قازاقستاننىڭ جوعارعى سوتىندا سۋديا لاۋازىمىنىڭ 25 پايىز ورنى بوس تۇر

«ءبىز زاڭدى (قازاقستاننىڭ سۋديا كادرلار ماسەلەلەرى جونىندەگى زاڭناماسى) قابىلدادىق جانە ونىڭ ناتيجەسىندە سۋديالار جۇيەسىنىڭ كادرلارى جاڭارىپ جاتىر. ءقازىر بىزدە 134 بوس ورىن بار. تەك جوعارعى سوت قۇرامىنىڭ تورتتەن ءبىرى جەتىسپەيدى. سەبەپتەرى تۇسىنىكتى. ول - زەينەتكەرلىككە جانە وتستاۆكاعا شىعۋ، سۋديالار ءوز ەرىكتەرىمەن كەتۋى. كوپشىلىگى سۋديا كانديداتۋراسىنا قويىلعان قاتاڭ تالاپتارعا شىداي المايدى. جۇكتەمە وتە ۇلكەن، جەكە ومىرگە ۋاقىت جوق. قازىرگى ۋاقىتتا زاڭگەرلەر ءۇشىن سۋديا ماماندىلىعىنىڭ تارتىمدىلىعىن كوتەرۋ مىندەتى تۇر»، - دەدى ول «سوت جۇيەسىندەگى كادرلىق ساياساتتىڭ بولاشاعى» اتتى حالىقارالىق دوڭگەلەك ۇستەل بارىسىندا.

ونىڭ اتاپ وتۋىنشە، 30 جاسقا تولعان ادامنىڭ عانا سۋديا بولا الاتىندىعى جاعدايدى ودان ارى كۇردەلەندىرىپ وتىر.

«ماسەلەن، جاس ادام ۋنيۆەرسيتەت بىتىرگەننەن كەيىن 30 جاسىنا دەيىن قانداي دا ءبىر كومپانيادا نەمەسە وزىنە جۇمىس ىستەيدى. ول بۇل ۋاقىتتا قالىپتاسىپ ۇلگەرگەن ادام جانە ونى سۋديالىق جۇمىسقا تارتۋ قيىن. ال ەڭ باستى مىندەت - ەڭ ۇزدىگىن تارتۋ. زاڭنىڭ كۇشىنە ەنگەنىنە ءبىر جىل تولماعان ارالىقتا ءبىز بۇل ماقساتقا قول جەتكىزە الا قويعان جوقپىز. ءبىز ونى شەشۋ جولىندامىز»، - دەدى تولەش قاۋدىروۆ.

كەڭەس مۇشەسىنىڭ اتاپ وتۋىنشە، سۋديالار ءۇشىن ءبىلىم دە نەگىز قۇراۋشى ساپا بولا المايدى.

«ويتكەنى، سۋديا - بۇل زاڭدىق مانساپتىڭ ەڭ جوعارى نۇكتەسى. ياعني، سۋديا زاڭدى بىلىكتىلىكتىڭ شىڭى سانالادى. ول ەڭ قيىن، ەڭ ماڭىزدى جانە قۇرمەتتى جۇمىس سانالادى. ءبىز بۇل جۇمىستا ەڭ ۇزدىكتەردى، جاۋاپكەرشىلىگى جوعارىلاردى، ەڭ ادالداردى كورگىمىز كەلەدى. بۇل جۇيەگە مەملەكەتىنە، حالقىنا قىزمەت ەتىپ، سوت ادىلدىگىن ورناتقىسى كەلگەندەر كەلەدى. بۇل رەتتە ءبىلىم ءبىرىنشى ورىندا ەمەس. دەگەنمەن، ول دا وتە ماڭىزدى. ءبىرىنشى ورىندا ادامي ساپا تۇرۋى ءتيىس. سەبەبى سۋديا ادامدارمەن جۇمىس ىستەيدى»، - دەدى ول.

اۆتور: مارلان جيەمباي