قان تاپسىرۋ ادام ءومىرىن 5-7 جىلعا ۇزارتادى

قاندى تەك جاراقات الىپ، ادام ءوزىنىڭ قانىن جوعالتقاندا عانا قۇيمايدى. دونورلىق قان ءتۇرلى وپەراتسيالاردا، ونكوناۋقاستارعا، جاڭا تۋعان نارەستەلەرگە دە كەرەك. سوڭعى دەرەكتەرگە سۇيەنسەك، ەلىمىزدەگى رەسپۋبليكالىق قان ورتالىعىنىڭ ەسەبىندە 18 مىڭ ءوز ەركىمەن قان تاپسىرۋشى تىركەۋدە تۇر.

بارلىق ناۋقاسقا دونورلىق قان جەتۋ ءۇشىن، ءاربىر مىڭ تۇرعىنعا 40 دونور قاجەت ەتىلەدى ەكەن. ەگەر وسى مىڭ ادامنىڭ ىشىنەن بالالاردى، قارت ادامداردى جانە مەديتسينالىق نۇسقاۋلىقتار بويىنشا قان تاپسىرا المايتىنداردى سىزىپ تاستاعاندا، ءاربىر دەنى ساۋ ادامنىڭ دونور بولۋعا مۇمكىندىگى بار.

كىم دونور بولا الادى؟

18 جاسقا تولعان، سالماعى ەلۋ كەلىدەن جوعارى، دەنساۋلىعىندا كىناراتى جوق كەز كەلگەن قازاقستاننىڭ ازاماتى بولا الادى. سونىمەن قاتار, ونىڭ گەموگلابينى 120 گ/ل- دەن تومەن بولماۋى شارت. بۇل رەتتە قان تاپسىراتىن ادامنىڭ ەسىرتكىگە، تەمەكى مەن الكوگولگە جولاماعانى دا ماڭىزدى.

كىم دونور بولا المايدى؟

مىنا تىزىمدەگى جاندار ەشقاشان دونور بولا المايدى:

1. ۆ ي چ- ينفەكسيامەن؛

2. گەپاتيتپەن؛

3. ونكولوگيالىق اۋرۋمەن؛

4. قان اۋرۋلارىمەن اۋىرعاندار.

وعان قوسا:

- ج ر ۆ ي، تۇماۋ نەمەسە سۋىق ءتيىپ اۋىرساڭىز، ءبىر اي؛

- ءتىس جۇلدىرساڭىز، ون كۇن؛

- ەكپە الساڭىز، ەكپەڭىزگە بايلانىستى ون كۇننەن ءبىر جىلعا دەيىن؛

- انتيبيوتيك قابىلداساڭىز، ءبىر اي؛

- تاتۋيروۆكا، پيرسينگ جاساتساڭىز، ءبىر جىل؛

- ينەمەن ەمدەلەسەڭىز، 12 اي؛

- اياعىڭىز اۋىر بولسا نەمەسە بوسانساڭىز ءبىر جىل؛

- بالا ەمىزىپ ءجۇرىپ، توقتاتقان سوڭ ءۇش اي؛

- ەتەككىردەن كەيىن 10 كۇن.

دونور بولۋ قاۋىپتى مە؟

مامانداردىڭ ايتۋىنشا، دونور بولۋدىڭ ەشقانداي قاۋپى جوق. دونوردان 450 م ل جانە تالداۋ ءۇشىن 50 م ل قان الادى. ادام اعزاسىندا بەس ليترگە جۋىق قان اينالاتىنىن ەسكەرسەك، بۇل مولشەردەگى قان جوعالتۋدىڭ ەش زيانى جوق. ارينە، پروتسەدۋرادان سوڭ، كەيبىرەۋلەر ءوزىن ناشار سەزىنۋى مۇمكىن. سول سەبەپتى دونوردان جاعدايىن ءجيى سۇراپ تۇرادى. وسىعان بايلانىستى دونور قان تاپسىرعان كۇنى جانە ەرتەڭىنە دەمالىس الۋعا قۇقىلى. دونورلار قان تاپسىرۋ بارىسىندا ەشقاشان ينفەكتسيا جۇقتىرىپ المايدى. سەبەبى، قان الۋ ورتالىقتارىندا تەك ءبىر رەتتىك قۇرالدار پايدالانىلادى.

