وزبەكستان تۇركىستانعا سىي رەتىندە 5 مىڭ ورىندىق مەشىت سالۋدا

وزبەكستان مەملەكەتىنىڭ تۇركىستانعا تارتۋى رەتىندە سالىنىپ جاتقان مەشىتتىڭ قۇرىلىسىن كەلەر جىلى اياقتاۋ جوسپارلانعان. ساۋلەتى ەرەكشە يسلام ورتالىعىنىڭ ىشكى جانە سىرتقى بەزەندىرىلۋى شىعىس ناقىشىندا جۇرگىزىلۋدە. جاڭا جوبا جان- جاقتى زەردەلەنىپ، الەم ەلدەرىندەگى وزىق تاجىريبەلەر ەسكەرىلگەن. مەشىت ىرگەسىنىڭ بەرىك بولۋى ءۇشىن وزىندىك تەحنولوگيا ازىرلەنگەن.

يسلام ورتالىعىنىڭ جالپى كولەمى - 20 مىڭ شارشى مەتر. ايتا كەتەيىك، بۇگىن وبلىس اكىمى ءومىرزاق شوكەيەۆ تۇركىستان قالاسىنداعى قۇرىلىس الاڭدارىن ارالاپ، جاۋاپتى باسشىلارعا ناقتى تاپسىرمالار جۇكتەدى. قازىرگى تاڭدا وبلىس ورتالىعىنىڭ اكىمشىلىك- ىسكەرلىك ورتالىعىندا 60 تۇرعىن ءۇي بوي كوتەردى. سونداي- اق اكىمشىلىك عيماراتى بار 20 قاباتتى تۇرعىن ءۇي قۇرىلىسى ءجۇرىپ جاتىر. وبلىس اكىمى بيزنەس ورتالىعىنىڭ قۇرىلىسىمەن دە تانىستى. اكىمشىلىك- ىسكەرلىك ورتالىقتا ورنالاسقان زاماناۋي عيماراتتىڭ 13 قاباتىندا قۇرىلىس جۇمىستارى ءجۇرىپ جاتىر.

بۇدان بولەك، ءومىرزاق شوكەيەۆ تۇركىستاندا سالىنىپ جاتقان الەمدىك ستاندارتتارعا ساي مۇز ايدىنىندا بولدى. 1200 ادامعا لايىقتالعان مۇز ايدىنى كەلەر جىلى پايدالانۋعا بەرىلەدى دەپ جوسپارلانىپ وتىر.

اۆتور: اينۇر اقبايەۆا