الماتىدا بيىل 30 مىڭ وقۋشى 1-سىنىپقا بارادى

بۇل تۋرالى الماتى قالالىق ءبىلىم باسقارماسىنىڭ باسشىسى ءلاززات جىلقىبايەۆا بريفينگ بارىسىندا ايتتى، دەپ حابارلايدى قازاقپارات ءتىلشىسى.

«1- ماۋسىمنان 30- تامىزعا دەيىن 1- سىنىپقا باراتىن بالالاردىڭ زاڭدى وكىلدەرىنەن bilimalmaty.kz پورتالى ارقىلى وتىنىشتەر قابىلدانادى. اتالعان پروتسەدۋرا بويىنشا قازىر اتا-انالار اراسىندا قاجەتتى ءتۇسىندىرۋ جۇمىستارى جۇرگىزىلۋدە. جالپى بولجامدى مالىمەتتەرگە سايكەس، 1-سىنىپتارعا 30 مىڭنان استام بالا قابىلدانادى»، - دەيدى ءلاززات جىلقىبايەۆا.

ونىڭ ايتۋىنشا، قازىر قالاداعى مەكتەپتەردە وقۋشىلار ورنىنىڭ جەتىسپەۋشىلىگى وزەكتى بولىپ وتىر. قالا بويىنشا شامامەن 30 مىڭداي ورىن تاپشى بولىپ تۇر. جىل سايىن ءوسىپ وتىرعان كونتينگەنتتى ەسكەرەتىن بولساق، كەلەسى جىلى وقۋشى ورنى بۇدان ءارى ءوسۋى مۇمكىن.

«بۇگىنگى كۇنى مەملەكەتتىك مەكتەپتەردىڭ 40 پايىزىنا كوپ سالماق ءتۇسىپ وتىر. وسىعان بايلانىستى الماتى اكىمدىگى تاراپىنان ءبىلىم بەرۋ ۇيىمدارىن قارقىندى سالۋ باعدارلاماسى ازىرلەنگەن. بۇل باعدارلاما قالانىڭ شەتكى اۋداندارىندا مەكتەپتەردى سالۋ ارقىلى ىسكە اسىرىلادى»، - دەيدى ول.

ماسەلەن، وسى جىلى الاتاۋ، ناۋرىزباي، تۇركىسىب اۋداندارىندا 9 مەكتەپ جانە 13 مەكتەپكە قوسىمشا عيمارات سالۋ جوسپارلانعان. ناتيجەسىندە 2020-2021-جىلدارى 20 مىڭعا جۋىق وقۋشى ورنى ىسكە قوسىلماق.

«سونىمەن قاتار، رەسپۋبليكالىق جانە جەرگىلىكتى بيۋجەتتىڭ قارجىسىمەن 2 مەكتەپتىڭ قۇرىلىس جۇمىسى اياقتالۋدا جانە قوسىمشا 8 مەكتەپكە عيمارات سالىنىپ جاتىر. ولار اياقتالسا، 5 مىڭنان استام وقۋشى ورنى ىسكە قوسىلادى.

مەملەكەتتىك جەكەمەنشىك ارىپتەستىك جانە الەۋمەتتىك جاۋاپكەرشىلىك اياسىندا وسى جىلى 5 مەكتەپتىڭ قۇرىلىسى جانە قوسىمشا 2 عيمارات سالۋ باستالادى. بۇل 6 مىڭعا جۋىق وقۋشىنى قامتيدى. سونداي-اق، 4 جەكەمەنشىك مەكتەپتىڭ قۇرىلىسى ءجۇرىپ جاتىر، - دەيدى ءلاززات جىلقىبايەۆا.

ونىڭ ايتۋىنشا، 2020-2021-جىلدارى ءبىلىم بەرۋ ۇيىمدارىن قارقىندى سالۋدىڭ ارقاسىندا 47463 قوسىمشا وقۋشى ورىنى ىسكە قوسىلادى. بۇل مەكتەپتەردەگى ورىن جەتىسپەۋشىلىگىن 80 پايىزعا ازايتادى. سونىمەن بىرگە، 2020-جىلدىڭ جاز ماۋسىمىندا جوسپارلى تۇردە التى مەكتەپتە كۇردەلى جوندەۋ جۇمىستارى باستالادى.