ەڭبەك ءمينيسترى: 30 مىڭ ەر ادام جۇمىس ىستەمەي، اتاۋلى الەۋمەتتىك كومەكتەن كۇن كورۋدە

بۇل تۋرالى ق ر ەڭبەك جانە الەۋمەتتىك قورعاۋ ءمينيسترى ءبىرجان نۇرىمبەتوۆ ايتتى، دەپ حابارلايدى قازاقپارات ءتىلشىسى.

«جاڭا زاڭ اياسىندا تابىسى تومەن وتباسىلارعا اتاۋلى الەۋمەتتىك كومەك تاعايىندالادى. سونىمەن قاتار، وتباسىندا ەڭبەككە جارامدى ادامدار بولسا، ولارعا جۇمىس ۇسىنامىز. ەگەر دە جۇمىسقا قابىلەتتى وسى ادام قىزمەتتەن باس تارتسا، وندا ا ءا ك بۇكىل وتباسىنا تولەنبەيتىن بولادى»، - دەدى مينيستر.

وسى ورايدا، ول قولدانىستاعى زاڭنامادا ەڭبەككە جارامدى وتاعاسى جۇمىستان باس تارسا، بۇگىندە تەك ەڭبەككە قابىلەتتى ادامعا عانا قاتىستى الەۋمەتتىك كومەك توقتاتىلاتىنىن ەسكە سالدى.

«بىزدە ۇسىنىلعان جۇمىستان باس تارتاتىندار وتە كوپ. ەلىمىزدە تەپسە تەمىر ۇزەتىن 30 مىڭنان استام ەر ادام جۇمىستان باس تارتىپ، بالالارىنا تولەنەتىن اتاۋلى الەۋمەتتىك كومەك قارجىسىنا ءومىر سۇرۋدە. مەنىڭشە، بۇل جاعداي دۇرىس ەمەس، ەر ازامات جۇمىس ىستەۋى كەرەك. اتاپ ايتقاندا، ەگەر ول جۇمىسقا تۇرسا، ونىڭ وتباسىنا بەرىلەتىن ا ءا ك تولەمدەرى جالعاسا بەرەدى. جالپى، ءبىز ەڭبەككە جارامدى ادامداردىڭ جاۋاپكەرشىلىگىن ارتتىرۋدى ۇسىنۋدامىز»، - دەدى ۆەدومستۆو باسشىسى.

بۇل تۇرعىدا ول وڭىرلەرگە ساپارلارى كەزىندە قانداي جاعدايعا تاپ بولعانىن ايتتى.

«ەكى ايدىڭ ىشىندە 15 وڭىرگە بارىپ، حالىقپەن كەزدەستىم. وسى ورايدا كوپتەگەن شارۋا قوجالىقتارىنىڭ وكىلدەرى ادامدار ۇسىنىلعان جۇمىسقا بارماي جاتقانىن ايتتى. ويتكەنى زايىبى 200 مىڭ تەڭگە اتاۋلى الەۋمەتتىك كومەك العاندىقتان، وتاعاسى 100 مىڭ تەڭگەنىڭ جۇمىسىنا كىرۋدەن باس تارتۋدا. تۇركىستاندا اۋقىمدى قۇرىلىس جۇرۋدە، الايدا ەر ازاماتتار 150 مىڭ تەڭگەلىك جالاقىعا بارماي جاتىر. سەبەبى، ولاردىڭ وتباسىنا 200 مىڭ تەڭگە سوماسىندا ا ءا ك تولەنۋدە. جالپى، ەڭبەككە جارامدى وتاعاسى جۇمىس ىستەگەنى دۇرىس»، - دەدى ب. نۇرىمبەتوۆ.

اۆتور: رۋسلان عابباسوۆ