اياگوزدەگى 4 بالانىڭ ءولىمى: ءۇش تاربيەلەنۋشىنىڭ دەنەسىندە جاراقات بار

ش ق و پوليتسيا دەپارتامەنتى باسپا ءسوز قىزمەتىنىڭ مالىمەتىنشە، ۆەدومستۆوارالىق جەدەل- تەرگەۋ توبى وبلىستىق پروكۋراتۋرانىڭ باسشىلىق ەتۋىمەن اياگوز قالاسىندا ورنالاسقان بالالار ارنايى الەۋمەتتىك كومەك كورسەتۋ ورتالىعىندا تاربيەلەنۋشىلەر ءولىمى بويىنشا سوتقا دەيىنگى تەرگەۋ جۇرگىزگەن. تەرگەۋ بارىسىندا ەكسگۋماتسيا جاسالىپ، ەكى كوميسسيالىق سوت- مەديتسينا ساراپتاماسى جۇرگىزىلدى. كوميسسيا قۇرامىنا بالالار ينفەكسيونيسى، كارديولوگ، انەستەزيولوگ- رەانيماتولوگ، نەيروحيرۋرگ، پەدياتر، نۇر-سۇلتان قالاسىنان گيستولوگ- ساراپشىلار جانە سانيتاريالىق- ەپيدەميولوگيالىق باقىلاۋ كوميتەتىنىڭ ماماندارى قاتىسقان.

«ساراپتاما قورىتىندىسىنا سايكەس، بالالاردىڭ ءولىمى وكپە فيبروزى، ەكىجاقتى ءىرىڭدى برونح پنيەۆمونياسى سياقتى جاناما اۋرۋلاردىڭ سالدارىنان بولعان. سونداي- اق مايىتتەردى تەكسەرۋ بارىسىندا ءۇش بالادا دەنە جاراقاتى انىقتالدى. الايدا بۇل جاراقاتتاردىڭ تاربيەلەنۋشىلەر ولىمىنە قاتىسى جوق. وسىعان بايلانىستى اۋىر دەنە جاراقاتىن الۋ فاكتىسى بويىنشا قىلمىستىق ءىس بولەك وندىرىسكە شىعارىلىپ، ارى قاراي تەرگەۋ امالدارى جۇرگىزىلمەك»، - دەدى ش ق و پ د باستىعىنىڭ ورىنباسارى ەلدوس زاكيموۆ.

ونىڭ ايتۋىنشا، الەۋمەتتىك كومەك كورسەتۋ ورتالىعىندا تاربيەلەنۋشىلەرگە ءتيىستى مەديتسينالىق كومەك كورسەتپەۋ فاكتىسى بويىنشا قىلمىستىق ءىس سوتقا جولدانعان.

ەستەرىڭىزگە سالا كەتسەك، اياگوزدەگى الەۋمەتتىك كومەك ورتالىعىندا 4 بالا كوز جۇمعان بولاتىن.