جامبىل وبلىسىنىڭ تۇرعىنى 24 جىل كورمەگەن اكەسىن ىزدەپ تاپتى

بۇل تۋرالى Qazaqstan ۇلتتىق ارناسىنىڭ «قىمبات جاندار» باعدارلاماسىنىڭ سيۋجەتىندە ايتىلادى.

ايگەرىمنىڭ ايتۋىنشا، اتا-اناسى ول ءسابي كەزىندە اجىراسىپ كەتكەن. ناعاشىلارىنىڭ قولىندا وسكەن ول 2015 -جىلدان باستاپ تۋعان اكەسىن ىزدەي باستاعان.

ال تۇرمىس قۇرعان سوڭ وسى باعدارلاماعا كەلۋدى ۇيعارعان.

«اكەمدى ىزدەۋگە انام قارسى بولدى. ولاردىڭ نە ءۇشىن اجىراسقانىن بىلمەيمىن، اكەمە ەشقانداي وكپەم جوق. تەك مەنى نەگە ىزدەمەدى ەكەن دەگەن ءبىر عانا سۇراعىم بار»، - دەيدى ايگەرىم.

تەلەارنا مالىمەتىنشە، امزە ءابىلقاسىموۆ - الماتى وبلىسى ىلە اۋدانىنىڭ تۇرعىنى. 2001 -جىلى ەكىنشى رەت شاڭىراق كوتەرگەن. جارى مايرا ەكەۋى 2 قىز تاربيەلەپ وتىر ەكەن.

«ايگەرىمنىڭ اناسىمەن 1993 -جىلى ۇيلەنگەن ەدىك. تۇڭعىش ۇلىمىز شەتىنەپ كەتتى. كەيىن ەگىز قىزىم دۇنيەگە كەلدى. ول كەزدە اجىراسقان ەدىك. ەگىزدىڭ ءبىرى بوسانعان كەزدە كوز جۇمدى. ەكىنشىسىنىڭ اتىن ايگەرىم دەپ ءوزىم قويدىم»، - دەدى اكەسى.

وسىلايشا ستۋديادا اكەسى مەن قىزى 24 جىلدان كەيىن قاۋىشتى.