USD 434.34 EUR 491.93
RUB 5.56 CNY 68.67
جاڭالىقتار

تاۋەلسىزدىكتىڭ 30 جىلدىعى لوندوندا تويلاندى

7 جەلتوقسان 11:04
:ءبولىسۋ
تاۋەلسىزدىكتىڭ 30 جىلدىعى لوندوندا تويلاندى

لوندون. قازاقپارات - لوندوندا تاۋەلسىزدىكتىڭ 30 جىلدىعى ءسان- سالتاناتىمەن اتالىپ ءوتىلدى.

قازاقستاننىڭ ۇلى بريتانياداعى ەلشىلىگى ۇيىمداستىرعان شاراعا جەرگىلىكتى ساياسي، ەكونوميكالىق جانە مادەني يستەبليشمەنتتىڭ وكىلدەرى، جۋرناليستەر، شەتەلدىك ديپلوماتتار جانە قازاق دياسپوراسى قاتىسىپ، قۋانىشقا ورتاقتاستى، دەپ حابارلايدى قازاقپارات ءتىلشىسى.

1991 -جىلى قازاقستان تۋرالى ۇلى بريتانيادا كوپ ادام بىلە بەرمەيتىن. ەل ەگەمەندىگىن العاننان كەيىن تۋرا ءبىر اي وتكەن سوڭ ەكى ەل اراسىندا ديپلوماتيالىق ارىپتەستىك ورناتىلدى. بۇگىندە بىرىككەن كورولدىك قازاقستان ەكونوميكاسىنىڭ ءىرى ينۆەستورلارىنىڭ ءبىرى. 30 جىل ىشىندە كوپتەگەن سالالار بويىنشا ەكىجاقتى قارىم- قاتىناستار ورناتىلىپ، ولار جاڭا ساپالىق دەڭگەيگە كوتەرىلدى. مەرەكەلىك شارا بارىسىندا قوناقتارعا، سونداي- اق، تاۋەلسىزدىك جىلدارىنداعى جەتىستىكتەر مەن قازاقستان- بريتان قاتىناستارى دامۋىنىڭ نەگىزگى كەزەڭدەرى تۋرالى باياندالدى.

قازاقستاننىڭ بىرىككەن كورولدىكتەگى ەلشىسى ەرلان ىدىرىسوۆ تاريحي ولشەم بويىنشا قىسقا ۋاقىت ىشىندە مەملەكەتىمىزدىڭ ورتالىق ازيانىڭ ءىرى ەكونوميكاسىنا اينالا العانىن اتاپ ءوتتى. كەشكە ۇلىبريتانيانىڭ ەۋروپا جانە امەريكا ىستەرى جونىندەگى مەملەكەتتىك ءمينيسترى ۆەندي مورتون ارنايى كەلىپ، جۇرەكجاردى لەبىزىن جەتكىزدى.

«ءۇش ونجىلدىق كولەمىندە ديپلوماتيالىق ارىپتەستىگىمىز نىعايىپ كەلەدى. سىزدەر تاۋارلار مەن قىزمەتتەر ساۋداسىنىڭ كولەمى جىلىنا شامامەن 1,4 ميلليارد ستەرلينگ فۋنت بولاتىن ورتالىق ازياداعى ءبىزدىڭ ءىرى سەرىكتەسىمىزسىزدەر. سونىمەن قاتار قازاقستان ۇلىبريتانيانىڭ كليماتتىڭ وزگەرۋىنە قارسى كۇرەستەگى نەگىزگى جاھاندىق ارىپتەستەرىنىڭ ءبىرى»، - دەيدى مينيستر.

