قازاقپارات كۇنتىزبەسى: 25- قازان

اتاۋلى كۇندەر

قازاقستاندا الەۋمەتتىك قورعاۋ جۇيەسى قىزمەتكەرلەرىنىڭ كۇنى

قازان ايىنىڭ سوڭعى جەكسەنبىسىندە اتاپ وتىلەدى، كاسىبي مەرەكەلەردىڭ رەسمي تىزىمىنە كىرگەن.

ەڭ جاس كاسىبي مەرەكەلەردىڭ ءبىرى 2011-جىلى قۇرىلدى. بۇل ءوزىنىڭ جانقيارلىق ەڭبەگى مەن تىنىمسىز قامقورلىعى ارقىلى قارت ادامدارعا قىزمەت ەتەتىن، مۇگەدەكتەرگە، از قامتىلعان جانە كوپ بالالى وتباسىلارعا باعا جەتپەس كومەك كورسەتەتىن بارلىق ادامعا دەگەن شىنايى قۇرمەتتىڭ بەلگىسى.

شىنىندا دا، ءبىزدىڭ قوعامنىڭ تۇراقتىلىعى مەن ءال-اۋقاتى كوبىنەسە حالىقتى الەۋمەتتىك قورعاۋ دەڭگەيىنە، الەۋمەتتىك كەپىلدىكتەرگە بايلانىستى.

حالىقارالىق ايەلدەر بەيبىتشىلىك ءۇشىن كۇرەسى كۇنى

ايەلدەردىڭ حالىقارالىق دەموكراتيالىق فەدەراتسياسىنىڭ شەشىمىمەن قارۋسىزدانۋ اپتالىعى (24-31 قازان) شەڭبەرىندە 1980-جىلدان باستاپ اتاپ وتىلەدى.

ەستە قالار وقيعالار

1894 -جىلى قازاقستان اۋماعىندا پوكروۆسكايا سلوبودا (قازىرگى ر ف ساراتوۆ وبلىسى ەنگەلس قالاسى) - ورال تار تاباندى جول قۇرىلىسى اياقتالعاننان كەيىن، ءبىرىنشى تەمىرجول ماگيسترالى اشىلدى.

بۇل تەمىر جولدىڭ 130 شاقىرىمى قازىرگى قازاقستان اۋماعىنان ءوتتى. 4 جىلدان كەيىن قازاق دالاسى ارقىلى وتەتىن 77 ك م ۋرباح - استراحان تار تاباندى جولى ىسكە قوسىلدى.

1972 -جىلى قازاق ك س ر مينيسترلەر كەڭەسىنىڭ 512№ قاۋلىسى نەگىزىندە تالدىقورعان پەداگوگيكالىق ينستيتۋتى قۇرىلدى.

1977 -جىلى 10- قازاندا اتالعان ءبىلىم ورداسىنا قازاقتىڭ كورنەكتى اقىنى، جازۋشى ءىلياس جانسۇگىروۆتىڭ ەسىمى بەرىلدى.

1994 -جىلى تالدىقورعان مەملەكەتتىك ۋنيۆەرسيتەتى، ال 1999-جىلى ءى. جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتى بولىپ قايتا قۇرىلدى.

1990 -جىلى قازاق ك س ر جوعارعى كەڭەسى «قازاق ك س ر- ءىنىڭ مەملەكەتتىك ەگەمەندىگى تۋرالى» دەكلاراتسيانى قابىلدادى. بۇل دەكلاراتسيانىڭ قابىلدانۋىمەن ەگەمەندىگىن ءمالىم ەتەتىن جەكە تەرريتورياسى، ازاماتتىعى، مەملەكەتتىك بيۋجەتى، حالىقارالىق قاتىناستارداعى دەربەستىگى، مەملەكەتتىك رامىزدەرىمىز بەكىتىلدى.

قازاقستاننىڭ ەگەمەندىگى جانە تەرريتورياسىنىڭ تۇتاستىعى ساياسي، قۇقىقتىق جانە ەكونوميكالىق تۇرعىدان دايەكتەلدى. وسى كەزدەن باستاپ دەموكراتيالىق قوعام قۇرۋ ماقساتىندا ەل ىشىندەگى قوعامدىق-ساياسي قۇرىلىمعا ءبىراز وزگەرىستەر ەنگىزىلە باستادى. بۇل اكت ارقىلى الەم كارتاسىنداعى جاڭا مەملەكەت - قازاقستان رەسپۋبليكاسىنىڭ نەگىزى قالاندى.

1996 -جىلى يۋري مەلنيچەنكو امەريكانىڭ اتلانتا قالاسىندا گرەك-ريم كۇرەسى بويىنشا قازاقستان تاۋەلسىزدىك العاننان كەيىنگى العاشقى قازاقستاندىق وليمپيادا چەمپيونى اتاندى.

2000 -جىلى استانادا پرەزيدەنتتىك مادەنيەت ورتالىعى اشىلدى.

2000 -جىلى پاۆلوداردا اكادەميك ق. ساتپايەۆ كوشەسىندە اقىن سۇلتانماحمۇت تورايعىروۆتىڭ ەسكەرتكىشى اشىلدى. ءمۇسىننىڭ اۆتورى - ەڭبەك سىڭىرگەن ونەر قايراتكەرى ەسحان سەرگەبايەۆ.

