قازاقستاندا 300 گە جۋىق كاسىپكەردىڭ قۇقىعى قورعالدى - اليك شپەكبايەۆ
بۇل تۋرالى ق ر سىبايلاس جەمقورلىققا قارسى ءىس-قيمىل اگەنتتىگىنىڭ ءتوراعاسى اليك شپەكبايەۆتىڭ وڭىرگە جۇمىس ساپارى بارىسىندا ءمالىم ەتىلدى، دەپ حابارلايدى قازاقپارات ءتىلشىسى.
اليك شپەكبايەۆ جۇمىس ساپارىنىڭ ەكىنشى كۇنى مەملەكەتتىك ورگاندار، قارجى ينستيتۋتتارى، تابيعي مونوپوليالار سۋبەكتىلەرى، «ازاماتتارعا ارنالعان ۇكىمەت» مەملەكەتتىك كورپوراتسياسى وكىلدەرىنىڭ قاتىسۋىمەن «بيزنەسكە ارنالعان ۇكىمەت» فرونت- كەڭسەسىنىڭ مۇمكىندىكتەرىمەن تانىستى.
مۇندا «ءبىر تەرەزە» قاعيداتى بويىنشا بيزنەسكە قاجەتتى بارلىق قىزمەت كورسەتۋ ۇدەرىسى ورتالىقتاندىرىلعان.
«بيزنەستى قورعاۋ جانە قولداۋ - اگەنتتىكتىڭ باستى باسىمدىقتارىنىڭ ءبىرى. تەك بيىلعى جىلدىڭ ون ايىندا ءبىز 300 گە جۋىق كاسىپكەردىڭ قۇقىعىن قورعاپ، مەملەكەتتىك ورگانداردىڭ كاسىپكەرلىك قىزمەتكە زاڭسىز ارالاسۋىنىڭ 160 دەرەگىنىڭ جولىن كەستىك»، - دەدى ا. شپەكبايەۆ.
اگەنتتىك ءتوراعاسى سونداي-اق «Protecting business and investments» جوباسى اياسىندا جەمقورلىققا قارسى سۇيەمەلدەنەتىن «كۋبلەي» جانە «كۆانت» كاسىپورىندارىنىڭ وندىرىستىك تىنىس-تىرشىلىگىمەن جانە ونىمدەرىمەن تانىستى.
ايتا كەتۋ كەرەك، ەكى جىل ىشىندە وڭىردە جالپى قۇنى 853 ميلليارد تەڭگەنى قۇرايتىن جوبالاردى جەمقورلىققا قارسى سۇيەمەلدەۋ تۋرالى 22 كەلىسىمگە قول قويىلدى.
«ەلباسى اتاپ وتكەندەي، ەكونوميكانىڭ 60-70 پايىزى شەت ەلدەردەگىدەي جەكە قولدا بولۋى ءتيىس. بۇعان قول جەتكىزۋ ءۇشىن ءبىز جۇمىس ىستەپ تۇرعان بيزنەستى قورعاپ قانا قويماي، بولاشاق كاسىپكەرلەرگە جايلى، تۇراقتى جانە سىبايلاس جەمقورلىقتان تازا كاسىپكەرلىكتىڭ بارلىق جاعدايلارى بار ەكەنىن جانە جىل سايىن تەك جاقسارا تۇسەتىنىن كورسەتۋىمىز كەرەك»، - دەپ مالىمدەدى ينۆەستورلارمەن كەزدەسۋدە ا. شپەكبايەۆ.
اگەنتتىك باسشىسى جاڭگىر حان اتىنداعى باتىس قازاقستان اگرارلىق-تەحنيكالىق ۋنيۆەرسيتەتىندە، سەرۆيس جانە جاڭا تەحنولوگيالار كوللەدجىندە بولىپ، سونداي-اق گەوپورتالدى دامىتۋعا، ءموبيلدى قوسىمشالار ارقىلى مەملەكەتتىك قىزمەتتەردى سيفرلاندىرۋعا جانە وبلىس اكىمدىگىنە سەرۆيستىك ۇلگىنى ەنگىزۋگە بەلسەندى قاتىساتىن «اقجايىق - ادالدىق الاڭى» جوبالىق كەڭسەسىنىڭ قىزمەتىنە دەن قويدى.
اتا-انالارى باس تارتقان ەرەكشە قاجەتتىلىكتەرى بار بالالار دا نازاردان تىس قالمادى. ا. شپەكبايەۆ پەن قوعام وكىلدەرى كوشىم ارناۋلى الەۋمەتتىك قىزمەت كورسەتۋ ورتالىعىنا بارىپ، ولاردىڭ قالاي ءومىر ءسۇرىپ جاتقانىنا قانىقتى. باتىس قازاقستان وبلىسىنا ەكى كۇندىك جۇمىس ساپارىن ازاماتتىق سەكتور وكىلدەرىمەن، وبلىس اكتيۆىمەن، بيزنەس قوعامداستىعى جانە جۋرناليستەرمەن كەزدەسۋمەن قورىتىندىلاعان ا. شپەكبايەۆ سىبايلاس جەمقورلىققا قارسى زاڭنامانىڭ وزەكتى ماسەلەلەرى مەن اگەنتتىكتىڭ ءبىر جىلداعى جۇمىسى تۋرالى ەگجەي-تەگجەيلى ايتىپ بەردى.
كەزدەسۋ بارىسىندا سپيكەر: «قازىرگى ۋاقىتتا پرەزيدەنتتىڭ سىبايلاس جەمقورلىققا قارسى رەفورمالارىنىڭ ءۇشىنشى پاكەتىن ءماجىلىس ماقۇلداپ، سەناتقا بەردى. بۇل - جەمقورلارعا ايتارلىقتاي اسەر ەتەتىن ەڭ مىقتى تۇزەتۋلەر. اتاپ ايتقاندا، شەنەۋنىكتەر ءۇشىن شەتەلدىك بانكتەردەگى شوتتارعا تىيىم سالىنادى، اۋىر جانە اسا اۋىر سىبايلاس جەمقورلىق قىلمىستارى بويىنشا شارتتى تۇردە مەرزىمىنەن بۇرىن بوساتۋ جويىلادى. ال قۇقىق قورعاۋ ورگاندارىنىڭ قىزمەتكەرلەرى مەن سۋديالار بۇدان بىلاي لاۋازىمدى تۇلعالاردىڭ باسقا ساناتتارىنا قاتىستى سىبايلاس جەمقورلىق قىلمىسى ءۇشىن كوبىرەك جازا الاتىن بولادى»، - دەپ مالىمدەدى.
ازاماتتىق قوعام وكىلدەرىنىڭ نەگىزگى ماسەلەلەرى تۇرعىن ءۇي الۋ، حالىققا الەۋمەتتىك جاردەماقى بەرۋ، جۇمىسقا ورنالاستىرۋ جانە كاسىپكەرلىككە قاتىستى بولدى. اليك شپەكبايەۆ قابىلداۋعا كەلگەن ءار تۇرعىندى تىڭداپ، ازاماتتاردىڭ تۇيتكىلدى ماسەلەلەرىن شەشۋ بويىنشا ءتيىستى جاۋاپتار مەن تاپسىرمالار بەردى.
ەسكە سالا كەتەيىك، بۇدان بۇرىن اليك شپەكبايەۆتىڭ جەمقورلىقتى جويۋ جانە الدىن الۋ جۇمىستارى ءىس جۇزىندە جۇرگىزىلۋى ءتيىس ەكەندىگىن ايتقانىن جازعان بولاتىنبىز.