بالالارىنىڭ تۇنگى قىدىرىسى ءۇشىن 52 اتا-انا جازاعا تارتىلدى

سولتۇستىك قازاقستان وبلىسى پوليتسيا دەپارتامەنتى باسپا ءسوز قىزمەتىنىڭ مالىمەتىنشە، بۇگىندە يۋۆەنالدىق پوليتسەيلەردىڭ جۇمىسى قىزعان. ىندەتتى جاپپاي جۇقتىرۋ قاۋپىنە بايلانىستى جازعى دەمالىس لاگەرلەرى مەن ۇيىرمە-كلۋبتار جۇمىسى توقتاپ تۇر.

سوندىقتان جاس وسپىرىمدەرگە قاجەت ءتيىستى قاداعالاۋ جەتكىلىكسىز. پەتروپاۆلدا يۋۆەنالدىق پوليتسيا بولىمشەلەرىنىڭ قىزمەتكەرلەرى مۇعالىمدەرمەن بىرلەسە ءۇي-ءۇيدى ارالاپ، جاس وسپىرىمدەرمەن كەزدەسەدى، ءتۇسىندىرۋ جۇمىسىن جۇرگىزەدى.

ماقسات - قاداعالاي وتىرىپ، بالالاردىڭ ءتۇرلى قىلمىسقا بارۋىنا جول بەرمەۋ. 16 جاستاعى جاس ءوسپىرىم پوليتسەيلەردىڭ ەسەبىندە تۇر. اناسى بالاسىنىڭ تاربيەسىنە ءتيىستى كوڭىل بولمەي، مىندەتىن ورىنداماعانى ءۇشىن ءۇش رەت اكىمشىلىك جاۋاپكەرشىلىككە تارتىلدى.

يۋۆەنالدىق پوليتسەيلەر بۇل بالانى ەرەكشە باقىلاۋعا الدى. ەندى كەزەكتى رەت ءتارتىپ بۇزعان جاعدايدا وتباسىنا قاتىستى ماتەريال پەتروپاۆل قالاسى اكىمدىگى جانىنداعى كامەلەتكە تولماعانداردىڭ ىستەرى جونىندەگى كوميسسيانىڭ قاراۋىنا شىعارىلادى.

«نەگىزىنەن تۇرمىسى تومەن وتباسىنداعى جانە ءتۇرلى ەسەپتە تۇرعان جاس وسپىرىمدەرمەن جۇمىس ىستەيمىز. تۇراقتى تۇردە ءبىلىم مەكەمەلەرى، پروكۋراتۋرا ورگاندارى، ۆولونتەرلەر جانە قوعامدىق ۇيىم وكىلدەرىمەن بىرلەسكەن رەيد جۇرگىزىلىپ تۇرادى. مۇددەلى ۆەدومستۆولاردىڭ جانە قوعامدىق ۇيىمداردىڭ قولداۋ كورسەتۋى وتە ماڭىزدى. اتا-انالاردى دا تۇسىنۋگە بولادى، قازىرگى قيىن جاعدايدا بالالارىنىڭ بوس ۋاقىتىن ۇيىمداستىرۋعا مۇمكىندىگى جوق»، - دەيدى س ق و پ د ج پ ق باسقارماسى باستىعىنىڭ ورىنباسارى الەكساندر روزباح.

جازعى دەمالىس باستالعالى بالالارىنىڭ تۇنگى قىدىرىسى ءۇشىن 52 ادام جاۋاپكەرشىلىككە تارتىلدى.

پوليتسەيلەردىڭ ايتۋىنشا، كەيدە اتا-انالار بالالارىن ەرەسەك تۋىستارىنا ەرتىپ جىبەرەدى. ساعات 23.00 دەن كەيىن بالالارعا تەك اتا-انالارىمەن نە زاڭدى وكىلدەرىمەن ۇيدەن تىس جەردە بولۋعا رۇقسات ەتىلەدى.

سونداي-اق بالالارى سپيرتتىك ىشىمدىك ىشكەنى ءۇشىن 7 اتا-انا جاۋاپ بەردى. بۇدان باسقا، ءبىر اي ىشىندە جاس وسپىرىمدەردىڭ جوعالۋىنىڭ 21 دەرەگى تىركەلدى. ءتارتىپ ساقشىلارىنىڭ ايتۋىنشا، بالالار ءوز بەتىنشە ۇيدەن كەتۋ ارقىلى ءوزىنىڭ ەركىندىگىن جانە تاۋەلسىزدىگىن كورسەتكىسى كەلەدى.