ينسۋلتتان كوز جۇمعان جىگىتتىڭ ورگاندارى 5 ادامنىڭ ءومىرىن امان الىپ قالدى - ترانسپلانتولوگ

None
None
الماتى. قازاقپارات - قازاقستاندا ينسۋلتتان قايتىس بولعان ەر ادامنىڭ دەنە مۇشەلەرى 5 ادامعا ءساتتى اۋىستىرىلدى.

وتا قازاقستاننىڭ بىرنەشە حيرۋرگيالىق ورتالىعىندا جاسالدى، دەپ حابارلايدى قازاقپارات ءتىلشىسى. دونوردىڭ باۋىرى ا. سىزعانوۆ اتىنداعى ۇلتتىق عىلىمي حيرۋرگيالىق ورتالىعىنا جەتكىزىلدى.

«وتا دۇيسەنبى كۇنى جاسالدى. تۇسكى 13:00 شاماسىندا باۋىر پاۆلوداردان جەتكىزىلدى. ياعني، مەن باۋىردى 15:00 شاماسىندا اۋىستىردىم. بۇل وتە كۇردەلى ورگان بولعاندىقتان، وپەراتسيا 6 ساعاتقا سوزىلدى. ورگان 38 جاستاعى باۋىر سيرروزىنا شالدىققان ەر ادامعا سالىندى. قازىر ناۋقاس جانساقتاۋ بولىمىندە جاتىر. دارىگەرلەر جاعدايىن باقىلايدى. اعزا بوتەن ورگاندى قابىلداماۋى دا مۇمكىن»، - دەدى ا. سىزعانوۆ اتىنداعى ۇلتتىق عىلىمي حيرۋرگيالىق ورتالىعى ا ق باسقارما ءتوراعاسى بولاتبەك بايماحانوۆ.

ونىڭ ايتۋىنشا، قايتىس بولعان ادامنىڭ مۇشەلەرىن الۋ ءۇشىن تۋىستارىنان ق ر «حالىق دەنساۋلىعى جانە دەنساۋلىق ساقتاۋ جۇيەسى» كودەكسىنە سايكەس رۇقسات الىنعان.

«قايتىس بولعان جىگىتتەن وكپەسى، جۇرەگى، باۋىرى، 2 بۇيرەگى الىندى. ول جىگىت ينسۋلتتان كوز جۇمعان بولاتىن. ترانسپلانتاتسيا بىرنەشە قالادا ءوتتى. ءبىر ادامنىڭ مۇشەلەرى بىرنەشە ادامنىڭ ءومىرىن قۇتقاردى»، - دەدى ول. ونىڭ ايتۋىنشا، وتا تەگىن جاسالعان.

«قازاقستان ازاماتتارىنا وتا تەگىن جاسالادى، ال شەتەلدىكتەرگە - اقىلى. قازىر قالادا 500 گە جۋىق پاتسيەنت ترانسپلانتاتسياعا مۇقتاج. بۇل ءتىزىم ءجيى وزگەرىپ تۇرادى»، - دەدى ول. بولاتبەك بايماحانوۆ وتاندىق دارىگەرلەردىڭ كاسىبي بىلىكتىلىگىن جوعارى باعالادى.

«ءبىز بىرنەشە جىلدان بەرى ترانسپلانتولوگيامەن اينالىسىپ كەلەمىز. اينالاسى 6 ساعات ىشىندە ورگاندى الىپ، مۇقتاج ادامعا اۋىستىرىپ ۇلگەرۋ - الەمدىك دەڭگەي دەسە دە بولادى. مۇنداي ناتيجە ەۋروپانىڭ كەيبىر ەلدەرى، ءتىپتى ا ق ش پەن جاپونيادا جوق»، - دەدى مامان. پروفەسسور قازاقستاندا الماتى، نۇر-سۇلتان، شىمكەنت، اقتوبە قالالارىندا عانا ترانسپلانتاتسيا جاسالاتىنىن ايتتى. بۇيرەكتى بارلىق قالانىڭ ماماندارى اۋىستىرسا، باۋىردى تەك ەكى قالادا، ءبىر قالادا جۇرەك پەن وكپەنى اۋىستىرادى.


سوڭعى جاڭالىقتار