اتىراۋدا دەسترۋكتيۆتى ءدىني اعىمنىڭ 44 وكىلىنە 1,9 ميلليون تەڭگە ايىپپۇل سالىندى

اتىراۋ وبلىستىق ءدىن ىستەرى باسقارماسىنىڭ باسشىسى قايروللا كوشقالييەۆتىڭ ايتۋىنشا، اكىمشىلىك قۇقىق بۇزۋشىلىق قۇقىق قورعاۋ ورگاندارىنىڭ قىزمەتكەرلەرىمەن بىرگە الەۋمەتتىك جەلىگە جۇرگىزىلگەن مونيتورينگتە انىقتالعان.

«دەسترۋكتيۆتى اعىمعا ەرۋشىلەردىڭ كوپشىلىگى ءوز پاراقشالارىندا جانە پابليكتەردە قازاقستان رەسپۋبليكاسىنىڭ اۋماعىندا تىيىم سالىنعان ەكسترەميستىك يدەولوگيانى ناسيحاتتاۋعا نەمەسە ۇگىتتەۋگە باعىتتالعان بەينە جانە اۋديوماتەريالداردى جاريالاعان. بيىلعى 8 ايدا باسقارمانىڭ اقپاراتتىق- تالداۋ ورتالىعىنىڭ ماماندارى ءداستۇرلى ەمەس ءدىني باعىتتى ناسيحاتتايتىن 143825 پاراقشانى بۇعاتتادى. سونداي- اق، ءدىني باعىتتاعى اقپاراتتى تاراتاتىن الەۋمەتتىك جەلىلەردەگى پاراقشالاردى زەردەلەۋ ناتيجەسىندە 139240 بەت انىقتالدى. ونىڭ 442 ءسى جات يدەولوگيا ماتەريالدارىن تاراتۋعا ارنالعان. سول سەبەپتەن، ءدىنتانۋ ساراپتاماسىنا جىبەرىلدى»، - دەيدى قايروللا كوشقاليەۆ.

ونىڭ مالىمەتىنە سۇيەنسەك، 8 ايدا مونيتورينگتىك ناتيجەسىمەن ق ر اكىمشىلىك قۇقىق بۇزۋشىلىق تۋرالى كودەكسىنىڭ 453 جانە 490-بابىمەن دەسترۋكتيۆتى ءدىني اعىم وكىلدەرى تاراپىنان 44 اكىمشىلىك قۇقىق بۇزۋشىلىق انىقتالعان. جيناقتالعان ماتەريالدار سوتقا جولدانىپ، سالىنعان ايىپپۇلدىڭ جالپى سوماسى 1917347 تەڭگەنى قۇراعان. قازىر 8 اكىمشىلىك ءىس سوتتا قارالىپ جاتىر. ەسكە سالا كەتەلىك، بۇدان بۇرىن اتىراۋدا 24 ميلليون تەڭگەنىڭ ەسىرتكىسىن ساتپاق بولعان ءدىني اعىم وكىلدەرى ۇستالعانىن جازعان ەدىك.