ارادا باردى.

جەدەل ىزدەستىرۋ بارىسىندا كۇدىكتى ۇستالدى. جاپا شەككەن بويجەتكەن پوليتسياعا جەتكىزىلگەن كۇدىكتىنى تانىدى.

تەرگەۋ جۇرگىزۋ بارىسىندا كۇدىكتىنىڭ بۇرىن ەكى ايەل ادامعا شابۋىل جاساپ، وقيعا ورنىنان قاشىپ كەتكەن توناۋشىعا ۇقسايتىنى انىقتالدى.

جابىرلەنۋشىلەردىڭ ءبىرىنىڭ ايتۋىنشا، كەشكە جاقىن ۇيىنە كەلە جاتقاندا بەلگىسىز ادام باسىنان بىرنەشە رەت ۇرىپ، قولىنان نوۋتبۋگىن، جەكە زاتتارى سالىنعان سومكەسىن، ۇيالى تەلەفونىن تارتىپ العان.

سودان سوڭ بەلگىسىز باعىتقا قاشىپ كەتكەن. ەكىنشى جابىرلەنۋشىنىڭ ايتۋىنشا، ۇيىنە قايتىپ كەلە جاتقاندا قارسى كەلە جاتقان ەر ادام قاسىنان ءوتىپ كەتىپ، كەنەتتەن ارتقا بۇرىلىپ، ۇيالى تەلەفونىن تارتىپ العان.

ۇستالعان ادام وزبەكستان رەسپۋبليكاسىنىڭ ازاماتى بولىپ شىقتى. جاساعان ءىس-ارەكەتىن مويىندادى. ايەلدەردىڭ ءبىرىنىڭ نوۋتبۋگىن جانە جەكە زاتتارىن جەرگە كومىپ، تىعىپ قويعان.

ۇستالعان ادام ۋاقىتشا ۇستاۋ يزولياتورىنا قامالدى. قىلمىستىق ءىس قوزعالدى. تەرگەۋ امالدارى جۇرگىزىلۋدە.