سەرىك جۇمانعارين: ەنەرگەتيكا مينيسترلىگى ءبىزدىڭ ۇسىنىسىمىزدى گاز باعاسى 2 ەسە قىمباتتاعاندا عانا ەسكەردى

اگەنتتىك ءتوراعاسى Facebook-تەگى پاراقشاسىندا جىل باسىندا سۇيىتىلعان گاز باعاسى قالاي ىرىق بەرمەي كەتكەنىن تۇسىندىرۋگە تىرىستى.

«سۇيىتىلعان مۇناي گازىنىڭ ساۋداسى مامانداندىرىلعان ەلەكتروندىق الاڭدا ءجۇردى. ەنەرگەتيكا مينيسترلىگى سۇيىتىلعان گاز ساۋداسىنىڭ جەكەلەگەن قاعيدالارىن ازىرلەدى. بۇل رەتتە وتىن- ەنەرگەتيكا كەشەنىنىڭ باسقا دا تاۋارلارى، مىسالى، بەنزين، ديزەل وتىنى، اۆياكەروسين جانە كومىر بيرجالىق تاۋارلار تىزبەسىنە ەنگىزىلدى. وسى تاۋار پوزيتسيالارى بويىنشا بيرجالىق ساۋدا- ساتتىقتى الدىن الا وتكىزۋ ءۇشىن قر باسەكەلەستىكتى قورعاۋ جانە دامىتۋ اگەنتتىگىنىڭ جانىنان مەملەكەتتىك ورگاندار، نارىق سۋبەكتىلەرى جانە ينفراقۇرىلىمدىق ۇيىمدار وكىلدەرىنەن تۇراتىن بيرجالىق كوميتەت، كونسۋلتاتيۆتىك- كەڭەسشى ورگان قۇرىلدى»، - دەپ ەسكە الادى اگەنتتىك باسشىسى.

سەرىك جۇمانعاريننىڭ ايتۋىنشا، سۇيىتىلعان گاز ارنايى ەلەكتروندىق ساۋدا الاڭىندا ساتىلعاندىقتان، ول كۇرت قىمباتتاعان كەزدە ساۋدانى ۋاقىتشا توقتاتى تۇرۋ مۇمكىن بولماعان. ويتكەنى ەنەرگەتيكا مينيسترلىگى ارنايى ەلەكتروندى ساۋدا الاڭىنىڭ ەرەجەسىن ازىرلەگەن كەزدە مۇنداي تەتىكتىڭ قاجەتتىگىن ەسكەرمەگەن.

«بيرجالىق تاۋارلار ساۋداسىنىڭ سەكسيالىق ەرەجەسىنىڭ باستى ەرەكشەلىگىنىڭ ءبىرى - بيرجالىق كوميتەت قولايسىز سىرتقى جانە ىشكى جاعدايلاردا ساۋدا- ساتتىقتى توقتاتا تۇرۋعا قۇقىلى. مىسالى، بىلتىر ەكىنشى توقساندا مۇناي وڭدەۋ زاۋىتىنىن جۇمىسىن توقتاتۋ سالدارىنان وتىن تاپشىلىعى پايدا بولعان كەزدە مۇناي ونىمدەرىنىڭ ساۋداسى 2 ايعا ۋاقىتشا توقتاتىلدى. ماۋسىم ايىندا كومىردىڭ بيرجالىق ساۋدا- ساتتىعى تارتىپكە ساي وتپەگەنىنە بايلانىستى ۋاقىتشا توقتاتىلىپ، شىلدە ايىندا قايتا باستالدى. سونداي- اق ساۋدا سەسسياسىندا باعانىڭ وزگەرۋىنىڭ ىقتيمال ءدالىزىن + / - % 2 دەڭگەيىندە بەكىتۋ تۋرالى شەشىم قابىلداندى. بۇل ساۋدا- ساتتىقتا باعانىڭ وسۋىنە جول بەرمەۋگە مۇمكىندىك بەردى»، - دەيدى اگەنتتىك ءتوراعاسى.

ال ەنەرگەتيكا مينيسترلىگى ازىرلەگەن سۇيىتىلعان گازدى ساتاتىن ەلەكتروندى ساۋدا الاڭىنىڭ جۇمىس ەرەجەسىندە مۇنداي تەتىكتەر بولماعان.

«سۇيىتىلعان گازدى ساتۋ ەرەجەلەرىنىڭ بيرجالىق ساۋدادان كەيبىر ايىرماشىلىقتارى بولدى. مىسالى، باعانىڭ وزگەرۋ ءدالىزى + / - % 10 ارالىعىندا اۋىتقىدى. ونىڭ ۇستىنە باعا شەكتەن تىس وسكەن جاعدايدا ساۋدا- ساتتىقتى توقتاتا تۇرۋ قۇقىعى سياقتى قۇرالدار بولعان جوق. مامانداندىرىلعان ساۋدا الاڭىنىڭ بارلىق كەمشىلىكتەرى نارىق قاتىسۋشىلارىنىڭ نارازىلىعىنا اكەلدى. اگەنتتىك ەنەرگەتيكا مينيسترلىگىنە سۇيىتىلعان مۇناي گازىن ساتۋ ەرەجەلەرىن وزگەرتۋ بويىنشا ۇسىنىستار پاكەتىن جىبەردى. اگەنتتىك ۇسىنعان تۇزەتۋلەر جەلتوقسان ايىندا، ساۋدا- ساتتىقتاعى باعا جىلدىڭ باسىمەن سالىستىرعاندا 2 ەسە وسكە كەزدە بارىپ قابىلداندى. تۇتاستاي العاندا، قانداي دا ءبىر تاۋار ءۇشىن جەكەلەگەن مامانداندىرىلعان ساۋدا الاڭدارىن قۇرۋدىڭ ورىنسىزدىعىن اگەنتتىك پەن ەنەرگەتيكا مينيسترلىگى بيرجالىق ساۋدانى دامىتۋ ماسەلەلەرى جونىندەگى زاڭ جوباسىن ازىرلەۋ بارىسىندا ەسكەردى»، - دەپ ءتۇسىندىردى سەرىك جۇمانعارين.

اۆتور: ەسىمجان ناقتىباي