قاسىم-جومارت توقايەۆ 35 جىل بۇرىن ەلباسىمەن قالاي تانىسقانىن ايتىپ بەردى

None
None
نۇر-سۇلتان. قازاقپارات - قازاقستان پرەزيدەنتى قاسىم-جومارت توقايەۆ بۇگىن Egemen Qazaqstan گازەتىندە جاريالانعان ماقالاسىندا ەلباسى نۇرسۇلتان نازاربايەۆپەن قالاي تانىسقانىن ايتىپ بەردى، دەپ حابارلايدى قازاقپارات.

«مەنىڭ ەلباسىن العاش كورگەنىمە دە 35 جىلدىڭ ءجۇزى بولىپتى. نۇرسۇلتان ءابىش ۇلى 1985-جىلدىڭ قىركۇيەگىندە قازاق ك س ر مينيسترلەر كەڭەسىنىڭ ءتوراعاسى كەزىندە قىتايعا كەلگەن ەدى. ول كەزدە ەلشىلىكتە جۇمىس ىستەيتىنمىن. سوندا ۇكىمەت باسشىسىنىڭ قىتايلىقتارمەن كەلىسسوز بارىسىندا بايقالعان مول بىلىمىنە، توتاليتاريزم تۇسىندا قالىپتاسقان جايلار جونىندەگى باتىل ويلارىنا، ءسوزىنىڭ جۇيەلىلىگىنە ءبارىمىز قاتتى رازى بولعانبىز. ەلشىلىك قىزمەتكەرلەرىمەن باس-اياعى ەكى جارىم ساعاتقا سوزىلعان بەيرەسمي اڭگىمەدەن كەيىن باس قوسقانىمىزدا مەن ارىپتەستەرىمە قاراپ: «تەگىندە، ءبىز قازاقستاننىڭ بولاشاق باسشىسىمەن سويلەسكەن شىعارمىز» دەدىم. ارادا بەس جىل وتكەندە نۇرسۇلتان نازاربايەۆ ەلىمىزدىڭ باسشىلىعىنا كەلدى. قازاقستاننىڭ تۇڭعىش پرەزيدەنتىنىڭ تاۋەلسىزدىك تاڭىنداعى العاشقى كادرلىق شەشىمدەرىنىڭ ءبىرى مەنىڭ دە تاعدىرىمدى ايقىنداپ بەردى. «بەلاسۋ» اتتى كىتابىمدا: «بۇل ۇلكەن جۇرەكتى ادام مەنىڭ قابىلەتىمە سەندى، سەندى دە ونى ءوزىم تۋىپ- وسكەن قازاقستان يگىلىگى ءۇشىن اياماي جۇمساۋىما جول اشتى» دەپ جازعان بولاتىنمىن» دەپ جازادى مەملەكەت باسشىسى.

ونىڭ ايتۋىنشا، بىرىككەن ۇلتتار ۇيىمى باس حاتشىسىنىڭ ورىنباسارى بولىپ جۇرگەندە الەمگە ايگىلى ساياساتكەرلەردىڭ نۇرسۇلتان نازاربايەۆقا بيىك باعا بەرگەن سوزدەرىن تالاي ەستىگەن.

«حالقىمىز ءۇشىن مەرەيلەندىم. ەلدىڭ پرەزيدەنتىنە عانا ەمەس، ەمىرەنگەن ەتەنە پەرزەنتىنە اينالا بىلگەن نۇرسۇلتان ءابىش ۇلى نازاربايەۆ قاراپايىم ەڭبەك ادامدارىنىڭ وتباسىندا دۇنيەگە كەلدى، قازاق مەكتەبىندە ءبىلىم الدى، ەڭبەك جولىنىڭ باستاۋىندا شويىن قورىتىپ شىڭدالدى. ءوزى تۋىپ- وسكەن الاتاۋدىڭ اسقاق شىڭدارىنداي اسقارالى ارمانىنا ەرتە قول سوزدى. جاستايىنان جۇرتتىڭ جايىن ويلادى، ءوزى دە دومبىرا شەرتىپ، حالىق مۇراسىن جاقسى بىلگەندىكتەن، زيالى قاۋىمعا جاقىن بولدى. ۇيىمداستىرۋشىلىق قابىلەتى مەن ەڭبەككە دەگەن ەرەن سۇيىسپەنشىلىگى جاس جەتەكشىنى باسقارۋ جۇيەسىنىڭ ەڭ بيىك شىڭىنا الىپ كەلدى» دەپ اتاپ ءوتتى قاسىم-جومارت توقايەۆ.


سوڭعى جاڭالىقتار