سايلاۋعا قاتىستى 34 ءوتىنىش ءتۇستى – و س ك

بۇل تۋرالى ق ر و س ك مۇشەسى ەرلان داۋىلبايەۆ ايتتى، دەپ حابارلايدى قازاقپارات ءتىلشىسى.

«سايلاۋ جاريالانعان كۇن – 21-قازاننان باستاپ بۇگىنگە دەيىن ورتالىق سايلاۋ كوميسسياسىنا 34 ءوتىنىش كەلىپ ءتۇستى. بەسەۋى - جەكە تۇلعالاردان، 29 زاڭدى تۇلعالاردان، ونىڭ ىشىندە 13 ب ا ق- تان. كوتەرىلەتىن ماسەلەلەردىڭ سيپاتى بويىنشا وتىنىشتەردى بىلايشا بولۋگە بولادى. 50 پايىزى، ياعني 17 ءوتىنىش «سايلاۋ تۋرالى» زاڭنىڭ نورمالارىن ءتۇسىندىرۋ تۋرالى، 17 پايىزى - سايلاۋ پروتسەسىن ۇيىمداستىرۋ ماسەلەلەرى بويىنشا اقپارات بەرۋ، 12 پايىزى - سايلاۋ زاڭناماسىن جانە و س ك قىزمەتىن جەتىلدىرۋ جونىندەگى ۇسىنىستار، 21 پايىزى - وزگە دە ماسەلەلەر بويىنشا»، - دەدى ول و س ك وتىرىسىندا.

ونىڭ ايتۋىنشا، پاندەميا جاعدايىندا سايلاۋدى وتكىزۋ، بايقاۋشىلاردى تىركەۋ، مۇمكىندىگى شەكتەۋلى ادامداردىڭ سايلاۋ قۇقىقتارىن ىسكە اسىرۋىن قامتاماسىز ەتۋ، سايلاۋ ناۋقانىنا بولىنگەن قاراجاتتى جۇمساۋ، ازاماتتاردى سايلاۋشىلاردىڭ تىزىمىنە ەنگىزۋ، سايلاۋ الدىندا ۇگىت جۇمىستارىن جۇرگىزۋ جانە شەت ەلدە داۋىس بەرۋدى ۇيىمداستىرۋ ءارى وتكىزۋ ماسەلەلەرى بويىنشا كەلگەن ءوتىنىش اۆتورلارىنا جاۋاپ بەرىلدى.

«كورسەتىلگەن كەزەڭ ىشىندە كەلىپ تۇسكەن 34 ءوتىنىشتىڭ ىشىنەن و س ك اپپاراتى تاراپىنان 22-سىنە بەلگىلەنگەن مەرزىمدە ءوتىنىش بەرۋشىلەرگە تولىق جاۋاپ بەرىلدى. 4-ەۋى ورتالىق سايلاۋ كوميسسياسىنىڭ قۇزىرەتىنە كىرمەيتىندىكتەن زاڭدا بەلگىلەنگەن تارتىپپەن مەملەكەتتىك ورگاندارعا قايتا جولداندى. ءبىر قايتا جاسالعان ءوتىنىش قاراۋسىز قالدىرىلدى. ب ا ق-تىڭ ەكى اقپاراتتىق حابارلاماسى و س ك سايتىندا ورنالاستىرىلدى. 5 ءوتىنىش قارالۋدا. ورىندالماعان وتىنىشتەر جوق»، - دەدى ەرلان داۋىلبايەۆ.

اۆتور: مارلان جيەمباي