سۋردليمپيادا جەڭىمپازدارىنا 250 مىڭ دوللارعا دەيىن سىياقى جانە پاتەر بەرىلەدى

«سۋردليمپيادا ويىندارىندا ءبىزدىڭ ويىنشىلار جاقسى ويىن كورسەتتى. ماقتانىشپەن ايتۋعا بولادى. بارلىعى 28 مەدال قورجىندا، ونىڭ ىشىندە 3 التىن، 7 كۇمىس جانە 18 قولا بار. بۇگىن جەڭىمپازداردى ماراپاتتاۋ سالتاناتىن وتكىزىپ جاتىرمىز. XXIV سۋردليمپياداعا ەلىمىزدەن 100 گە جۋىق سپورتشى قاتىستى. قازاقستان بۇل باسەكەگە وسىمەن جەتىنشى رەت قاتىسىپ وتىر. الداعى ۋاقىتتا سۋردليمپيادادا ەل نامىسىن قورعايتىن سپورتشى كوبەيە تۇسەدى دەگەن ويدامىن»، - دەدى ق ر مادەنيەت جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتىنىڭ ءتوراعاسى سامات ەرعاليەۆ.

ۆيتسە-ءمينيستردىڭ ايتۋىنشا، قازاقستاندىقتار XXIV سۋردليمپياداعا سپورتتىڭ 8 تۇرىنەن قاتىستى.

«سۋردليمپيادا سپورتشىلارىن كەڭىنەن ناسيحاتتاۋ كەرەك. ەرەكشە سپورتشىلارىمىز قول-اياعى ساۋ سپورتشىلارمەن بىردەي ەل نامىسىن قورعاپ ءجۇر. سپورتتىڭ قاي تۇرىنەن جەتىستىككە جەتسە دە، مەملەكەت تاراپىنان بارىنە بىردەي قارجىلاي سىياقى قاراستىرىلعان»، - دەيدى ول.

مينيستر ورىنباسارىنىڭ مالىمەتىنشە، XXIV سۋردليمپيادادا 1 ورىن العان سپورتشىعا 250 مىڭ ا ق ش دوللارى كولەمىندە سىياقى بەرىلەدى. 2 ورىنعا - 150 مىڭ دوللار، ال 3- ورىن يەلەنگەن سپورتشىعا - 75 مىڭ دوللار سىياقى تابىستالادى.

ودان بولەك، س. ەرعاليەۆ جەڭىمپاز بولعان سپورتشىعا 3 بولمەلى پاتەر، 2- ورىن يەلەنسە 2 بولمەلى، ال 3- ورىنعا تۇراقتاعان ويىنشىعا 1 بولمەلى پاتەر بەرىلەدى.

اتالعان سالتاناتتى شارادا سپورتشىلاردان بولەك جاتتىقتىرۋشىلار دا سىي-ماراپاتقا يە بولدى.

ايتا كەتسەك، XXIV سۋردليمپيا ويىندارى بيىل 1-15- مامىر ارالىعىندا برازيليانىڭ كاشياس-دە-سۋل قالاسىندا ءوتتى.