ەلوردادا 3 جاس ءوسپىرىم بانك «توناماق» بولدى

None
None
نۇر-سۇلتان. قازاقپارات - ەلوردادا الەۋمەتتىك جەلىگە روليك ءتۇسىرۋ ماقساتىندا قوعامدىق ءتارتىپتى بۇزعان كامەلەتكە تولماعاندار ۇستالدى.

بۇل جايىندا نۇر-سۇلتان قالالىق پوليتسيا دەپارتامەنتىنەن ءمالىم ەتتى، دەپ حابارلايدى قازاقپارات ءتىلشىسى.

«ەلورداداعى بانكتەردىڭ ءبىرىنىڭ مەنەدجەرىنەن «102» ارناسىنا بەلگىسىز ادامداردىڭ عيماراتتا جۇرگەنى جانە كليەنتتەرگە قوقان-لوقى جاساعانى تۋرالى حابارلاما ءتۇستى. وقيعا ورنىنا جەتكەن پوليتسيا قىزمەتكەرلەرى فاكتىنى راستاعان جوق. تەكسەرۋ بارىسىندا 14-15 جاستاعى ءۇش جاس ءوسپىرىمنىڭ دوستىق كوشەسى بويىنداعى بانك عيماراتىنا قارجى ينستيتۋتىن وتىرىك توناۋ ۆيدەوسىن ءتۇسىرۋ ءۇشىن كىرگەنى انىقتالدى. ولار ويىنشىق تاپانشا قولدانىپ، ۆيدەو ءتۇسىرىم جاساپ، ودان كەيىن بوي تاسالاعان»، - دەپ اتاپ وتەدى دەپارتامەنتتەن.

پوليتسيا قىزمەتكەرلەرى اتالعان ءۇش جاس ءوسپىرىمدى انىقتاپ، ولاردىڭ زاڭدى وكىلدەرىن ىشكى ىستەر ورگانىنا شاقىرعان.

بالالاردىڭ اتاپ وتۋىنشە، ولار روليك تۇسىرۋمەن اينالىساتىن كينواكادەميادا ءتالىم الادى. ساباق بارىسىندا ولارعا توناۋ ءساتى بەينەلەنگەن روليك ءتۇسىرۋ تاپسىرماسى بەرىلگەن. سەناريگە وراي قىز بالا بانك عيماراتىنا كىرگەننەن كەيىن ويىنشىق تاپانشانى سەرىكتەسىنە كەزەنگەن كەزدە ءۇشىنشىسى ورىن العان ءساتتى كامەراعا ءتۇسىرىپ العان. وسى ۋاقىتتا بانك عيماراتىندا وزگە دە كەلۋشىلەر بولعان.

«اتالعان فاكتى بويىنشا كينواكادەميا باسشىلىعىنا قاتىستى ق ر ا ق ب ت ك- ءتىڭ 128-بابىمەن اكىمشىلىك ءىس قوزعالدى. كامەلەتكە جاسى تولماعانداردىڭ قوعامدىق ءتارتىپتى بۇزعانى ءۇشىن ولاردىڭ زاڭدى وكىلدەرى جاۋاپقا تارتىلدى. اتا-انالارىنىڭ ۇستىنەن ق ر ا ق ب ت ك- ءتىڭ 435-بابىمەن اكىمشىلىك ءىس قوزعالىپ وتىر. جينالعان ماتەريال پروتسەسسۋالدىق شەشىم قابىلدانۋ ءۇشىن نۇر-سۇلتان قالالىق كامەلەتكە تولماعاندار ءىسى جونىندەگى مامانداندىرىلعان اۋدانارالىق سوتىنا جىبەرىلدى»، - دەلىنگەن ۆەدومستۆو اقپاراتىندا.

سوڭعى جاڭالىقتار