ەكى جىلدا بيزنەستەگى تەكسەرۋلەر سانى 4 ەسە قىسقاردى - پرەزيدەنت
مەملەكەت باسشىسى قاسىم-جومارت توقايەۆ «التىن ساپا» سىيلىعى جەڭىمپازدارىن قۇتتىقتاۋ كەزىندە وسىنداي دەرەك كەلتىردى، دەپ حابارلايدى قازاقپارات ءتىلشىسى.
پرەزيدەنت ءوز سوزىندە 2025 -جىلعا قاراي ونەركاسىپ ەكسپورتىن ءبىر جارىم ەسە ۇلعايتۋ ءۇشىن بارلىق قاجەتتى جاعداي جاسالعانىن اتاپ ءوتىپ، سولاردىڭ نەگىزگىلەرىنە توقتالدى.
«ءبىرىنشى. «ونەركاسىپ ساياساتى تۋرالى» زاڭنىڭ قابىلدانۋى - بيزنەستى مەملەكەت تاراپىنان قولداۋ شەڭبەرىندەگى ەلەۋلى وقيعا بولماق. بۇل زاڭ ماڭىزدى مىندەتتەردىڭ ءبىرى سانالاتىن يندۋستريالاندىرۋدى، وتاندىق وڭدەۋشى كاسىپورىنداردى قولجەتىمدى شيكىزاتپەن قامتاماسىز ەتۋدى جۇيەلى تۇردە شەشۋگە مۇمكىندىك بەرەدى. زاڭ جوباسى، سونداي-اق، جوعارعى جانە ورتا قايتا بولىنىستەگى تاۋارلار ءوندىرىسىن ىنتالاندىرۋعا باعىتتالعان»، - دەگەن مەملەكەت باسشىسى شاعىن كاسىپكەرلەردى تەكسەرۋگە جاريالانعان موراتوريدىڭ ناتيجەسىنە توقتالدى.
«قازاقستاندا ەكىنشى جىل قاتارىنان شاعىن بيزنەستى تەكسەرۋگە موراتوري قولدانىلىپ كەلەدى. ناتيجەسىندە تەكسەرۋلەر سانى ءتورت ەسە قىسقاردى. وزەكتى ەمەس جانە ارتىق رەتتەۋشىلىك تالاپتاردى قىسقارتا وتىرىپ، بيزنەستى اقىلدى رەتتەۋدى ەنگىزۋگە مۇمكىندىك بەرەتىن زاڭنامالىق بازا ازىرلەندى. ءتيىستى زاڭ جىل سوڭىنا دەيىن قابىلدانادى»، - دەدى قاسىم-جومارت توقايەۆ.
اۆتور: ەسىمجان ناقتىباي