قازاقپارات كۇنتىزبەسى: 5- ناۋرىز

ەستە قالار وقيعالار

1996-جىلى اقمولا وبلىستىق قازاق مۋزىكالىق-دراما تەاترى «اقان سەرى-اقتوقتى» پەساسىنىڭ (رەجيسسەر ج. وماروۆ) قويىلىمىمەن اشىلدى. سول جىلى تەاترعا ش. قۇسايىنوۆتىڭ ەسىمى بەرىلدى. تەاتردىڭ العاشقى كوركەمدىك جەتەكشىسى، باس ديرەكتورى - م. وسپانوۆ.

2010-جىلى جاپونيانىڭ عىلىمي-تەحنولوگيالار ورتالىعى بولىپ ەسەپتەلەتىن حوككايدو ارالىندا ورنالاسقان ساپپورو قالاسىندا قازاقستان رەسپۋبليكاسى قۇرمەتتى كونسۋلدىعىنىڭ سالتاناتتى اشىلۋ ءراسىمى ءوتتى.

2010-جىلى بريۋسسەلدە ق ر ەلشىلىگى مەن ەۋروپالىق حالىقارالىق قاتىناستار ينستيتۋتى «قازاقستاننىڭ ە ق ى ۇ- عا ءتوراعالىعى» تاقىرىبىندا كونفەرەنسيا وتكىزدى.

2011 -جىلى استاناداعى تاۋەلسىزدىك سارايىندا قازاقستان ايەلدەرىنىڭ سەزى ءوتتى. سەزدى ق ر پرەزيدەنتى جانىنداعى ايەلدەر ءىسى جانە وتباسىلىق-دەموگرافيا ساياساتى ۇلتتىق كوميسسياسى ۇيىمداستىردى.

2012 -جىلى استانادا ۇلتتىق انا مەن بالا عىلىمي ورتالىعى بىرىككەن حالىقارالىق كوميسسيا (اعىل. Joint Commission International، قىسقاشا JCI) رەسمي تۇجىرىمىن الدى. بۇل پوستكەڭەستىك كەڭىستىكتە وسىنداي مارتەبەلى دارەجەگە جەتكەن العاشقى كلينيكا.

الەمدە JCI اككرەديتاتسياسىنان وتكەن 300 گە جۋىق مەديتسينالىق مەكەمە بار.

2012 -جىلى شۆەيتساريانىڭ جەنيەۆا قالاسىندا قازاقستان رەسپۋبليكاسىنىڭ دۇنيەجۇزىلىك ساۋدا ۇيىمىنا (د س ۇ) كىرۋى بويىنشا كەلىسسوزدەر ءوتتى.

2013 -جىلى قازاقستان مەن جەتىسۋ ءوڭىرىنىڭ تانىمال جەرلەرىن كورۋگە مۇمكىندىك بەرەتىن بىرەگەي تۋريستىك مارشرۋت اشىلدى.

2014-جىلى قازاقستاندىق پاراليمپياداشىلار رەسەيدىڭ سوچي قالاسىندا وتكەن «قىسقى پاراليمپيادا - 2014» ويىندارىنا ەلىمىزدىڭ سپورت تاريحىندا العاش رەت التى جولداما جەڭىپ الدى.

2018 -جىلى قازاقستان پرەزيدەنتى نۇرسۇلتان نازاربايەۆ «پرەزيدەنتتىڭ بەس الەۋمەتتىك باستاماسىن» ۇسىندى.

مەملەكەت باسشىسى حالىقتىڭ تۇرمىس جاعدايىن جاقسارتۋعا باعىتتالعان الەۋمەتتىك باستامالاردى العا تارتتى.

بۇل باستامالار:

ءاربىر وتباسىنا باسپانا الۋدىڭ جاڭا مۇمكىندىكتەرىن بەرۋ؛

جالاقىسى تومەن جۇمىسشىلاردىڭ ەڭبەكاقىسىن كوبەيتۋ ءۇشىن ولاردىڭ سالىق جۇكتەمەسىن ازايتۋ؛

جوعارى ءبىلىم الۋدىڭ قولجەتىمدىلىگى مەن ساپاسىن ارتتىرىپ، ستۋدەنت جاستاردىڭ جاتاقحاناداعى جاعدايىن جاقسارتۋ؛

شاعىن نەسيە بەرۋدى كوبەيتۋ؛

ەلدى گازبەن قامتاماسىز ەتۋدى جالعاستىرۋ.

2018 -جىلى بىشكەك قالاسىندا وتكەن گرەمپلينگتەن ازيا چەمپيوناتىندا قازاقستان رەسپۋبليكاسىنىڭ قۇراماسى 30 دان استام مەدال (12 التىن، 12 كۇمىس جانە 9 قولا) ەنشىلەپ، جالپى ەسەپتە ءبىرىنشى ورىن الدى. چەمپيونات العاش رەت وليمپيادا ەرەجەلەرى بويىنشا (گرەك-ريم كۇرەسى جانە ەركىن كۇرەس) وتكەن.

2020 -جىلى حالىقارالىق ايەلدەر ەكونوميكالىق فورۋمى (ءا ە ف) اياسىندا تانىمال قازاقستاندىق جۋرناليست جانە فيلم پروديۋسەرى اقمارال باتالوۆا «ەرەكشە ارتىقشىلىعى بار ايەل» نوميناتسياسىندا ماراپاتقا ۇسىنىلدى.

جۋرناليست بۇل ماراپاتقا سيريا اراب رەسپۋبليكاسىنداعى گۋمانيتارلىق داعدارىستى وبەكتيۆتى تۇردە كورسەتكەنى جانە قازاقستاننىڭ حالىقارالىق ارەنادا بىتىمگەرشىلىك ءرولىن تانىمال ەتكەنى ءۇشىن يە بولدى.