قان تاپسىرۋعا قالاي دايىندالۋ كەرەك؟

پروتسەدۋرا الدىندا دونور ەڭ بولماعاندا ءبىر كۇن ديەتا ۇستاۋى كەرەك: مايلى، قۋىرىلعان، اشى، قاقتالعان تاماق جەمەۋ قاجەت، شوكولود پەن ءسۇت ونىمدەرىن دە ىسىرا تۇرعان ءجون. سونىمەن قاتار, قان تاپسىرۋدان ءۇش كۇن بۇرىن اۋرۋ باساتىن دارىلەر مەن اسپيرين ىشپەۋ مىندەتتى. ال قان تاپسىراتىن كۇنى تاڭەرتەڭگىلىك مىندەتتى تۇردە سۋعا پىسكەن بوتقا مەن شاي ىشكەن ابزال. بارلىق تالاپ وسى.

وزىمەن نە الا بارۋ كەرەك؟

قۇجاتتاردان تەك، جەكە كۋالىگىڭىز كەرەك. دونورلار ءۇشىن اسحانا بارلىق جەردە جۇمىس جاساي بەرمەۋى مۇمكىن. سول سەبەپتى، وزىڭىزبەن ءتاتتى قوسىلعان قارا شايدى تەرموسقا قۇيىپ الىڭىز، كالورياسى كوپ توقاشتىڭ دا پايداسى بار.

دوناتسيا قالاي وتەدى؟

دوناتسيا الىندا دونور بىرنەشە تەكسەرىستەن وتەدى.

1. تىركەۋدەن ءوتۋ، انكەتا تولتىرۋ. وسى جەردە سىزگە قان تاپسىرۋعا بولاتىنىن، نە بولمايتىنىن انىقتايدى.

2. دارىگەر تەكسەرىستەن وتكىزەدى. بۇل ءسىزدىڭ سول كەزدەگى جاي- كۇيىڭىزدى انىقتاۋ ءۇشىن كەرەك.

3. قان تالداماسى. ءسىزدىڭ دەنساۋلىعىڭىز تۋرالى بارلىق اقپاراتتار وسى تۇستا بەلگىلى بولادى.

وسى ۇشۋىنەن وتكەن ادام عانا دونور اتانا الادى.

قان تاپسىرعان سوڭ نە ىستەۋ كەرەك؟

قان تاپسىرعان سوڭ ءبىر جەرگە اسىعۋدىڭ قاجەتى جوق، سول ستانتسيادا ءتاتتى قوسىلعان قارا شاي ءىشىپ، كۇش بەرەتىن تاعام جەۋ كەرەك. دوناتسيا بارلىق قاۋىپسىزدىكتى ساقتاعاننىڭ وزىندە از- كەم كۇيزەلىسكە ءتۇسىرۋى ىقتيمال. سول سەبەپتى، ءبىر-ەكى كۇندە اۋىر جۇمىستار جاساۋدان اۋلاق بولىڭىز. ياعني، جۇمىس ورنىڭىزدا وزىڭىزگە كوپ جۇكتەمە الماڭىز، فيتنەس زالىن دا ءبىر- ەكى كۇنگە ۇمىتا تۇرىڭىز. قالىپقا كەلۋ ءۇشىن ءۇش كۇن ۋاقىت جەتكىلىكتى. ەمتيحاننىڭ، ماڭىزدى ىستەردىڭ الدىندا قان تاپسىرىپ جۇرمەڭىز.

دونورلارعا قانداي اقى تولەنەدى؟

قان تاپسىراتىن دونورلار ءۇش تۇرگە بولىنەدى:

· اقىلى دونور؛

· وتەۋسىز دونور؛

· اۆتودونور.