شارادا «قوس ارنا» ەتنوفولكلورلىق ءانسامبلى ۇلىبريتانيا جۇرتشىلىعىن ۇلتتىق ونەرمەن سۋسىنداتتى. جاس ونەرپازدار دومبىرا، قوبىز، سىبىزعى جانە جەتىگەندە ويناپ، جينالعانداردى ۇلى دالانىڭ مۋزىكالىق جاۋھارلارىمەن تانىستىردى. ايدا جاحانبەك ۇلى بريتانياداعى شەففيلد ۋنيۆەرسيتەتىنىڭ مۋزىكا فاكۋلتەتىندە وقيدى، ال ونىڭ ءىنىسى ازامات قۇرمانعازى اتىنداعى قازاق ۇلتتىق كونسەرۆاتورياسى حالىق مۋزىكاسى فاكۋلتەتىنىڭ ستۋدەنتى. كەشتە ولار ء«شيلى وزەن» ءانىن جانە نۇرعيسا تىلەندييەۆتىڭ «اققۋ» كۇيىن ناقىشىنا كەلتىرىپ ورىنداپ، زور قوشەمەتكە يە بولدى. سونىمەن قاتار ۇلتتىق اسپاپتاردىڭ سۇيەمەلدەۋىمەن اعىلشىندارعا ەتەنە تانىس «توبەمنەن تامشىلاعان جاڭبىر» ءانىن ايتىپ، كوپشىلىكتى تاڭ- تاماشا ەتتى.

«بۇل شىعارمالاردى تاڭداعان سەبەبىمىز قازاق حالقىنىڭ ءاربىر اسپابىن جەكەشەلەپ كورسەتۋ جانە دە قازاق اسپاپتارىمەن تەك قانا ءداستۇرلى مۋزىكانى عانا ەمەس سوعان قوسا پوپ جانرىنداعى جانە دجاز جانرىنداعى بۇكىل اندەردى ورىنداۋعا بولاتىندىعىن كورسەتكىمىز كەلدى»، - دەيدى ازامات جاحانبەك.

«قوس ارنانى» تىڭداۋ ارقىلى مەن وتە ەرەكشە اسەرگە بولەندىم. ۇلتتىق اسپاپتاردىڭ داۋسى عاجاپ. دومبىرادان باسقالارىن بۇعان دەيىن ەستىمەگەن ەكەنمىن. «اققۋ» كۇيىن ورىنداعان كەزدە سول قۇستاردى كوز الدىما ەلەستەتتىم. اسىرەسە، اسپاپتاردىڭ كۇشىمەن ولاردىڭ داۋسىن سالعان كەزدە عاجاپ سەزىمگە بولەندىم»، - دەيدى بريتانيالىق دجيل براۋن.

قوناقتار وتاندىق سۋرەتشىلەر مەن ديزاينەرلەردىڭ ەڭبەكتەرى قويىلعان كورمەگە قاتىستى. اتاپ ايتقاندا ولاردىڭ نازارىنا بەلگىلى سۋرەتشى ايعانا ءعاليدىڭ ەڭبەكتەرى، سونداي- اق گلازگوداعى ب ۇ ۇ كليماتتىڭ وزگەرۋى جونىندەگى حالىقارالىق كونفەرەنتسياسىندا قويىلعان قازاقستان بالالارىنىڭ جاھاندىق جىلىنۋ تاقىرىبىنداعى سۋرەتتەرى ۇسىنىلدى. كەش قوناقتارىن «Silk Road Fashion London» كومپانياسىنىڭ قولداۋىمەن قازاقستاندىق ديزاينەر ايدانا وماروۆانىڭ «Omabelle « برەندىنىڭ ۇلتتىق كوستيۋمدەرىن كيگەن مودەلدەر قارسى الىپ، شىعارىپ سالدى. سونىمەن قاتار ەسكى ءداستۇر بويىنشا «سارقىت» رەتىندە قازاقستان تۋرالى جازىلعان كىتاپتار مەن اپورت الماسى سىيعا تارتىلدى.


#الةم  
:ءبولىسۋ
سونداي-اق... وقىڭىز
پئكئر قالدئرؤ
+7
جئبةرؤ
ونلاين قىزمەتكەرلەر
رەداكتور
باقىتجول كاكەش
باقىتجول كاكەش
954-049

مۇراعات