قازاقستان تاۋەلسىزدىگىنە 30 جىل: تۇركيادا ەستەلىك مونەتا شىعارىلدى

بۇل تۋرالى قازاقپارات ەلشىلىككە سىلتەمە جاساپ حابارلايدى.

ءىس-شاراعا قازاقستاننىڭ تۇركياداعى ەلشىسى ابزال ساپاربەك ۇلى، قازاقستاننىڭ ىستانبۇلداعى باس كونسۋلى ءالىم بايەل، تۇركيا تەڭگە سارايىنىڭ ديرەكتورى ابدۋللاھ ياسير شاحين، زيالى قاۋىم وكىلدەرى مەن جۋرناليستەر قاتىستى.

كۇمىستەن سوعىلعان مونەتانىڭ ديزاينىن تەڭگە سارايىمەن بىرلەسىپ ازىرلەگەندىكتەرىن ايتقان باس كونسۋل ءالىم بايەل وندا ەلىمىزدىڭ تەرەڭ تاريحى مەن تۇركى الەمىنىڭ قارا شاڭىراعى رەتىندەگى ءرولىن ايقىنداعاندىقتارىن ايتتى.

ەلشى ابزال ساپاربەك ۇلى مونەتانىڭ باۋىرلاس تۇركيانىڭ قاستەرلى تاۋەلسىزدىگىمىزدىڭ مەرەيلى تويىنا جاساعان ەرەكشە سىيى رەتىندە تۇرىك ەلىنىڭ قازاقستانعا دەگەن ىستىق ىقىلاسىنىڭ بەلگىسى ەكەندىگىن مالىمدەدى.

ءوز كەزەگىندە، ابدۋللاھ ياسير شاحين ءوزى باسقارىپ وتىرعان تۇركيا رەسپۋبليكاسى تەڭگە سارايىنىڭ 1467-جىلدان باستاۋ الاتىنىن ايتا كەلە، قازاقستان تاۋەلسىزدىگىنىڭ 30 جىلدىعىنا وسىنداي تارتۋ جاساۋدىڭ وزدەرى ءۇشىن ۇلكەن قۋانىش ەكەندىگىن جەتكىزدى.

مونەتانىڭ بەت جاعىندا قازاقستاننىڭ مەملەكەتتىك تۋى مەن تۇرىكشە «قازاقستان تاۋەلسىزدىگىنىڭ 30 جىلدىعى» جازۋى ورىن العان.

سىرت جاعىنىڭ ورتاسىندا قازاقستاننىڭ كارتاسى بەينەلەنگەن. كارتانىڭ ىشىندە لاتىن ارىپتەرىمەن قازاقشا «Qazaqstan» دەپ جازىلعان. سونداي-اق، كارتادا قازاق جەرىندەگى ءبىرقاتار تاريحي مەملەكەتتەردىڭ اتاۋلارى تۇرىكشە جازىلعان.

اتاپ ايتقاندا، ولار: ساقتار، عۇندار، تۇرىك قاعاندىعى، التىن وردا مەن قازاق حاندىعى.

ريەۆەرستىڭ ۇستىنگى جاعىندا ورحون-ەنيسەي ەسكەرتكىشتەرىندەگىدەي كونە تۇركى جازۋىمەن «تۇرىك» دەپ جازىلعان. استىنعى جاعىندا قوشقارمۇيىز ويۋى بەينەلەنگەن. 31 گرام كۇمىستەن قۇيىلعان جانە قۇنى الدەقايدا جوعارى مونەتانىڭ نومينالدى باعاسى 30 تۇرىك ليراسى. ءا. بايەل ادەتتە مۇنداي مونەتالاردىڭ 20 ليرالىق نومينالعا يە بولاتىنىن، الايدا تۇرىك تاراپىنىڭ تاۋەلسىزدىكتىڭ 30 جىلدىعىنا وراي قازاقستان ءۇشىن بۇل ەرەجەنى وزگەرتكەندىگىن ايتتى.

ەستەلىك مونەتا تۇركيا تەڭگە سارايىنىڭ رەسمي سايتىندا ساتىلىمعا شىعادى. ا. ساپاربەك ۇلى مەن ءا. بايەل شەكتەۋلى سانمەن شىققان مونەتانىڭ وتاندىق، تۇرىك جانە الەمدىك كوللەكتسيونەرلەردىڭ ۇلكەن قىزىعۋشىلىعىنا يە بولاتىنىنا دەگەن سەنىمدەرىن ءبىلدىردى.