اقىلى دونورلارعا - كورسەتكەن قىزمەتىنە قاراي تولەم جاسالادى. ياعني، ولاردىڭ اقىسى ەريتروتسيت، پلازما نەمەسە ترومبوتسيت تاپسىرعانىنا قاراي ەسەپتەلەدى. اقىلى دونورلارعا 2-8 ا ە ك (1 ا ە ك - 2651 تەڭگە) ارالىعىندا قاراجات بەرىلەدى؛

وتەۋسىز دونورلارعا - 0,25 ا ە ك كولەمىندە تولەم جاسالادى. قاندى ەرىكتى تۇردە تاپسىرسا دا، بۇل مولشەردەگى اقى ءبولىنۋى ءتيىس.

اۆتودونورلارعا اقى تولەنبەيدى. ويتكەنى، ولار وتا جاساتاردان 2 اي بۇرىن ءوز قانىن جوسپارلى تۇردە وتكىزەدى. كەيىن سول قاندى وزىنە قۇيعىزادى.

قان تاپسىرۋدىڭ ارتىقشىلىعى قانداي؟

- ءبىر رەت قان تاپسىرۋ ارقىلى ءسىز ءۇش ادامنىڭ ومىرىنە اراشا تۇسەسىز؛

- دارىگەردىڭ الدىنان ءوتىپ، دەنساۋلىعىڭىزدىڭ جاي- كۇيىن ءبىلىپ جۇرەسىز. ياعني ءوز قان توبىڭىزدى، ۆ جانە س گەپاتيتتەردىڭ بار- جوعىن، مەرەز، اي ت ۆ ينفەكتسيالارىنىڭ ماركەرلەرىنە زەرتتەۋدەن ءوتۋ ءۇشىن تەگىن تەكسەرىلەتىن بولاسىز.

- قان تاپسىرعاندا ادام اعزاسى قان جاساۋشى ورگان قىزمەتتەرىن ىنتالاندىرىپ، قان قۇرامىن جاڭارتۋعا تىرىسادى. سونىڭ ارقاسىندا ءسىزدىڭ كوڭىل كۇيىڭىز كوتەرىڭكى بولىپ، ەڭبەككە قابىلەتتىلىگىڭىز ارتا تۇسپەك.

- تۇراقتى قان تاپسىرۋ سەمىزدىكتىڭ الدىن الادى. جاڭا الىنعان قاننىڭ ءبىر دوناتسياسى كەزىندە ءسىز 650 ككال، پلازما دوناتسياسى كەزىندە 450 دەي ككالدى جوعالتاسىز. بۇل ءسىزدىڭ جاس، ادەمى كورىنۋىڭىزگە ىقپال ەتپەك.

- قان تاپسىرۋ جۇرەك پەن تامىر اۋرۋلارىنىڭ قاۋپىن ايتارلىقتاي تومەندەتەدى.

- قاننىڭ جاڭارۋى اسقازان- ىشەك جولدارىنىڭ، باۋىر اۋرۋلارىنىڭ جاقسى پروفيلاكتيكاسى بولىپ سانالادى. سونىڭ ارقاسىندا ءسىزدىڭ بەت- الپەتىڭىز جاقسارىپ، تەرىڭىز تازارا تۇسپەك.

- ءجيى قان تاپسىراتىن دونورلاردىڭ اعزاسى قان جوعالتۋعا ۇيرەنىپ قالادى. ابايسىزدا بولعان قان جوعالتۋ كەزىندە دونورعا اسا قاۋىپ جوق، سەبەبى، ونىڭ اعزاسى بۇل پروتسەستى جاقسى بىلەدى.

- قان ءجيى تاپسىرۋ ونكولوگيالىق اۋرۋعا شالدىعۋ قاۋپىن سەيىلتەدى.

- قان تاپسىرۋ ءسىزدىڭ ءومىرىڭىزدى 5-7 جىلعا ۇزارتادى.

(سۋرەتتەر اشىق عالامتور كوزىنەن الىندى)

EL. KZ