تۇركىستاندا 5 ادامنىڭ ولىمىنە سەبەپشى بولعانداردىڭ كىناسىن دالەلدەۋ ءۇشىن جەتى اي تەرگەۋ ءجۇردى

ەسكە سالا كەتەيىك، وتكەن جىلدىڭ اقپان ايىندا ۋلى گازدان ۋلانۋ سالدارىنان ايەل مەن ونىڭ كامەلەتكە تولماعان 4 بالاسى قازا تاپقان بولاتىن. كوپبالالى انا 41 جاستا ەدى. ال، ەڭ كىشى بالاسى 4 جاستا. توتەنشە وقيعادان تەك شىمكەنتتە ەم قابىلداپ جاتقان وتاعاسى عانا امان قالدى. اتالعان ءىس بويىنشا تەرگەۋ شامامەن جەتى ايعا سوزىلدى. ءتۇرلى ساراپتامالار جۇرگىزىلىپ، دالەلدەر جيناقتالدى. ناتيجەسىندە ايىپتاۋ اكتىسى بار ءىس سوتقا جولدانعان بولاتىن.

«بولاشاقتا مۇنداي قايعىلى جاعدايدى بولدىرماۋ مەن الدىن الۋ ءۇشىن ءبىز اتالعان ءىس بويىنشا مۇقيات جۇمىس ىستەدىك. ق ر ق ك 306-بابى 3-بولىگى بويىنشا سوتقا دەيىنگى تەرگەۋ جۇرگىزىلدى. بىردەن سوت- تەحنولوگيالىق ساراپتاما تاعايىندادىق. ناتيجەسىندە ماماندار گاز جەلىلەرىن ورناتۋ جانە مونتاجداۋ 4.03-01-2011 ج. ق ر قۇرىلىس نورمالارىنا سايكەس كەلمەيدى دەگەن قورىتىندى بەردى. ياعني، گاز جابدىقتارىن ورناتۋ كەزىندە جاۋاپتى ماماندار ءبىرقاتار قاتەلىك جىبەرگەن. ەڭ باستىسى، تۇتىنۋشىلاردىڭ قاۋىپسىزدىگى قامتاماسىز ەتىلمەگەن، ال بۇل ارينە، ادام ولىمىنە الىپ كەلەدى»، - دەدى وبلىستىق پوليتسيا دەپارتامەنتى تەرگەۋ باسقارماسىنىڭ باستىعى، پوليتسيا پولكوۆنيگى نۇرماحان جالعاسوۆ.

تۇركىستان قالاسىنىڭ سوتى اتالعان ءىس بويىنشا ۇكىم شىعاردى. ەكى بىردەي گاز كومپانياسىنىڭ ديرەكتورى 4 جىلعا باس بوستاندىعىنان ايرىلدى.

اۆتور: قايرات زاينيشيەۆ