ەسكەرتكىش قولادان، تۇعىرى قىزىل جانە قارا گرانيتتەن جاسالعان. مەموريالدىڭ نەگىزى بولعان ونەر مۇراجايىنىڭ قابىرعاسى ەكى سيۋجەتتىك رەلەفكە تولى، ونىڭ اۆتورى - جاس تالانتتى ءمۇسىنشى مۇرات مانسۇروۆ.

2010 -جىلى بەلگيا كورولدىگىنە جاساعان رەسمي ساپارىنىڭ اياسىندا مەملەكەت باسشىسى نۇرسۇلتان نازاربايەۆ «ەگموند پالاس» كورولدىك ساراي اۋماعىنداعى يادرولىق سىناق، ەكولوگيالىق جانە تەحنوگەندىك اپات قۇرباندارىنا ارنالىپ سالىنعان ەسكەرتكىشتى اشتى.

اۆتورلىق توپتىڭ جەتەكشىسى، قازاقستان سۋرەتشىلەر وداعىنىڭ مۇشەسى، استانا سۋرەتشىلەر كەڭەسىنىڭ ءتوراعاسى قوڭىر مۇحامەدييەۆ اتاپ وتكەندەي، ەسكەرتكىش قارا جانە جاسىل تاستاردان سالىنعان.

قارا تاس اتوم بومباسىنىڭ بەلگىسى بولسا، جاسىل ءتۇس - ءومىر بەلگىسى. تاسقا قازاقستان رەسپۋبليكاسى پرەزيدەنتىنىڭ 1991-جىلعى «سەمەي سىناق يادرولىق پوليگونىن جابۋ تۋرالى» جارلىعى قاشالىپ جازىلعان.

بۇدان باسقا ەسكەرتكىشكە ب ۇ ۇ باس اسسامبلەياسىنىڭ 29- تامىزدى حالىقارالىق يادرولىق سىناقتارعا قارسى ءىس-قيمىل كۇنى دەپ جاريالاۋ تۋرالى قارارى قاشالىپ جازىلعان.

ەسكەرتكىشتىڭ جوعارى جاعىندا حالىقتىڭ بىرلىگى مەن بەيبىتشىلىككە ۇمتىلىسى كورىنىس تاپقان. ەسكەرتكىشتىڭ تومەنگى جاعىندا ءومىردى بەينەلەيتىن اعاش بۇتاعى «وسكىنى» بەينەلەنگەن.

2011-جىلى تارازدا ورتالىق بازارداعى ارحەولوگيالىق قازبا جۇمىستارى كەزىندە ارحەولوگتار استاناسى ەجەلگى تالاس قالاسى (تاراز) بولعان تۇرگەش قاعاناتى ءداۋىرىنىڭ جەتى مىس مونەتاسىن تاپتى.

2013-جىلى تارازدا قازاق تاريحىنىڭ بەلدى تۇلعالارىنىڭ ءبىرى - تولە ءبيدىڭ 350 جىلدىعىنا وراي ەسكەرتكىش قويىلدى.

2018 -جىلى دۇنيەجۇزىلىك دەنساۋلىق ساقتاۋ ۇيىمىنا مۇشە 197 مەملەكەتتىڭ بارلىعى العاشقى مەديتسينالىق-سانيتارلىق كومەك تۋرالى استانا دەكلاراتسياسىن ءبىراۋىزدان قابىلدادى.

2018 -جىلى قازاقستان رەسپۋبليكاسى مەن قىرعىزستان رەسپۋبليكاسى اراسىنداعى قازاق-قىرعىز مەملەكەتتىك شەكاراسىن دەماركاتسيالاۋ تۋرالى كەلىسىم راتيفيكاتسيالاندى، ونىڭ نەگىزگى ماقساتى قازاقستان مەن قىرعىزستان اراسىنداعى شەكارا سىزىعىن حالىقارالىق- قۇقىقتىق دەڭگەيدە بەكىتۋ.

2019-جىلى قازاقستاندىق جەڭىل اتلەت ولگا رىپاكوۆا ۋحاندا (قىتاي) وتكەن دۇنيەجۇزىلىك اسكەري ويىندارىندا التىن مەدال جەڭىپ الدى. ءۇش قارعىپ سەكىرۋ جارىسى بويىنشا جەرلەسىمىز 14.19 مەترگە سەكىرىپ، جارىستىڭ ۇزدىگى اتاندى.

2019-جىلى بريتان ازاماتتىق اۆياتسيا اگەنتتىگى مەن قازاقستاننىڭ اۆياتسيالىق اكىمشىلىگىنىڭ بريتاندىق رەتتەۋ مودەلىنە كوشۋ جونىندەگى بىرلەسكەن جوباسى ىسكە قوسىلدى. ۇلى بريتانيانىڭ اۆياتسيالىق بيلىك ورىندارىمەن ءوزارا ءىس-قيمىل قازاقستاننىڭ اۆياتسيا سالاسىن مەملەكەتتىك رەتتەۋدىڭ حالىقارالىق ۇزدىك پراكتيكاسىنا كوشۋىن جەدەلدەتەدى، سونداي-اق ءوز ماقساتىنا قول جەتكىزۋدە ۇشۋ قاۋىپسىزدىگىنىڭ يكاونىڭ جوعارى تالاپتارىنا سايكەستىك دەڭگەيىن بارىنشا ارتتىرۋعا كومەكتەسەدى.