قازاقپارات كۇنتىزبەسى: 26- قازان

ەستە قالار وقيعالار

1964-جىلى قازاقستان كومپارتياسى ورتالىق كوميتەتى مەن رەسپۋبليكا مينيسترلەر كەڭەسى سەلينوگراد (قازىرگى استانا) مەديتسينالىق ينستيتۋتىن قۇرۋ تۋرالى شەشىم قابىلدادى. 1997-جىلى ول اكادەمياعا اينالدى.

2009-جىلدىڭ 6- قاڭتارىندا قازاق مەديتسينا اكادەمياسى «استانا مەديتسينالىق ۋنيۆەرسيتەتى» ا ق بولىپ قايتا قۇرىلىپ، «ۇلتتىق مەديتسينالىق حولدينگى» ا ق قۇرامىنا كىردى.

1999-جىلى پرەزيدەنت ن. نازاربايەۆ ماسكەۋدەگى كرەملدىڭ گەورگي زالىندا وتكەن كەدەن وداعىنا قاتىسۋشى مەملەكەتتەردىڭ مەملەكەتارالىق كەڭەسىنىڭ وتىرىسىنا قاتىستى.

رەسەي استاناسىندا كەدەن وداعى جانە ءبىرىڭعاي ەكونوميكالىق كەڭىستىك تۋرالى كەلىسىمگە قاتىسۋشى مەملەكەت باسشىلارىنىڭ ماسكەۋ دەكلاراتسياسىنا قول قويىلدى.

2010-جىلى مەملەكەت باسشىسىنىڭ بەلگيا كورولدىگىنە جاساعان رەسمي ساپارى اياسىندا قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆتىڭ باستاماسى جانە ۇسىنىسى بويىنشا تاراپتار قازاقستان مەن بەلگيا اراسىنداعى ىسكەرلىك كەڭەس قۇرۋ تۋرالى شەشىم قابىلدادى.

2010-جىلى شىمكەنتتە وڭتۇستىك قازاقستان وبلىسىنىڭ اتاقتى سپورتشىلارىنىڭ اللەياسى اشىلدى. وبلىستىڭ ايگىلى 28 سپورتشىنىڭ ەسىمى جازىلعان گرانيت تاقتالار قالاداعى قاجىمۇقان اتىنداعى ورتالىق ستاديون الدىنداعى الاڭعا ورناتىلعان.

گرانيت تاقتالاردا بوكسشى بەكزات ساتتارحانوۆ، گيمناستشىلار نەللي كيم مەن ءاليا يۋسۋپوۆا، بالۋان بيسولت دەتسيەۆتىڭ ەسىمدەرى جازىلعان.

2011-جىلى كۋالا-لۋمپۋردا قازىرگى قازاقستان سۋرەتشىلەرىنىڭ كورمەسى ءوتتى. ونى قازاقستان رەسپۋبليكاسىنىڭ مالايزياداعى ەلشىلىگى ۇيىمداستىردى. الماتىنىڭ «ونەر» ارت-سالونى ۇسىنعان 100 شاقتى سۋرەتتە قازاق حالقىنىڭ تاريحى، داستۇرلەرى، ۇلتتىق قۇندىلىقتارى، دالا رۋحى كورىنىس تاپقان.

2015 -جىلى قازاقستان رەسپۋبليكاسىنىڭ مادەنيەت جانە سپورت مينيسترلىگى يتاليانىڭ مۇراعاتىنان دەشتى قىپشاق كەزەڭىندە جازىلعان «كودەكس كۋمانيكۋس»، ياعني، قىپشاق ءتىلى سوزدىگىنىڭ ەلەكتروندى نۇسقاسىن ەلىمىزگە اكەلدى.

2015 -جىلى ۆارشاۆادا كاسىبي فۋتبول ليگالارى ەۋروپالىق قاۋىمداستىعىنىڭ باس اسسامبلەياسى ءوتتى. ونىڭ قورىتىندىسى بويىنشا، ۇيىمنىڭ قۇرامىنا قازاقستاننىڭ كاسىبي فۋتبول ليگاسىن قابىلداۋ شەشىمى قابىلداندى.

2017 -جىلى قازاق ءتىلى ءالفاۆيتىنىڭ كيريلليتسادان لاتىن گرافيكاسىنا كوشۋىن قامتاماسىز ەتۋ ماقساتىندا قازاقستان پرەزيدەنتى نۇرسۇلتان نازاربايەۆ قازاق ءتىلى الفاۆيتىن لاتىن گرافيكاسىنا كوشىرۋ بويىنشا ۇلتتىق كوميسسيا قۇرۋدى، 2025-جىلعا دەيىن قازاق ءتىلى الفاۆيتىنىڭ لاتىن گرافيكاسىنا كەزەڭ-كەزەڭمەن كوشۋىن قامتاماسىز ەتۋ تۋرالى قاۋلى قابىلدادى.

2017 -جىلى رەجيسسەر ءسابيت قۇرمانبەكوۆتىڭ «ورالمان» كوركەم فيلمى يتاليادا وتكەن ⅹⅹحالىقارالىق «Religion Today» («بۇگىنگى ءدىن») كينوفەستيۆالىندە «ۇزدىك فيلم» جۇلدەسىمەن ماراپاتتالدى. سونىمەن قاتار، اتالعان تۋىندى SIGNIS تاۋەلسىز قازىلار القاسىنىڭ ارنايى جۇلدەسىنە قول جەتكىزدى (كوممۋنيكاتسيا جونىندەگى الەم كاتوليكتەرى قاۋىمداستىعىنىڭ جۇلدەسى).

2018 -جىلى شىعىس قازاقستان وبلىسىنىڭ ءۇرجار اۋدانىندا «تارباعاتاي» ۇلتتىق پاركى اشىلدى.

ونداعى ماقسات - بيولوگيالىق جانە لاندشافتتىق ءارالۋاندىلىقتى ساقتاپ قالۋ، ارنايى ەكولوگيالىق، عىلىمي، تاريحي-مادەني جانە رەكرەاتسيالىق قۇندىلىعى بار تابيعات قورعاۋ ماقساتتارى ءۇشىن مەملەكەتتىك تابيعي رەزەرۆتىك قوردىڭ بىرەگەي تابيعي كەشەندەرىن جانە وبەكتىلەرىن پايدالانۋ.

ۇلتتىق پاركتىڭ اۋدانى 143550,5 گ ا، قورعاۋ ايماعى - 204602 گەكتار.

پاركتىڭ ەرەكشەلىگى، وندا وسىمدىكتەردىڭ وزگە اۋماقتا كەزدەسپەيتىن «قىزىل كىتاپقا» ەنگەن 35 تەن استام ءتۇرى بار. وندا، بۇگىنگى كۇنگە دەيىن، فلورانىڭ 1640 ءتۇرى انىقتالعان. ۇلتتىق پاركتىڭ ومىرتقالى جانۋارلار فاۋناسى دا باي. الدىن الا الىنعان دەرەكتەر بويىنشا، ولار 376 ءتۇردى قامتيدى.

2019 -جىلى شۆەيتساريانىڭ ترامەلان قالاسىندا اۋىر اتلەتيكادان وتكەن 49th ‘Challenge 210’ حالىقارالىق جارىسىندا قازاقستاندىق راۋشان مەشىتحانوۆا 81 كەلىگە دەيىنگى سالماق دارەجەسىندە جەڭىمپاز اتاندى. سپورتشى 205 كەلى (95+110) كورسەتىپ، جارىستىڭ التىن جۇلدەسىن قانجىعاسىنا بايلادى.